RYHPACHANEINA 5 - Mara Bible RV (BSI)

Biepiepa Miahrawh

¹ Mawsi ta Izarei saw zydua awpakhy ta ama hnohta, “Hy Izarei, tanoh nama nah theina liata ei reipa bieraopazy nata pachianazy he nathlie u la, a chu u la, pakhâta ta zyh teh u.

² Abeipa eima Khazohpa ta Hôribâ liata eima hnohta bie hraih ta.

³ Cha biehrai cha Abeipa ta miah pathlatuhpazy hnohta vaw tao leipa ta, keimo sahlao, tanoh ahrohpa zydua hnohta a taopa a châ.

⁴ Abeipa ta tlâh liata mei hry tawhta hmiachhypa ta bie châ chho ei ta.

⁵ Cha nota, nâmo cha mei vâta chi ei chi ta, tlâh lâ namâ khy ngâh leipa vâta, Abeipa nata nâmo likawh liata a duah na ta, nama hnohta Abeipa bie ei phuahpa kha a châ. Abeipa ta hetana heta a tah.

⁶ “Kei he Abeipa na Khazohpa, Izi râh, seichâna o tawhta châ chhi papuatuhpa ei châ.

⁷ “Keima leipa ta khazoh hropazy na hnei awpa châ vei.

⁸ “Na châta nothlahpa khazoh na tao awpa châ vei. Chô lâ avâ liata a ypa a lyupa tlyma, ry lâ alei liata a ypa a lyupa tlyma, alei ry lâta ti liata a ypa a lyupa tlyma, kheihawhpa nothlahpa khazoh hmah na châta na tao awpa châ vei.

⁹ Chazy cha nâ chhy awpa châ leipa ta, na chakao awpa châ vei. Kei Abeipa na Khazohpa he Khazoh hiatlia pasapa châ na ta, pawzy paraona vâta sawzy a hrie tyhpa ei châ. Nâ haotuhpazy cha chhâ thôhna nata chhâ palihna taihta a hrie tyhpa châ na ta,

¹⁰ kyh na pachâ ta, ei biepiepazy a zyhtuhpa sâh hluhpizy chô liata deikua cha, ngiachhiena a palâsa tyhpa ei châ.

¹¹ “Abeipa na Khazohpa moh na reih thlâhthli awpa châ vei. Abeipa ta a moh a reih thlâhthlipa cha thailei a pachâsa aw.

¹² “Abeipa na Khazohpa ta bie a cha piepa hawhta, Pahânoh pathaisa aw chi ta, na chay awpa a châ.

¹³ Noh charu chhôh rai hria aw chi ta, na rai zydua na hria aw.

¹⁴ A noh sarina noh deikua cha, Abeipa na Khazohpa châta Pahânoh a châ. Cha noh liata cha khâpa rai hmah na hria awpa châ vei. Nâ chhao, na sawchapaw chhao, na sawchanô chhao, na seichapaw chhao, na seichanô chhao, na viahchao tôhpa chhao, na alâ chhao, na sahroh zydua nata na o liata chihropa a ypa zydua ta rai nama hria awpa châ vei. Nâ hawhta, na seichapawzy nata na seichanôzy chhao Pahânoh liata cha amâ pahâ khai aw.

¹⁵ Nâ chhao Izi râh liata sei châ chi ta, cha tawhtapa cha Abeipa na Khazohpa ta ku thatlôpa nata bâh pazawhpa ta a châ chhi papua tahpa a thei thlâh ha mah y. Chavâta Abeipa na Khazohpa ta Pahânoh chay awpa ta bie a cha pie.

¹⁶ “Abeipa na Khazohpa ta bie a cha piepa hawhta, na nô nata na paw palyupalih teh. Chatanachata Abeipa ta râh a cha piepa liata vânoh to aw chi ta, na hro a pareih aw.

¹⁷ “Liany na chei awpa châ vei.

¹⁸ “Nâ phei awpa châ vei.

¹⁹ “Na paru awpa châ vei.

²⁰ “Haipa ta na vaih na leih awpa châ vei.

²¹ “Na vaih lapinô na uahva awpa châ vei. Na vaih o na uahva awpa châ leipa ta, a lyu tlyma, a seichapaw tlyma, a seichanô tlyma, a viahchao tôhpa tlyma, a alâ tlyma, na vaih hmo kheihawhpa rai na uahva awpa châ vei.

²² “Cha biezy cha Abeipa ta tlâh liata mei nata meihdo nata zoh kaluhpa hry tawhta ao paro ngaitapa ta nama zawpi pôhpakhypa zydua hnohta reih ta, baichha khao vei. Cha biezy cha lô phiapa miano liata roh ta, ei hnohta eina pie.

Zawpi ta ama chi

²³ “Mei ta tlâh a kâ hai nota, zohna hry tawhta ao nama theipa nahta, nama chi luhpa zydua nata nama machâ zydua nâ vaw hnia ei chi ta,

²⁴ ‘Abeipa eima Khazohpa ta a rônahzie nata a zachhihzie miah pahmôsa ta, mei hry tawhta a ao eima thei. Khazohpa ta chyhsapa bie a chho ta, a hroh thlâh hapa tanoh eima hmô haw.

²⁵ Chavâta khazia eima thi aw? Abeipa eima Khazohpa ao eima thei heih khiahta deikua cha, he mei chahra ngaitapa heta miah kâsao aw ta eima thi aw.

²⁶ Keimo ta mei hry tawhta Khazohpa hrohpa bie reipa ao eima theipa hawhta thei ta, châhrasala a hrohpa chyhsa zydua hry liata ahy ma a y?

²⁷ Chavâta nâ ta a kei hnia la, Abeipa eima Khazohpa ta a rei awpa zydua nathlie mah y. Chatanachata Abeipa eima Khazohpa ta na hnohta a reipa zydua miah chho aw chi ta, nathlie aw pi ta, eima tao aw,’ nama tah.

²⁸ “Ei hnohta bie nama reipa cha Abeipa ta thei ta. Abeipa ta ei hnohta, ‘Kha phopi ta na hnohta bie ama reipa thei na ta, ama reipa zydua a pha.

²⁹ Aw, he hawhpa palôh he khâ ama phaoh tyh mawh sala, na chipa ta, ei biepiepazy zyh aw ei ta, âmo nata ama pathlazy chhâzaw ta thlaochhipa ta ama y awpa tlai!

³⁰ Vawh la, ama hnohta, “Nama poh ozy lâ a di teh u,” kei tah teh.

³¹ Nâ deikua cha ei kiapâh liata a duah la, hnei awpa ta râh ei piepa liata tao awpa na pachu awpa biepiepa, bieraopa nata pachiana zydua ei cha chho aw,’ tah ta.

³² Chavâta Abeipa nama Khazohpa ta bie a cha piepa hawh ei ta pakhâta ta tao u la, chachâh lâ tlyma, chavei lâ tlyma, nama tlei awpa châ vei.

³³ Abeipa nama Khazohpa lâpi a chhih aw ei chi ta, a biepiepa zydua nama zyh awpa a châ. Chatanachata hroh aw ei chi ta, nama châta pha aw ta, nama hnei awpa râh liata thlaochhipa ta y aw ei chi ta, nama hro a pareih aw.