RYHPACHANEINA 8 - Mara Bible RV (BSI)

Zehôvâh Khazohpa atheithlâhna

¹ “Tanoh ta bie ei cha piepa zydua ei he pakhâta ta nama tao awpa a châ. Chatanachata hroh aw ei chi ta, pôh aw ei chi ta, châ pathlatuhpazy hnohta Abeipa ta bie â taihpa râh liata a ngia aw ei chi ta, râh cha nama hnei aw.

² A biepiepazy nama zyh ma, zyh vei ma tahpa nama palôh pahno nawpa ta, cha panawh ta, cha pasia awpa ta, Abeipa nama Khazohpa ta kô sypalih dua râhchawhpa liata a châ chhipa ei namâ thei thlâh awpa a châ.

³ Chyhsapa he viahchhâ dei ta hroh leipa ta, Abeipa pakah tawhta a puapa bie to ta tlao a hroh tahpa nama pahno thei nawpa ta, cha panawh ei ta, nodipa ta a cha paysa ei. Chatanachata nama pahno beih leipa, châ pathlatuhpazy chhao ta ama pahno beih leipa mânâ ta a cha pasa ei.

⁴ Kô sypalih chhôh nama chysiazy chy leipa ta, nama phei chhao thloh vei.

⁵ Chyhsa ta a sawchapawpa a chhoreipa hawhta, Abeipa nama Khazohpa ta a cha chhorei ei tahpa nama palôh ta pahno thlâh ha mawh sy.

⁶ Chavâta Abeipa nama Khazohpa biepiepazy zyh u la, a lâpi a chhihpa ta, ano cha chi muh vy.

⁷ Abeipa nama Khazohpa ta râh phapa, chavah hluhna nata saikao nata tlâh tawhta tihnawh nata vahtie ti lona râh lâ a châ chhi ei.

⁸ Cha râh cha âtâ nata bâli, kre zôh nata theiku kô, pawmikarânâ nata ôli kôzy nata kheihti yna râh a châ.

⁹ Phahla leipa ta viahchhâ nama nie nawpa râh, khâpa hmah namâ phahla lei nawpa râh châ ta, thuazy alô tlu ta hluh ta, tlâhzy liata dawh nama chao thei nawpa râh a châ.

¹⁰ Nie aw ei chi ta, lôhrâtlôpa ta nama y tita, râh phapa châ pietuhpa Abeipa nama Khazohpa cha reithai muh vy.

Abeipa my lei awpa ta zikyurâna

¹¹ “Abeipa nama Khazohpa biepiepazy, pachianazy nata bieraopazy tanoh ta ei cha piepa ei he nama zyh leipa khiahta cha, Abeipa nama Khazohpa my pathlei aw ei chi ta, chavâta a vaih muh vy.

¹² Chataleipatala niepa ta lôhrâtlôpa ta nama y tita zy, o phapazy sapa ta cha liata na pahrâ tita zy,

¹³ nama viahchao hri nata mietaku zawzy a vaw pôh tita zy, nama tâkâ nata ngôhzy a pôh tita zy, nama hneipa zydua a pôh tita,

¹⁴ nama palôh lai aw ta, Izi râh seichâna o tawhta châ chhi papuatuhpa Abeipa nama Khazohpa nama my pathlei aw.

¹⁵ Ano ta râhchawhpa kawh ngaitapa nata rarôh y ngaitapa, rihhrâh nata râh cha-iazy yna, ti y leina râh chawh karaipa liata châ chhi ei ta, meilô lôpanô tawhta ti a cha papuapa ei.

¹⁶ Châ pathlatuhpazy ta ama pahno beih leipa mânâ ta cha pasa ei ta, a chhâna liata nama pha nawpa ta, cha panawh ei ta, a cha pasia ei.

¹⁷ Chataleipatala nama palôh liata, “Keimo hmotaotheina nata eima ku thatlôna ta he hmozy he eima hnei,” nama tah pathlei aw.

¹⁸ Abeipa nama Khazohpa cha namâ thei thlâh ha awpa a châ. Ano tlai cha nama hneirôh nawpa ta hmotaotheina châ pietuhpa ei châ ta, tanoh ta namâ tyhpa hawhna heta, châ pathlatuhpazy hnohta bie â taihpa a biehrai a pa-ituhpa a châ.

¹⁹ Chavâta Abeipa nama Khazohpa mypa ta, khazoh hropazy zipa ta, chazy cha chakaopa ta namâ chhy khiahta cha, nama leidia tlai aw tahpa tanoh zikyu ei châ râ ei.

²⁰ Abeipa nama Khazohpa ao nama nathlie vei khiahta cha, nama hmiakô liata phopizy a pahleipadiapa hawhta, nâmo chhao nama leidia aw.