RYHPACHANEINA 6 - Mara Bible RV (BSI)

Biepie rônahpa

¹ “He he Abeipa nama Khazohpa ta nâmo pachu awpa ta bie eina piepa, hnei awpa ta nama kei tlô awpa râh liata nama zyh awpa biepiepazy, bieraopazy nata pachianazy a châ:

² Chatanachata Abeipa nama Khazohpa cha chipa ta, a bieraopa nata a biepiepa ei cha piepazy he nama hro chhôh zydua ta zyh aw ei chi ta, nama hro a pareih aw.

³ Chavâta Hy Izarei, nathlie la, pakhâta ta zyh mah y. Chatanachata Abeipa, châ pathlatuhpazy Khazohpa ta bie a châ taihpa sâhpiti nata kheihti lona râh liata thlaochhipa ta y aw ei chi ta, thata nama pôh aw.

⁴ “Hy Izarei, nathlie teh. Abeipa cha eima Khazohpa châ ta, Abeipa cha pakha deita a y.

⁵ Abeipa nama Khazohpa cha nama pathipalôh tlokhuh ta, nama thlahpa tlokhuh ta, nama thatlôna tlokhuh ta kyh nama pachâ awpa a châ.

⁶ Tanoh ta bie ei cha piepazy ei he, nama palôh liata y thlâh ha mawh sy.

⁷ Nama sawzy phahnai khoh ngaitapa ta pachu aw ei chi ta, nama o liata namâ tyu nota zy, lâpi liata nama sie nota zy, namâ zia nota zy, nama thyu daihti zy liata nama reih tyh aw.

⁸ Ngiana châta nama ku liata chahry aw ei chi ta, khiriena ta nama mo nata mo likawh liata nama rie aw.

⁹ Nama ochhi tôhzy nata nama kaohraizy liata chhao nama roh awpa a châ.

Reingiah leina kyh zikyurâna

¹⁰ “Abeipa nama Khazohpa ta châ pathlatuhpa Abarahâ, Aisika nata Zakaw hnohta pie awpa ta bie â vaw taihpa râh, nama padua leipa khihpi rônahpa nata phapazy,

¹¹ nama pabie leipa hmo phapa to ta a biepa ozy, nama chao leipa tikhaohzy, nama lo leipa kre sadôzy nata ôli thozy yna râh lâ a châ chhi ti ei ta, nie aw chi ta lôhrâtlôpa ta nama y tita,

¹² a chado kaw muh vy. Chataleipatala Izi râh, seichâna o tawhta châ chhi papuatuhpa Abeipa nama my pathlei aw na.

¹³ Abeipa nama Khazohpa cha chi aw chi ta, ano deita chakao aw chi ta, ano moh reipa ta bie namâ taih awpa a châ.

¹⁴ Khazoh hropa, nama chheipâh liata a ypa chihropa khazohzy namâ chhy awpa châ vei.

¹⁵ Nama hnohta a ypa Abeipa nama Khazohpa cha hiatlia pasapa Khazohpa a châ. Nama chô liata Abeipa nama Khazohpa a pathi ia aw ta, alei chô tawhta a cha pahleipadia pathlei aw ei.

¹⁶ “Mâsâ liata nama pasiapa hawhna khata Abeipa nama Khazohpa cha nama pasia awpa châ vei.

¹⁷ Abeipa nama Khazohpa ta nama hnohta a cha piepa biepiepazy, a biepahnosapazy nata a bieraopazy pakhâta ta nama zyh awpa a châ.

¹⁸ Thlaochhipa ta nama y thei nawpa nata Abeipa ta châ pathlatuhpazy hnohta bie â vaw taihpa râh phapa lâ siepa ta nama hnei thei nawpa ta, Abeipa mohmô ta hmo dopa nata hmo phapa nama tao awpa a châ.

¹⁹ Abeipa ta a reipa hawhta, nama chariahpa zydua nama hmiakô tawhta nama papua khai awpa a châ.

²⁰ “Noh hro ta nama sawzy ta, ‘Abeipa eima Khazohpa ta bie a cha piepa ei, pahnokheinazy, bieraopazy, pachianazy cha khâpa ma a yzie?’ tahpa ta ama cha hiahri tita,

²¹ nama sawzy hnohta, ‘Izi râh liata Phiraoh sei ta y pi ta, Abeipa ta Izi râh tawhta ku thatlôpa ta miah â kaw chhi papua.

²² Abeipa ta ngiana nata hmonoâhpa rônahpa nata nôpochhih ngaitapazy Izi râh nata Phiraoh nata a chhôhkha zydua chô liata eima mohmô ta palâsa ta.

²³ Keimo deikua cha miah pathlatuhpazy hnohta bie â vaw taihpa râh lâ miah a chhipa ta, cha râh cha miah pie awpa ta Izi râh tawhta miah â kaw chhi papua.

²⁴ Thlaochhipa ta khâ ypa ta, tanoh hawhna heta eima hrona miah a pahlôh lymâ thei nawpa ta, Abeipa eima Khazohpa cha chipa ta, he bieraopa zydua he tao awpa ta Abeipa ta bie miah a pie.

²⁵ Bie miah a piepa hawhta, biepiepa zydua he Abeipa eima Khazohpa hmiakô liata pakhâta ta eima tao khiahta cha, eima châta siana a châ aw’ tahpa ta nama chho aw.