RYHPACHANEINA 30 - Mara Bible RV (BSI)

Rona byhnâzy

¹ “Byhnâ nata chhiesana hmo nama hmiakô liata ei sopa zydua he nama chô liata a vaw tlô tita, Abeipa nama Khazohpa ta a cha papaipatlana râh phopizy hry liata nama y nota, he kyh he pachâpasiapa ta,

² nâmo nata nama pathlazy ta Abeipa nama Khazohpa lâ kua heihpa ta, tanoh ta bie ei cha piepa hawhna ei heta, nama pathipalôh tlokhuh ta nata nama thlahpa tlokhuh ta a ao nama nathlie khiahta cha,

³ Abeipa nama Khazohpa ta nama seichâna tawhta cha pakuasa aw ei ta, a cha ngiachhie aw ei. Abeipa nama Khazohpa ta a cha papaipatlana râh phopizy tawhta cha pakhy aw ei ta, a cha pakuasa aw ei.

⁴ Avâ chy chhâna taihta paipatlapa ta nama ypa chhao ta, cha su tawhta Abeipa nama Khazohpa ta cha pakhy aw ei ta, cha tawhtapa cha a châ chhi heih aw ei.

⁵ Châ pathlatuhpazy râh hneipa lâ Abeipa nama Khazohpa ta châ chhi heih aw ei ta, cha râh cha nama hnei aw. Châ pathlatuhpazy hlâta Abeipa ta nâmo byhnâ cha pie via aw ei ta, a cha papôhsa via aw ei.

⁶ Abeipa nama Khazohpa cha nama pathipalôh tlokhuh ta nata nama thlahpa tlokhuh ta kyhpachâpa ta, na hroh thei nawpa ta, Abeipa nama Khazohpa ta nama pathipalôh nata nama pathlazy pathipalôh chopaw a cha taipa aw ei.

⁷ Abeipa nama Khazohpa ta he chhiesana zydua he, nama chariahzy chô liata nata châ haotuhpazy nata châ taolatuhpazy chô liata a patlôsa aw.

⁸ Chatanachata kua aw chi ta, Abeipa nama Khazohpa ao nathlie aw ei chi ta, a biepiepa tanoh ta ei cha piepa zydua ei he nama zyh ha aw.

⁹ Abeipa nama Khazohpa ta nama ku raihria zydua, nama chipathla, nama sahroh taw nata nama chhaohlei thei zy byhnâ pie aw ta, thata a papôhsa aw. Châ pathlatuhpazy chô liata â lypa hawhna khata, Abeipa ta byhnâ cha pie aw ei ta, nama chô liata â ly heih aw.

¹⁰ Abeipa nama Khazohpa ao nathliepa ta, he ryhpa châbu liata ropa a biepiepazy nata a bieraopazy zyh u la, nama pathipalôh tlokhuh ta nata nama thlahpa tlokhuh ta Abeipa nama Khazohpa lâ namâ heih khiahta cha, cha byhnâzy cha nama to aw.

¹¹ “He biepiepa tanoh ta ei cha piepa ei he, zyh awpa ta nama châta ru leipa ta, tloh thei lei awpa châ hra vei.

¹² ‘A biepiepa cha thei sih la, eima zyh thei nawpa ta, ahy vârâh lâ kiah aw ta, miah a kaw lapa aw?’ tah awpa ta, biepiepa cha vârâh liata a ypa châ vei.

¹³ ‘A biepiepa cha thei sih la, eima zyh thei nawpa ta, ahy tilaipi khô lâ sie aw ta, miah a lapa aw?’ tah awpa ta, biepiepa cha tilaipi khô lâta a ypa châ hra vei.

¹⁴ Nama tao thei nawpa ta, bie ta châ hnia ei ta, nama pakah nata nama palôh liata a y.

¹⁵ “Pachâ tua u, tanoh he nama hmiakô liata hrona nata phana, thina nata raona soh na ta.

¹⁶ Abeipa nama Khazohpa kyhpachâ awpa ta, tanoh ta bie ei cha piepa he zyh u la, a lâpizy a chhihpa ta, a biepiepazy, a bieraopazy nata a pachianazy nama zyh khiahta cha, hroh aw chi ta, pôh aw chi ta, hnei awpa ta nama pangaipa râh liata Abeipa nama Khazohpa ta byhnâ a cha pie aw ei.

¹⁷ Nama pathipalôh a hro lâ a heih sala, a bie nathlie leipa ta, lâpi pavia u la, khazoh hropazy a chhypa ta nama chakao khiahta deikua cha,

¹⁸ nama leidia tlai aw tahpa tanoh ei cha chho ei. Zawdâh chakapa ta râh namâ ngia awpa nata nama hnei awpa liata hroh pareih aw veih ei chi.

¹⁹ Nama hmiakô liata hrona nata thina soh na ta, byhnâ nata chhiesana ei soh tahpa pahnokheituhpa châta tanoh he avâ nata alei ei aw ei. Hrona a tlyh u la, chatanachata nâmo nata nama chipathlazy nama hroh aw.

²⁰ Abeipa nama Khazohpa kyhpachâ u la, a ao nathliepa ta, ano khâchâ patu teh u. Ano cha nama hrona châ ta, nama hro pasina a châ. Chatanachata Abeipa ta châ pathlatuhpa Abarahâ, Aisika nata Zakaw zy hnohta pie awpa ta bie â taihpa râh liata nama pahrâ thei aw,” tah ta.