RYHPACHANEINA 33 - Mara Bible RV (BSI)

Izarei châta Mawsi byhnâ awna

¹ He byhnâ awnazy he Khazohpa chyhsa Mawsi ta a thi hlâta Izarei sawzy châta byhnâ a awna a châ.

² Hetana heta byhnâ a awpa ei: “Sinai tawhta Abeipa a vy ta, Seirâ tawhta noh hawhta vaw chhipa ta, Pârâ Tlâh tawhta a vaw khaih; Mopathaihpa thysâh hry tawhta a vy ta, A ku chachâh lâta mei paleih â chaba.

³ A châ na, a phopi kyhpachâ kaw ta, A mopathaihpa zydua a ku liata ama y. Na pheihniezy cha pazi ei ta, Na biepiepazy ama zyh tyh.

⁴ Mawsi ta ryhpa miah pie ta, Zakaw pathlazy ryuto châta miah a pie.

⁵ Phopi hyutuhpazy amâ hmaoh nota, Izarei chi zydua hmaohkha ta ama y nota, Abeipa cha Zesuruh liata bei ta a y.

⁶ “Rubena cha hroh sala, Thi khah sy; A pathla maluh deikua, Chyh mawh sy.”

⁷ Zudâh châta byhnâ awna: “Hy Abeipa, Zudâh ao nathlie la, A phopi lâ a chhi mah y. Nâma ku ta a chariahzy a dyuhpa la, Ano baotuhpa châ mah y.”

⁸ Livai châta byhnâ awna: “Livai hnohta na Thumi pie la, Na mopathaihpa hnohta na Uri pie mah y. Ano cha Mâsâ liata pasia chi ta, Meribâ tizy liata na pahao.

⁹ Na bie a ngiah ta, Na biehrai a zyhpa vâta, A nô nata a paw kyh liata, ‘Pachâ veih ei na’ tah ta; A unawhzy pahno leipa ta, A sawzy tlai chhao uasa vei.

¹⁰ Na bieraopazy Zakaw pachu aw ei ta, Na ryhpa biezy Izarei ama pachu aw; Na hmiakô liata ropahâhpa soh aw ei ta, Na maisâh liata raopa hlânazy ama hlâ aw.

¹¹ Hy Abeipa, a sôh nata piah byhnâ pie la, A ku raihria a pyh mah y; A khakhaipazy chai chhawh la, Ama thyu khao lei nawpa ta, Ano a haotuhpazy chai chhawh mah y.”

¹² Benzami châta byhnâ awna: “Abeipa kho ngaitapa cha, A hnohta â bohpa ta pahrâ mawh sy; Abeipa ta noh y ta vaih sala, A ngiatlâhzy likawh liata pahrâ mawh sy.”

¹³ Zawsi châta byhnâ awna: “Abeipa ta a râh byhnâ pie sala, Avâ hmo sôhpa diati patlasa sala, Alei ry lâta ti athupazy pie mawh sy.

¹⁴ Noh thei sôhpazy pie sala, Thla kôvei phazy pie mawh sy.

¹⁵ Tlâhpi hlôpazy liata hmo pha chaipazy pua sala, Tlâhthlôh zôpazy liata hmo sôh chaipazy pua mawh sy.

¹⁶ Alei hneirôna byhnâzy â kipa ta to sala, Chhobuh liata a pahrâpa khokheina to mawh sy. Cha byhnâzy cha Zawsi luh chô liata y sala, A unawhzy hry liata luh chaipa laki liata y mawh sy.

¹⁷ Zawsi cha viahchao pataw tuapa tôhpa hawhta rônah ta, A kizy chaoliah tôhpa ki hawhta a châ; A ki ta phopizy tôh aw ta, Ama zydua ta alei chhâna taih a tôh pathlah aw ei. Âmo cha Epharai thy hluhpi châ ei ta, Manase sâh hluhpizy ama châ.”

¹⁸ Zebulawna châta byhnâ awna: “Zebulawna y, na siena maih lia a ly la, Iskâra y, na poh ozy liata a ly mah y.

¹⁹ Tilaipi hneirônazy thaoh ei ta, Raphyu liata ryu a pabupazy ama thaopa vâta, Phopizy ama tlâhpi lâ a vy awpa ta hrua aw ei ta, Cha liata atheihna dopazy ama hlâ aw.”

²⁰ Kâdâ châta byhnâ awna: “Kâdâ râh a pakawhtuhpa cha, Reithaipa ta y mawh sy! Kâdâ cha chakeibarôhneipa hawhta a byu ta, Bâh nata luhzy a hriechheihpa a châ.

²¹ Hyutuhpa tovyuh pahlôhpa a châpa vâta, Râh pha chaipa ano châta a tlyh ta; Phopi chhituhpazy ano lâ a vy ei ta, Abeipa adona ta bie pachia ta, Izarei châta a bieraopazy hawhta a pachia.”

²² Dânâ châta byhnâ awna: “Dânâ cha chakeibarôhneipa lochopa châ ta, Bâsanâ tawhta a vaw zawpa a châ.”

²³ Nâthalai châta byhnâ awna: “Hy Nâthalai, khokheina vâta lôhrâtlôpa ta y chi ta, Abeipa byhnâ to a topa na châ; Notla râhzy pahrâ la, Chho râhzy pahrâ mah y.”

²⁴ Asera châta byhnâ awna: “Asera cha sawchapawzy hry liata byhnâ to chai sala, A unawhzy khokheina hlaopa ta, Sathaw liata a phei ny mawh sy.

²⁵ Na thokhy chhikao hrainazy cha, Thua nata dawh châ sala; Na hro chhôh zydua ta Thatlôpa ta y mah y.”

²⁶ “Hy Zesuruh, Khazohpa hawhpa he ahy hmah y veih ei; Ano cha cha bao awpa ta avâzy chô liata kiah ta, A rônahpa ta avâpi chô a kiahpa a châ.

²⁷ Tlyzaw Khazohpa cha na pahrâna châ ta, A ry lâta chhâzaw bâhzy a y; Na hmiakô tawhta chariahpa papua ta, ‘Pahleipadia teh u,’ a tahtuhpa a châ.

²⁸ Chatanachata Izarei cha, Sâh nata kresawhti râh liata â bohpa ta ypa ta, Avâzy ta diati ama patlasana liata â bohpa ta y ta, Zakaw pahrâna cha thlalôhpa ta a y.

²⁹ “Hy Izarei, na nohlao ngaita na! Nâ hawhta Abeipa ta a pachhapa phopi he ahy ma a y? Abeipa cha na châta baona vyhphao châ ta, Na pahniena zaozi a châ. Châ ngiarih awpa ta na chariahzy nâ lâ a vy aw ei ta, Ama ky lia na phei ta na tly aw ei.”