RYHPACHANEINA 4 - Mara Bible RV (BSI)

Reingiah awpa ta biepiepa

¹ “Chavâta, Hy Izarei, bieraopa nata pachiana ei cha pachupazy ei he nathliepa ta, nama hroh thei nawpa ta zyh u la, Abeipa, châ pathlatuhpazy Khazohpa ta râh a cha piepa lâ sie u la, kei pahrâ teh u.

² Bie ei cha piepa ei kha baichha leipa u la, thy bâ hra leipa u la, Abeipa nama Khazohpa biepiepa nama hnohta ei cha pie pachhuahpazy he zyh muh vy.

³ Bâlâpeô liata Abeipa hmotaopa kha nama mo ta hmô ta, Bâlâpeô a pazipa zydua Abeipa nama Khazohpa ta nama hry tawhta a pahleipadia khai hapa chhao nama hmô.

⁴ Abeipa nama Khazohpa khâchâ a patu hapazy deikua cha, tanoh taihta nama hroh hih.

⁵ Moh teh u, hnei awpa ta namâ ngia haina râh liata nama zyh awpa ta Abeipa ei Khazohpa ta bie eina piepa hawhta, bieraopazy nata pachianazy ei cha pachu ei hih.

⁶ Chavâta zyh u la, tao muh vy. Cha cha phopizy mohmô ta nama sona nata novâhna a châ aw. Chatanachata bieraopa zydua cha ama thei tita, “He phopi rônahpa he phopi sopa nata novâhpa tlai na ama châ,” ama tah aw.

⁷ Eima padona maih miah a hnia tyhpa Abeipa eima Khazohpa hawhta a hnia tyhpa khazoh a hnei hrapa phopi rônahpa khei hawhpa ma a y?

⁸ He tlu ta adopa ryhpa tanoh nama hmiakô liata ei sopa zydua hawhpa bieraopa nata pachiana a hnei hrapa kheihawhpa phopi rônahpa ma a y?

Hôribâ liata hmo tlôpa atheithlâhna

⁹ “Chavâta a sohsi u la, nama hro pakhâta ta a vao muh vy. Chataleipatala nama mo ta hmo a hmôpazy kha my aw ei chi ta, nama hro chhôh zydua ta nama palôh tawhta a lei pathlei aw. Chazy cha nama sawzy nata nama samohzy pachu tyh muh vy.

¹⁰ Hôribâ liata Abeipa nama Khazohpa hmiakô liata namâ dua noh kha a thei thlâh ha teh u. Abeipa ta ei hnohta, ‘Zawpizy ei hmiakô liata awpakhy teh. Ei biezy ei pahnosa aw ei. Chatanachata alei chô liata ama hro chhôh zydua ta na chi awpa ta a chu aw ei ta, ama sawzy chhao ama pachu pachhuah thei aw,’ tah ta.

¹¹ A vaw hnia ei chi ta, tlâh thaby liata a vaw duah ei chi ta, tlâh cha mei ta kâ ta, a meipaleih avâ liahmari taih tlô ta. Meihdo vyhpa nata zoh kaluhpa ta tlâh cha pahly ta.

¹² Abeipa ta mei tawhta nama hnohta bie vaw reih ta, a bie reipa ao thei ei chi ta, châhrasala a pôhpa hmô veih ei chi. A ao deita nama thei.

¹³ Nama hnohta a biehrai phuah ta, zyh awpa ta bie a cha pie ei. Cha cha Biepiepa Miahrawh châ ta, Abeipa ta lôphia miano liata a ropa a châ.

¹⁴ Cha daihti liata, hnei awpa ta nama pangaipa râh liata nama tao awpa bieraopa nata pachianazy cha pachu awpa ei ta, Abeipa ta bie eina pie.

Nothlahpa a chhy pakhâna

¹⁵ “Chavâta pakhâta ta a vaih teh u. Hôribâ liata Abeipa ta mei tawhta nama hnohta bie a rei noh kha, a pôhpa hmô veih ei chi.

¹⁶ Chavâta namâ chhy awpa nothlahpa taopa ta nama molei tlamaw lei nawpa ta a vaih teh u. Kheihawhpa nothlahpa rai, chapaw a lyupa tlyma, chanô a lyupa tlyma,

¹⁷ alei liata sa a lyupa tlyma, avâ liata a zawpa mathlaw hneipa pavaw a lyupa tlyma,

¹⁸ alei liata a lyhpa a lyupa tlyma, alei ry lâta ti liata a ypa nga a lyupa tlyma, nama tao awpa châ vei.

¹⁹ Abeipa nama Khazohpa ta avâ ry liata chyhsa zydua châta a taopa noh, thlâpâ, awhsizy nata avâ liata a ypa zydua nama hmô tita, avâ lâ uapa ta, chazy chata nama palôh cha sy ei sala, namâ chhy pathlei lei nawpa ta a vaih teh u.

²⁰ Tanoh nama châna hawhna heta, Abeipa ta a ryuto phopi châ awpa ta, Izi râh tawhta, thua patisana mei tawhta cha la papua ei ta, a châ kaw chhi papuapa ei kha a thei thlâh ha muh vy.

²¹ Cha dei châ vei, nâmo vâta Abeipa cha ei chô liata a pathi ia ta, Zawdâh chaka lei awpa nata Abeipa nama Khazohpa ta ryuto châta râh phapa a cha piepa ei a ngia lei awpa ta bie eina hraikhâh haw.

²² Kei cha he râh liata thi aw na ta, Zawdâh chaka aw va na. Nâmo deikua chaka aw ei chi ta, râh phapa cha nama kei hnei aw.

²³ A vaih teh u, chataleipatala Abeipa nama Khazohpa ta nama hnohta bie a hraipa mypa ta, nothlahpazy taopa ta, Abeipa nama Khazohpa ta kheihawhpa a lyupa nothlahpa hmah tao lei awpa ta a pakhâpa nama tao pathlei aw.

²⁴ Abeipa nama Khazohpa cha a kâ patlô theipa mei châ ta, hiatlia a pasapa Khazohpa châ tlôh ta.

²⁵ “Saw nata samohzy hneipa ta, cha râh liata bohpi nama y tawhta, moleina hmo taopa ta, nothlahpa kheihawhpa rai taopa ta, Abeipa nama Khazohpa mohmô ta hmo paraopa ta, a hie nama pahâh khiahta cha,

²⁶ nâmo pazei nawpa ta pahnokheituhpa châta avâ nata alei tanoh ei aw ei. Zawdâh chakapa ta nama kei hnei awpa râh tawhta thlai leidia aw ei chi ta, cha râh liata hroh pareih leipa aw ei chi ta, pahleipadia khaipa nama châ aw.

²⁷ Abeipa ta phopizy hry liata cha papai aw ei ta, Abeipa ta a cha papaina phopizy hry liata a chyhta dei pahlôhpa nama châ aw.

²⁸ Cha liata chyhsapa ku ta taopa tho nata lô khazoh, a hmô thei leipa, a thei thei leipa, a nie thei leipa, roh theina chhao a hnei leipa nama chakao aw.

²⁹ Châhrasala cha tawhna chata Abeipa nama Khazohpa cha tlua u la, nama pathipalôh tlokhuh ta nata nama thlahpa tlokhuh ta nama tlua khiahta cha, nama hmô heih aw.

³⁰ Rietheina a tyhpa ta, cha hmo zydua cha nama chô liata a vaw tlô tita, a chhâna liata cha Abeipa nama Khazohpa lâ kua heih aw ei chi ta, a ao nama nathlie aw.

³¹ Abeipa nama Khazohpa cha zawngiah theipa Khazohpa a châ. Cha pathlua leipa aw ei ta, cha pahleipadia hra leipa aw ei ta, châ pathlatuhpazy hnohta bie â taihpa a biehrai my aw vei.

Abeipa deita Khazohpa a châ

³² “Nama y hlâta hlâno daihtizy kha hiahri u la, avâ chhâna hiakha lâ tawhta hiakha lâ chhâna taih hiahri tua u. Khazohpa ta alei chô liata chyhsapa a tao noh tawhta, he hawhpa hmo rônahpa he a y beih ma, theipa a châ beih ma?

³³ Mei hry tawhta bie a reihpa Khazohpa ao thei ei chi ta, nama hroh thlâh hapa hawhna heta, Khazohpa ao thei ta a hroh thlâh hapa phopi hropa ama y ma?

³⁴ Abeipa nama Khazohpa ta Izi râh liata nama mohmô lia tlai ta nama châta a taopa hawhna khata, pasiana ta zy, ngiana ta zy, hmonoâhpa ta zy, adyuhna ta zy, ku thatlôpa ta zy, bâh pazawhpa ta zy, hmo chichhih ngaitapa taopa zy ta, phopi miakha tawhta phopi miakha la papuapa ta, ano phopi a paduapa khazoh a y beih ma?

³⁵ Nâmo hnohta deikua cha, Abeipa cha Khazohpa châ ta, ano leipa ta Khazoh hropa rai y veih ei tahpa palâhâhpa a châ.

³⁶ A cha pachu thei nawpa ei ta, avâ tawhta a ao cha patheisa ei ta, alei chô liata ano mei rônahpa cha pahmôsapa ta, mei hry tawhta a bie nama thei.

³⁷ Châ pathlatuhpazy kyh a pachâpa vâta, âmo hnôh lâta ama pathlazy a tlyh ta, a ypâna nata a hmotaotheina rônahpa ta Izi râh tawhta a châ chhi papua ei.

³⁸ Nâmo hlâta phopi lai viapa nata thatlô viapazy nama hmia kô liata papua ta, tanoh nama hmôpa hawhna heta, ama râh cha nama ryuto châta cha pie awpa ta a châ kaw chhi ei.

³⁹ Chavâta tanoh he Abeipa cha chô lâ avâ liata nata ry lâ alei liata Khazohpa châ ta, Khazoh hropa rai y veih ei, tahpa nama pathipalôh liata khâchâ a vao teh u.

⁴⁰ Chavâta a bieraopa nata a biepiepa tanoh ta ei cha piepazy ei he nama zyh awpa a châ. Chatanachata nâmo nata nama pathlazy châta pha aw ta, Abeipa nama Khazohpa ta chhâzaw châta râh a cha piepa lia ei ta nama hro a pareih aw,” tah ta.

Zawdâh nochhi lâta abohna khihpizy

⁴¹ Chatawhcha Mawsi ta Zawdâh nochhi lâta khihpi miathôh a tlyh ta.

⁴² Chazy cha daihti khô chiehpa liata â khakhai leipa opapa a thie pathleipa a râ nawpa châta a châ. Cha khihpi miakha lâ lilaw a râ aw ta, a hrona a pabohsa aw.

⁴³ Râhchawhpa tlâh by liata Beze khihpi cha Rubena pathlazy châta châ aw ta, Kâdâ pathlazy châta Kilia liata Ramô khihpi châ aw ta, Bâsanâ liata Kôlâ khihpi cha Manase chizy châta a châ aw.

Ryhpa chaneina biehmia

⁴⁴ He he Mawsi ta Izarei sawzy a piepa ryhpa a châ.

⁴⁵ Hezy he Izi râh tawhta ama kaw pua nota, Mawsi ta Izarei sawzy hnohta a reipa pahnosanazy, bieraopazy nata pachianazy a châ.

⁴⁶ Izi râh tawhta ama kaw pua nota, Mawsi nata Izarei sawzy ta ama thiepa, Hesbaw liata a ypa Amawri bei Sihaw râh liata Bepeô dady Zawdâh nochhi lâ liata a reipa biezy a châ.

⁴⁷ Zawdâh nochhi lâta a pahrâpa Amawri bei pano, Sihaw nata Bâsanâ bei Ôkâ râhzy cha hnei ei ta,

⁴⁸ Anaw saikao chhâna Arôerâ tawhta Siriô Tlâh taihta ama hnei. Siriô Tlâh cha Hâmaw Tlâh tahpa a châ hra.

⁴⁹ Zawdâh nochhi lâta Arabâ râh zydua cha, Piskâ tlâh baikhaihpa ry liata Arabâ Tilaipi tlôna taihta ama hnei khai haw.