RYHPACHANEINA 9 - Mara Bible RV (BSI)

Kâna phopizy pahleipadiana

¹ “Hy Izarei, nathlie teh, nâmo hlâta maluh hluh viapa nata thatlô viapa, avâ taihta thokhy ta dôhpa khihpizy siehnao ta pho awpa ta, tanoh cha Zawdâh nama chaka bâ aw.

² Phopi pôh pahreihpa nata doh seihpa, Anâki pathlazy ama châ. Âmo cha pahno ei chi ta, ‘Anâki pathlazy hmiakô liata ahy a duah thei aw?’ ama tah tyhpa nama thei.

³ Chavâta Abeipa nama Khazohpa cha, mei a kâsao theipa hawhta nama hmia lâta a siepa a châ tahpa tanoh pahno teh u. Ano ta âmo cha nama hmiakô liata pahleipadia aw ta, a panawh aw ei. Abeipa ta bie a châ taihpa hawh ei ta, âmo cha papua aw ei chi ta, thlai nama pahleipadia aw.

⁴ “Abeipa nama Khazohpa ta âmo cha nama hmiakô tawhta a cha papuapa khai tawh ei ta, nama palôh liata, ‘Eima siana vâta Abeipa ta he râh he hnei awpa ta miah â kaw chhi,’ nama tah awpa châ vei. He phopizy moleina vâta Abeipa ta nama hmiakô tawhta a papuapa ei tlao a châ.

⁵ Nâmo siana vâta tlyma, nama palôh â dopa vâta tlyma, ama râh liata a ngiapa ta nama hnei awpa châ leipa ta, he phopizy moleipa vâta nata Abeipa ta châ pathlatuhpa Abarahâ, Aisika nata Zakaw zy hnohta bie â vaw taihpa a pa-i thei nawpa ta, Abeipa nama Khazohpa ta âmo cha nama hmiakô tawhta a papuapa a châ.

⁶ “Chavâta he he pahno teh u. Nama siana vâta Abeipa nama Khazohpa ta he râh phapa he hnei awpa ta a cha piepa ei châ vei. Nâmo cha phopi chhorupa nama châ.

Hôribâ liata Izarei moleina

⁷ “Râhchawhpa liata Abeipa pathi nama pa-iapa kha a thei thlâh ha u la, my beih khuh vy. Izi râh tawhta nama kaw pua noh tawhta, he su nama vaw tlôna taihta, Abeipa a dyuhtuhpazy nama châ.

⁸ Hôribâ liata chhao Abeipa pathi pa-ia ei chi ta, cha pahleipadia khai awpa taihta Abeipa cha nama chô liata a pathi a ia.

⁹ Bie rona lôphiazy, Abeipa ta nama hnohta bie a hraina biehrai lôphiazy la awpa ta tlâh lâ ei khy nota, noh sypalih nata zâ sypalih tlâh liata y na ta, viahchhâ rai nie leipa na ta, ti chhao doh va na.

¹⁰ Abeipa ta bie rona lôphia miano, Khazohpa kudy ta ropa na pie ta, cha liana chata namâ pôhpakhy noh ta tlâh chô liata mei hry tawhta Abeipa ta nama hnohta bie a reipa zydua ropa a châ.

¹¹ Noh sypalih nata zâ sypalih a tloh nahta, Abeipa ta bie rona lôphia miano, biehrai lôphiazy cha na pie ta.

¹² Abeipa ta ei hnohta, ‘Thyu la, he su tawhta zu para teh. Izi râh tawhta nâ kaw chhi papuapa, na phopi ama molei ha khuh. A chhih awpa ta bie ei piepa lâpi thlai tleisai ei ta, nothlahpa tlao amâ tao,’ tahpa ta na chho ta.

Ngôh viahchao taw

¹³ “Cha dei châ vei, Abeipa ta, ‘He phopi he ei hmô ha ei, moh tua, phopi chhorupa ama châ hih!

¹⁴ Chavâta na patypamâ khah y. Pahleipadia aw ei na ta, avâ ry tawhta ama moh ei phie aw. Âmo hlâta phopi hmotaothei viapa nata lai viapa ta nâ ei cha tao aw,’ tahpa ta na chho ta.

¹⁵ Chatanachata a heih na ta, tlâh tawhta za chô na ta, tlâh cha mei ta kâ hai ta, biehrai lôphia miano cha ei ku kârano ta chaba na ta.

¹⁶ Mohmia pasaih na ta, Abeipa nama Khazohpa chô liata nama vaw moleipa hmô na ta. Viahchao taw nothlahpa a tao ei chi ta, Abeipa biepiepa lâpi tawhta thlai nama tlei haw.

¹⁷ Chavâta lôphia miano cha chalo na ta, ei ku kârano ta thy na ta, nama mohmô liata ei pakei hapa kha a châ.

¹⁸ Molei ha ei chi ta, Abeipa mohmô ta hmo parao ei chi ta, a hie nama pahâh hapa vâta, ei tao tuapa hawhna khata, noh sypalih nata zâ sypalih Abeipa hmiakô liata pao heih na ta, viahchhâ nie leipa na ta, ti chhao doh va na.

¹⁹ Abeipa cha nama chô liata thata a hiehâh ta, cha pahleipadia khai awpa taihta a khohpa vâta, Abeipa hiehâhna nata pathiiana cha chi na ta. Châhrasala kha daihti liana chhao khata Abeipa ta ei bie nathlie ta.

²⁰ Abeipa cha Arawna chô liata pahleipadia khona taihta a pathi ia ta, châhrasala kha daihti liana khata Arawna châta chhao thlahchhâ na ta.

²¹ Nama moleina hmo, viahchao taw nothlahpa nama taopa kha la na ta, mei liata rao na ta, pakeichheih khaipa ta, dohlei hawhta dina taihta charo na ta, tlâh tawhta chavah zâ lohpa liata a paoh ei thy haw.

²² “Tâberâ liata zy, Mâsâ liata zy, Kibarôhâtavâ liata zy chhao Abeipa hie pahâh ei chi ta.

²³ Abeipa ta, ‘Râh ei cha piepa ei cha kaw hnei teh u,’ tahpa ta Kâdesbânia tawhta a cha pasiesa no ei khata, Abeipa nama Khazohpa biepiepa cha a dyuh ei chi ta, ano cha ngâ leipa ei chi ta, a ao nathlie veih ei chi.

²⁴ Ei cha pahno tua noh tawh ei ta Abeipa a dyuhpa nama châ.

²⁵ “Cha pahleipadia awpa ei ta Abeipa ta bie a reih hapa vâta, Abeipa hmiakô liata pao na ta, noh sypalih nata zâ sypalih ei pao.

²⁶ Abeipa lâ thlahchhâ na ta, a hnohta, ‘Hy Abeipa Zehôvâh, na rônahna ta na pachhapa, Izi râh tawhta ku thatlôpa ta nâ kaw chhi papuapa na phopi nata na ryutozy he rie pahleipadia khah y.

²⁷ Châ chakaotuhpa Abarahâ, Aisika nata Zakaw zy a thei thlâh ha la, he phopi chhoruna, hmoparaona nata moleina he rie moh khah y.

²⁸ Chataleipatala miah na kaw puakheina râh ta, “Abeipa ta ama hnohta bie â taihpa râh lâ â chhi thei leipa vâ ei ta nata â haopa vâ ei ta, râhchawhpa liata thie awpa ta â chhi papua ei,” ama tah pathlei aw.

²⁹ Âmo he na hmotaotheina rônahpa nata na bâh pazawhpa ta nâ kaw chhi papuapa na phopi nata na ryuto châ tlôh ei ta,’ tah na ta.