RYHPACHANEINA 34 - Mara Bible RV (BSI)

Mawsi thina

¹ Mawsi cha Môabâ bypi tawhta Zerikô dady Nebô Tlâh liata Piskâ tlâh laki lâ khy ta. Abeipa ta râh zydua pamosa ta, Kilia tawhta Dânâ taih,

² Nâthalai râh zydua, Epharai nata Manase râhzy, Zudâh râh zydua Notla Tilaipi taih;

³ Neke nata Bypi tawhta Zawâ taih pamosa ta. Bypi cha thiahrâ khihpi Zerikô saikao a châ.

⁴ Abeipa ta a hnohta, “He râh he, Abarahâ, Aisika nata Zakaw hnohta, ‘Na pathlazy ei pie aw ei,’ tahpa ta bie ei taihpa râh kha a châ. Na mo ta cha pahmôsa na ta, châhrasala a ngia aw va chi,” tah ta.

⁵ Chatanachata Abeipa chakaotuhpa Mawsi cha Abeipa bie hawhta Môabâ râh liata thi ta,

⁶ Bepeô dady Môabâ râh saikao liata ama pabu. Châhrasala a thlâ yna cha ahy hmahta tanoh taihta pahno veih ei.

⁷ Mawsi cha a thi nota kô 120 uhtheipa a châ. A mo zoh leipa ta, a tha tleih vei.

⁸ Izarei sawzy ta Mawsi cha Môabâ bypi liata noh sythôh chakhei ei ta. Mawsi chakheipa ta ama mâchhiesana nohzy cha chhâ ta.

⁹ Nunâ sawchapawpa Zawsua cha, Mawsi ta a chô liata a ku a pahniehpa vâta, sona thlahpa ta bie ta. Chavâta Izarei sawzy ta a bie nathlie ei ta, Abeipa ta Mawsi bie a piepa hawhta ama tao lymâ.

¹⁰ Cha khai tawhta cha Izarei hry liata Mawsi hawhta Abeipa ta hmiachhy ta a pahnopa hrohsopa y khao veih ei.

¹¹ Abeipa ta Izi râh liata nata Phiraoh nata a chakaotuhpa zydua nata a râh zydua chô liata ngiana nata hmonoâhpazy a pataosapa hawhpa kha ano hawhta a tao theipa y veih ei.

¹² Mawsi ta ku thatlôpa nata chichhihpa ta Izarei zydua mohmô liata a taopa hawhta a tao theipa y hra veih ei.