RYHPACHANEINA 31 - Mara Bible RV (BSI)

Zawsua ta Mawsi â thla

¹ Mawsi ta Izarei saw zydua hnohta bie reih lymâ ta.

² Ama hnohta, “Tahmâ cha kô 120 uhtheipa châ ha na ta, pua-ei thei khao va na. Abeipa ta ei hnohta, ‘Zawdâh chaka aw va chi,’ na tah ha ta.

³ Abeipa nama Khazohpa ta hmia châ sahpa aw ei ta, ano tlai ta phopizy nama hmiakô tawhta pahleipadia aw ta, âmo cha nama pho aw. Abeipa ta a reipa hawhta, Zawsua ta hmia a sah aw ta, Zawdâh cha a chaka aw.

⁴ Abeipa ta Amawri bei Sihaw nata Ôkâ nata ama râh a pahleipadia nota ama chô liata a taopa hawhna khata, cha phopizy chô liata a tao hra aw.

⁵ Abeipa ta âmo cha cha pie aw ei ta, bie ei cha piepa zydua hawhna ei khata ama chô liata nama tao aw.

⁶ Thatlôpa nata riahphapa ta y u la, âmo cha chi leipa u la, thlazohpa ta y hra khuh vy. Nama hnohta a siepa cha Abeipa nama Khazohpa châ ta, cha my leipa aw ei ta, cha pathlua aw veih ei,” tah ta.

⁷ Chatawhcha Mawsi ta Zawsua aw ta, Izarei saw zydua mohmô liata a hnohta, “Thatlôpa nata riahphapa ta y teh. He phopi hnohna heta Abeipa ta ama pathlatuhpazy pie awpa ta bie â taihpa râh lâ sie aw chi ta, cha râh cha ryu ta na patosa aw ei.

⁸ Abeipa nama hmia lâta sie aw ta, nama hnohta y aw ta, cha siesai beih leipa aw ei ta, cha pathlua beih aw veih ei. Chi leipa u la, a ngiaroh hra khuh vy,” tah ta.

⁹ Mawsi ta ryhpa cha roh ta, Abeipa Biehrai Byh a sytuhpa Livai sawchapaw theihthaipazy nata Izarei machâzy hnohta pie ta.

Kô sarina maihta ryhpa phuah tyh awpa

¹⁰ Mawsi ta âmo cha biepie ta, ama hnohta, “Kô sarina, dyuchei ngiahthaina kô chhâna liata Byureih Kyhchhi liata,

¹¹ Izarei saw zydua Abeipa nama Khazohpa ta su â tlyh awpa liata a hmiakô liata amâ vaw luah tita, he ryhpa he Izarei saw zydua theipa ta nama reih awpa a châ.

¹² Zawpizy ta Abeipa nama Khazohpa china bie nathliepa ta, a chu ei sala, ryhpa bie zydua he zyhpa ta ama tao thei nawpa ta, chapawzy, chanôzy, hawtizy nata nama yna khihzy liata chihropa a ypazy nama awpakhy khai aw.

¹³ Ryhpa a pahno mâh leipa ama sawzy chhao, Zawdâh chakapa ta nama hnei awpa râh liata nama y chhôh zydua Abeipa nama Khazohpa china amâ chu lymâ thei nawpa ta, ryhpa he thei ta, amâ chu hra awpa a châ,” tah ta.

Mawsi hnohta Abeipa biepie hnôhchaipa

¹⁴ Abeipa ta Mawsi hnohta, “Pachâ teh, na thi daihti â hnia haw. Zawsua aw la, ahmaohna poh o liata a vy teh u, a hnohta biehneina ei pie aw,” tah ta. Mawsi nata Zawsua cha vawh ei ta, ahmaohna poh o liata kei y ei ta.

¹⁵ Abeipa cha poh o liata meihdo tôh ta a zâ luah ta, meihdo tôh cha poh o chhikao luh chô liata a duah ta.

¹⁶ Abeipa ta Mawsi hnohta, “Pachâ teh, châ pathlatuhpazy hnohta nâ mô nawpa daihti â hnia haw. He phopi he thyu aw ei ta, pahrâ awpa ta ama pangaipa râh liata chihropa khazohzy liata amâ phei aw. Na pathlua aw ei ta, ama hnohta ei hraipa ei biehrai ama parao aw.

¹⁷ Cha noh ta ama chô liata ei pathi ia aw ta, ei pathlua aw ei. Âmo tawhta ei hmia nyu aw na ta, pahleipadiapa ama châ aw. Hmo pha leipa nata nôpona hluhpi ama chô liata tlô aw ta, cha noh ta, ‘Eima Khazohpa eima hnohta a y leipa vâta, he hmo pha leipa he eima chô liata a vaw tlôpa châ vei ma?’ ama tah aw.

¹⁸ Khazoh hropazy lâ a heih ei ta hmo pha leipa ama taopa zydua vâta, cha noh liata ei hmia ei nyu tlai aw.

¹⁹ “Chavâta he hla he nama châta roh u la, Izarei sawzy pachu u la, Izarei sawzy ei dyuhna nâ pahnokheituhpa châta ama pakah liata soh u la, pasasa tyh muh vy.

²⁰ Ama pathlatuhpazy hnohta bie ei taihpa sâhpiti nata kheihti lona râh lâ ei chhi ti ei ta, lôhrâtlôpa ta nie aw ei ta, ama thawh tita, khazoh hropazy lâ a heih aw ei ta, ama chakao aw. Na mohnao aw ei ta, ei biehrai ama parao aw.

²¹ Hmo pha leipa nata nôpona hluhpi ama chô liata a vaw tlô tita, he hla he ama pathlazy pakah liata mypa ta a y lei awpa vâta, pahnokheituhpa âmo a padeituhpa a châ aw. Ei bietai râh ei tlôkhei hlâ chhao ei ta, ama palôh aheina lâ ei pahno khai,” tah ta.

²² Chatanachata Mawsi ta, cha noh ta hla phi ta, Izarei pathlazy a pachu ei.

²³ Abeipa ta Nunâ sawchapawpa Zawsua cha biehneina pie ta, a hnohta, “Thatlôpa nata riahphapa ta y teh. Izarei sawzy he ama hnohta bie ei taihpa râh nâ ngiakhei aw ei. Na hnohta ei y lymâ aw,” tah ta.

²⁴ Mawsi ta ryhpa bie zydua cha achhâna taihta châbu liata a ro khai nahta,

²⁵ Biehrai Byh a sytuhpa Livai chizy Mawsi ta biepie ta, ama hnohta,

²⁶ “Ryhpa châbu he la u la, nama paraona pahnokheituhpa châta Abeipa nama Khazohpa Biehrai Byh kâ lâta soh teh u.

²⁷ Chhorupa nata kuhchhapa nama châzie ei pahno. Pachâ tua u, tanoh ei cha hrolâh chy no ei ta hmahta Abeipa namâ dyuh khiahta cha, ei thi tawhta chhochhi cha khatlu ta ma a châ aw tly?

²⁸ Nama chi to machâzy nata nama hyutuhpazy kei lâ a vy awpa ta awpakhy teh u. He bie zydua he ama nah theina liata reih aw na ta, ei bie nâ pahnokhei awpa ta avâ nata alei ei aw aw ei.

²⁹ Ei thi tawhta thata molei aw ei chi ta, bie ei cha piepa ei lâpi tawhta nama tleisai aw tahpa ei pahno. Noh a vaw tlô awpazy liata, nama ku hmotaopa ta Abeipa hie pahâhpa ta, a mohmô liata hmo pha leipa nama tao awpa vâta, hmo pha leipa ta a cha tla thlu aw ei,” tah ta.

³⁰ Mawsi ta Izarei zawpi zydua theina liata he hla biezy he achhâna taihta reih ta.