RYHPACHANEINA 32 - Mara Bible RV (BSI)

Mawsi hla

¹ “Hy avâzy saih u, Nah pachôh teh u, Bie ei reih aw; Ei pakah tawhta biezy he Alei ta thei mawh sy.

² Ei pachuna avâ hawhta suah sala, Ei bie diati hawhta tla mawh sy; Si panyupa chô liata avâ di hawhta tla sala, Sihnapa chô liata avâ hawhta suah mawh sy.

³ Abeipa moh ei phuah aw, Eima Khazohpa cha rônahna patosa teh u!

⁴ “Lôpanô cha a hmotaopazy siapaki ta, A lâpi zydua â do. Ano cha Khazohpa ngâchhihpa châ ta, Paraona hnei leipa ta, Asiapa nata adopa a châ.

⁵ A chô liata molei ei ta, Ama moleina vâta, A sawzy châ khao veih ei; Chhâ haiphiahpa châ ei ta, Chhâ moleipa ama châ.

⁶ Hy nâmo, ahrupa nata angâpa phopi, Cha hawhta ma Abeipa cha viari nama thô? Ano cha châ taotuhpa nama paw châ ta, Cha tao ei ta nâmo châ paduatuhpa châ vei ma?

⁷ Hlâno daihti liata nohzy kha a thei u la, Chhâ hluhpi liata kôzy kha pachâ tua u; Nama pawzy hiahri u la, Ama cha pahmô aw; Machâzy hiahri u la, Ama cha chho aw.

⁸ Chônôchaipa ta phopizy ama ryuto râh pie ta, Âdâh pathlazy a pachhaih nona khata, Khazohpa sawchapawzy maluh hawhta, Phopizy châta râhri a pakhâh.

⁹ Abeipa tovyuh deikua cha a phopi châ ta, Zakaw cha a ryuto a châ.

¹⁰ “Abeipa ta Zakaw cha râhchawhpa liata hmô ta, Râh chhiepa nata râh raohpa liata a hmô. Ano cha chahlôchaeipa ta mohôh ta, A mosaw hawh tlai ta a khâsia.

¹¹ Pahmôhpi ta a taw a pazawsa tita, A taw chô lâta heih laih ta, A mathlaw pakai khâhpa ta a tla awpa pakhâ ta, A tla awpa nota a mathlaw ta a phaopa hawhta,

¹² Abeipa tlai ta Zakaw cha a chhi ta, Râh hropa khazoh a hnohta y beih veih ei.

¹³ Lei su sâhpazy chô liata patyusa ta, Lyu kôveizy a paniesa tyh; Lôpanô tawhta kheihti ta chyh ta, Lôsohpa tawhta sathaw ta a chyh.

¹⁴ Viahchao hri sâhpiti kuapa ta cha pasa ta, Mietaku zaw sâhpiti ta a cha pasa; Mietakutaw thaw ta cha pasa ta, Bâsanâ mietaku tôhpa thaw ta cha pasapa ta, Mie thaw ta a cha pasa. Sâh pahâh chaipazy cha paniesa ta, Kre thisaih pathaihpa na doh tyh.

¹⁵ “Zesuruh cha vaw thawh ta â chapie. Vaw thawhpa ta, Vaw pahly chi ta, Na mithawh kaw. Châhrasala ano taotuhpa Khazohpa a heihsai ta, A pachhana lôpanô khâpasaw ta reih khao vei.

¹⁶ Chihropa khazohzy ta a hia patliasa ei ta, Pasichhihpazy taopa ta a hie ama pahâh.

¹⁷ Khazoh a châ leipa ahripazy lâta atheihna hlâ ei ta, Ama pahno beih leipa khazoh, Atlia ta a vaw ypa khazoh thiehpa, Pathlatuhpazy ta ama chi beih leipa Khazohzy lâta atheihna ama hlâ tyh.

¹⁸ Châ satuhpa Lôpanô pachâ khao leipa ei chi ta, Châ taotuhpa Khazohpa nama my haw.

¹⁹ Cha cha Abeipa ta hmô ta â hao kaw, A sawchapawzy ta a hie pahâh ei ta, A sawchanôzy ta a hie ama pahâh.

²⁰ Chavâta Abeipa ta, ‘Ei hmia nyusai aw ei na ta, Ama chhâna ei moh tua aw. Chhâ moleipa châ ei ta, Ngâchhih leipa sawzy ama châ.

²¹ Khazoh a châ leipa ta ei hia na patliasa ei ta, Ama nothlahpazy ta ei hie eina pahâh ei. Chavâta phopi ta rei khi a tloh leipa chô liata Ama hia patliasa aw na ta, Râh hrupa hmâpa ta ama hie ei pahâh aw.

²² Ei hiehâhna ta mei papua ta, Athihkhih a thu chaipazy lâ taih kâ laih ta, Alei nata a kôveizy kâ khai ta, Tlâhpizy abôna chhao a kâ khai haw.

²³ “‘Ama chô liata raona pacho thlu aw ei na ta, Ei châtaizy ei hmâ thlu aw ei.

²⁴ Nodipa ta thi aw ei ta, Potlana rarôh ypa ta palâ khai aw ei ta, Hriiah chichhihpazy ta a palâ khai aw ei. Râhsa naoh seihpa zy âmo lâ tuah aw na ta, Dohlei liata alyhpa châmaih hneipa sazy âmo lâ ei tuah aw.

²⁵ Khôtho lâta zaozi ta thi aw ei ta, O chhôh liata thlazohpa ta ama y aw; Satlia nata laihsa zy thi aw ei ta, Sâhpi a ngiehpa nata sâ pawhpazy ama thi khai aw.

²⁶ A tlawh ta pachhaih aw ei na ta, Khizaw ta â thei khao lei awpa ta ei pamua aw ei,’ Vaw tah ha aw sah la a pha awpa tlai.

²⁷ Ama chariahpazy ta pahno chhei ei sala hmahta, Âmo cha pasipasawhpa ta, ‘He zydua he Abeipa taopa châ vei, Keimo ku ta eima pahniepa a châ,’ Ama tah pathlei awpa ei chipa vâta a châ.

²⁸ “Sona hnei leipa phopi châ ei ta, Âmo liata novâhna y vei.

²⁹ Ama so mawh sala, Cha kyh cha ama novâh aw ta, Ama chhâ nawpa ama pahno awpa tlai!

³⁰ Kheihta ma pakha ta sâh kha a chadai thei aw ta, Pano ta thy kha ama parâpaisa thei aw? Ama Lôpanô ta âmo cha zuah ha ta, Abeipa ta a uasa khao leipa vâ ei ta châ vei ma?

³¹ Âmo lôpanô cha keimo Lôpanô hawhpa châ vei; Cha cha eima chariahpazy chhao ta ama pahno.

³² “Ama kre zôh cha Sawdawmâ kre zôh tawhta a vy ta, Kawmawrâ lyuzy tawhta a vypa a châ; Ama kre theizy cha châmaih theizy châ ei ta, Ama kre saozy chhao kre sao khapazy a châ.

³³ Ama kresawhti cha parih châmaih châ ta, Chyuphao châmaih thatlôpa a châ.

³⁴ “Chazy cha ei yna liata pahmaoh na ta, Ei ryubyh chhôh liata ei khô ei.

³⁵ Phuh cha keima la awpa châ ta, Kei ta viari ei thô aw; Ama phei a chakhao patoh aw ta, Ama chhiena noh â hnia haw; Ama raona noh a vaw tlô patoh aw.

³⁶ Hmotaotheina ama hnei khao leipa Abeipa ta hmô ta, Sei chhao khotalaipa chhao ama y khao lei tita, Abeipa ta a phopi thaipachâsa aw ta, A chakaotuhpazy chô liata zawh â ngiah aw.

³⁷ Abeipa ta, ‘Ama khazohzy khataih lia ama y haw, Amâ chhaina lôpanô khataih lia a y haw?

³⁸ Amâ theihna thaw nie ei ta, Ama dopa hlâna kresawhti a doh tyhpazy kha, Khataih lia ama y haw? Vaw thyupa ta cha bao ei sala, Châ pabohsa bao ei sa!

³⁹ “‘Tahmâ he pachâ teh u, Kei, kei deita he Ano cha châ na ta, Keima leipa ta Khazoh hropa rai y veih ei. Thie thei na ta, Ei pahro thei; Hmah paphao thei na ta, Ei patlâh thei; Ei ku tawhta a pachha theipa y veih ei.

⁴⁰ Avâ lâ ei ku pazawh na ta, Tlyzaw ta a hrohpa ei châna moh reipa ta, Bie ei taih.

⁴¹ Ei zaozi patliepa ta sah la, Ryureina ei chaba tita cha, Ei khakhaipazy chô liata phuh la aw na ta, Nâ haotuhpazy viari ei thô aw ei.

⁴² Ei châtaizy thisaih pari awpa ta tao aw na ta, Ei zaozi ta sapa niepa ta, Thiepa nata patupazy thisaih doh aw ta, Chariah hyutuh sâ seihpazy luh tawhta thisaih a doh aw,’ tah ta.

⁴³ “Hy avâzy saih u, Abeipa phopi a lykhei u la; Hy khazohzy saih u, A hmia liata a bôh teh u; Ana cha a chakaotuhpazy thisaih phuhlatuhpa châ ta, A khakhaipazy chô liata viari a thôtuhpa a châ. Ano a haotuhpazy viarithô aw ta, A râh nata a phopi châta chatlaina a tao aw.”

⁴⁴ Mawsi cha Nunâ sawchapawpa Zawsua chhaota a vy ta, cha hla bie zydua cha zawpi theina liata reih ta.

⁴⁵ Mawsi ta cha bie zydua cha Izarei zydua hnohta a rei khai nahta,

⁴⁶ ama hnohta, “Tanoh nama hnohta bie ei reipa zydua liana heta nama pathipalôh khâchâ pachhô u la, he ryhpa bie zydua he zyh ta, tao awpa ta nama sawzy biepie teh u.

⁴⁷ Cha biezy cha nama châta bie thlâhthlipa châ leipa ta, nama hrona châ ta, cha biezy cha nama zyh khiahta cha, zawdâh chakapa ta hnei awpa ta nama pangaipa râh liata nama hro a pareih aw,” tah ta.

Mawsi thina chhochhieliena

⁴⁸ Cha noh lilaw liata Abeipa ta Mawsi hnohta,

⁴⁹ “Môabâ râh liata Zerikô dady ta Abari tlâhthlôh liata Nebô Tlâh lâ khy la, hnei awpa ta Izarei sawzy hnohta ei piepa Kâna râh cha kaw sai mah y.

⁵⁰ Na unawhpa Arawna kha Hôri Tlâh liata thi ta, a chiheihzy hnohta pahlyhpa a châpa hawhna khata, nâ chhao na kiapa tlâh chô liana cha thi aw chi ta, na chiheihzy hnohta pahlyhpa na châ hra aw.

⁵¹ Zini râhchawhpa liata Meribâ Kâdesâ tizy liata, Izarei sawzy hmiakô liata na ngâ leipa ei chi ta, Izarei sawzy hry liata eina palyupalih leipa vâ ei chi ta bietai râh cha a ngia aw veih ei chi.

⁵² Râh cha lâhla tawhta hmô aw chi ta, châhrasala Izarei sawzy ei piepa râh cha a ngia aw va chi,” tah ta.