RYHPACHANEINA 7 - Mara Bible RV (BSI)

Abeipa chyhsa pathaihpa

¹ “Abeipa nama Khazohpa ta hnei awpa ta nama pangaipa râh a cha tlôkhei ti ei ta, phopi hluhpi, Hiti mo, Kikâsi mo, Amawri mo, Kâna mo, Perizi mo, Hivi mo nata Zebu mozy, nâmo hlâta maluh hluh viapa nata thatlô viapa phopi mia saripazy nama hmiakô tawhta a papua aw ei.

² Abeipa nama Khazohpa ta âmo cha nama ku liata cha piepa ta nama pahnie tita, tlokhuh nama pahleipadia khai awpa a châ. Âmo nata biehrai nama tao awpa châ leipa ta, nama ngiachhie awpa châ hra vei.

³ Âmo nata a hnei pahlao awpa châ leipa ta, ama sawchapawzy châta nama sawchanôzy nama pie awpa châ leipa ta, nama sawchapawzy châta ama sawchanôzy nama hia awpa châ vei.

⁴ Chataleipatala keima pazina tawhta nama sawchapawzy patleisapa ta, Khazoh hropazy chakaosa aw ei ta, nama chô liata Abeipa a pathi iapa ta, thlai a cha pahleipadia pathlei aw ei.

⁵ Hetana heta ama chô liata nama tao aw: Ama maisâhzy pacho aw ei chi ta, ama lôbôzy nama pakei aw. Ama Aseri tôhzy thlu aw ei chi ta, ama khazoh nothlahpazy mei ta nama rao khai aw.

⁶ “Abeipa nama Khazohpa châta phopi pathaihpa nama châ. Abeipa nama Khazohpa ta ano ryu sôhpa châ awpa ta, alei chô liata phopi zydua hry tawhta â tlyhpa nama châ.

⁷ Phopi hropazy hlâta nama hluh viapa vâta Abeipa ta nama chô liata a kyhpachâna palâsa ta a châ tlyhpa ei châ vei. Phopi zydua hry liata phopi chyh chaipa nama châ.

⁸ Abeipa ta kyh cha pachâ ei ta, châ pathlatuhpazy hnohta bie â taihpa a patlô khohpa vâta, Abeipa ta seichâna o tawhta ku thatlôpa ta cha pachha ei ta, Izi bei Phiraoh ku tawhta a cha pachha ei.

⁹ Chavâta Abeipa nama Khazohpa cha Khazohpa a châ tahpa pahno teh u. Ano cha Khazohpa ngâchhihpa châ ta, ano kyhpachâ ta a biepiepa a zyhtuhpazy chô liata a biehrai nata a zawngiahna chhâ sâh kha taihta a paysapa a châ.

¹⁰ Ano a haotuhpazy deikua cha, hmiadaisâ ta viari thô ta, a pahleipadia tyh ei. Ano a haotuhpazy viari thô awpa ta hawh aw vei. Hmiadaisâ ta viari a thô aw ei.

¹¹ Chavâta tanoh ta ei cha piepa biepiepazy, bieraopazy nata pachianazy he zyh u la, tao muh vy.

Reingiahna byhnâ

¹² “Cha pachiana biezy cha nathliepa ta, zyh ei chi ta nama taopa vâta, Abeipa nama Khazohpa ta châ pathlatuhpazy hnohta bie â vaw taihpa a biehrai nata a ngâchhihna nama chô liata a patlôsa aw.

¹³ Nama Khazohpa ta kyh cha pachâ aw ei ta, byhnâ cha pie aw ei ta, maluh a cha papôhsa aw ei. Cha pie awpa ei ta châ pathlatuhpazy hnohta bie â vaw taihpa râh liana cha nama chhi theizy, nama lei theizy, nama sâhzy, nama kresawhtizy nata nama sathawzy byhnâ pie aw ta, nama viahchao nata mietaku zawzy a papôhsa aw.

¹⁴ Phopi hropa zydua hlâta byhnâ pie viapa châ aw ei chi ta, nama hry liata a chanô chapaw ta saw leipa rai y aw veih ei. Nama sahrohzy chhao choh tlâ aw vei.

¹⁵ Abeipa ta hri zydua cha papaipa aw ei ta, Izi râh liata hri nama hmôpa kheihawhpa ta hmah cha pasasa leipa aw ei ta, châ haotuhpa zydua chô liata deikua a patlôsa aw.

¹⁶ Abeipa nama Khazohpa ta nama ku liata a cha pie awpa phopi zydua nama pahleipadia khai awpa a châ. Ngiachhiena mokhaoh ta âmo cha nama moh awpa ei châ leipa ta, ama khazohzy nama chakao awpa châ vei. Cha cha na châta khoheih a châ aw.

¹⁷ “Nama palôh ta, ‘He phopizy he keimo hlâta hluh via tlôh ei ta, kheihta ma eima pho thei aw?’ nama tah thei.

¹⁸ Âmo cha nama chi awpa châ vei. Phiraoh nata Izi râh zydua chô liata Abeipa nama Khazohpa hmotaopa kha a thei thlâh ha teh u.

¹⁹ Nama mo tlai ta pasiana rarôh ypa hmô ei chi ta, ngiana nata hmonoâhpazy taopa ta, ku thatlôpa nata bâh pazawhpa ta Abeipa nama Khazohpa ta a châ kaw chhi papuapa hawhna ei khata, Abeipa nama Khazohpa ta nama chi kawpa phopizy chô liata chhao a tao aw.

²⁰ Cha dei châ vei, Abeipa nama Khazohpa ta ama hry liata kheihpangiah vaw tuah aw ta, nâmo tawhta a nyupa laibâhpa zydua taihta a siesao aw ei.

²¹ Âmo cha nama chi awpa châ vei. Abeipa nama Khazohpa, Khazoh rônahpa nata chichhihpa nama hnohta a y.

²² Abeipa nama Khazohpa ta nama hmia liata phopi a ypazy cha a chyh chyhta ta a cha papuapa aw ei. Thlai ta nama pahleipadia khai awpa ei châ vei. Chataleipatala râhsazy ta ama cha pôh thlu pathlei aw.

²³ Phopizy cha pahleipadiapa ama châ khai hlâlei, Abeipa nama Khazohpa ta nama ku liata pie aw ei ta, thata a patypamâ aw ei.

²⁴ Ama beizy nama ku liata hlâ aw ta, avâ ry liata ama moh y khao lei awpa ta tao aw ei chi ta, nama pahleipadia khai hlâlei cha, châ pakhâ theipa pakha hmah y aw veih ei.

²⁵ Ama khazoh nothlahpazy mei ta rao aw ei chi ta, cha liata a ypa tâkâ tlyma, ngôh tlyma, nama uahva awpa châ leipa ta, nama châta namâ la awpa châ hra vei. Chataleipatala khazoh nothlahpazy liata namâ ao pathlei aw, khazoh nothlahpa cha Abeipa nama Khazohpa châta pasichhihpa châ tlôh ta.

²⁶ Na o chhôh liata hmo pasichhihpa nâ ngiakhei awpa châ vei. Chataleipatala nâ chhao, cha hmo hawhta pahleipadiapa na châ aw. Cha cha chhiesapa hmo a châpa vâta na pasi kaw awpa châ ta, nâ hao ngaita awpa a châ.