RYHPACHANEINA 3 - Mara Bible RV (BSI)

Izarei ta Bâsanâ bei Ôkâ a pahnie

¹ “Chatawhcha a lie pi ta, Bâsanâ lâpi lâta khy pi ta. Bâsanâ bei Ôkâ nata a chyhsa zydua ta Edarei liata miah a dyuh awpa ta vaw pua ei ta.

² Abeipa ta ei hnohta, ‘Ano kha chi khah y, ano nata a chyhsa zydua nata a râh na ku liata ei cha pie haw. Hesbaw liata a pahrâpa Amawri bei Sihaw chô liata na taopa hawhna khata, ano chô liata chhao na tao aw,’ tah ta.

³ Chatanachata Abeipa eima Khazohpa ta Bâsanâ bei Ôkâ nata a chyhsa zydua cha eima ku liata miah pie ta, pakha hmahta pahlôh leipa ta eima thie khai haw.

⁴ Cha daihti liata, a khihpi zydua la khai pi ta, âmo tawhta eima la leipa khihpi miakha hmah y vei. Bâsanâ bei Ôkâ khinarâh liata Akaw râh khihpi eima lapa zydua cha sycharu a châ.

⁵ Khihpi zydua cha thokhy a sâh ngaitapa ta dôhpa châ ei ta, khaohrei nata hraina hneipazy a châ. Cha khihpizy thota thokhy a hnei leipa khihpi hluhpi eima la hra.

⁶ Hesbaw bei Sihaw chô liata eima taopa hawhna khata, khihpi zydua parao pi ta, chapawzy, chanôzy nata hawtizy eima pahleipadia khai haw.

⁷ Eima pahniepa khihpizy hraona sôhthih nata sahrohzy deita eimâ la.

⁸ Cha daihti liata, Zawdâh nochhi lâta a ypa Amawri bei pano ku tawhta râhzy la pi ta, âmo cha Anaw saikao tawhta Hâmaw Tlâh taihta a pahrâpazy ama châ.

⁹ Hâmaw cha Sidaw mo ta Siriô tah ei ta, Amawri mo ta Seni ama tah.

¹⁰ By khihpizy nata Kilia nata Bâsanâ râh zydua, Sâlekâ tawhta Edarei taihta, Bâsanâ liata Ôkâ khinarâh khihpi zydua eima la khai haw.

¹¹ Bâsanâ bei Ôkâ deita cha Rephai chi a y chhôhpa châ ta, a rakhô cha thua rakhô châ ta, a doh lâ dy chaki seih ta, a hâ lâ dy palih a kawh. Cha cha tahmâ taihta Amawna pathlazy khihpi Râbâ liata a y thlâh ha.

Zawdâh nochhi lâta a pahrâpa chizy

¹² “Cha râh eima la nota, Anaw saikao chhâna liata a ypa Arôerâ tawhta Kilia tlâh râh khophie taihta, khihpi a ypazy chhaota, Rubena pathlazy nata Kâdâ pathlazy pie na ta.

¹³ Kilia râh laibâhpa nata Ôkâ khinarâh liata Bâsanâ râh zydua cha Manase chi khophiezy ei pie ei. Bâsanâ râh nata Akaw kao zydua cha Rephai râh tahpa ta pahno tyhpa a châ.

¹⁴ Manase pathla Zairâ ta Akaw râh zydua cha, Kesuri mo nata Mâkathai mo râhri taihta la ta, ano moh pachyuhpa ta Havôzairâ bi ta, chavâta Bâsanâ cha tanoh taihta Havôzairâ tahpa ta pahnopa a châ.

¹⁵ Kilia cha Mâki pie na ta,

¹⁶ Rubena pathla nata Kâdâ pathlazy hnohta Kilia tawhta Anaw saikao taihta ama râh châta ei pie ei. Ama râh cha saikao liah khophie tawhta a thao ta, Amawna mo râhri Zabaw chavah taihta a ô.

¹⁷ Arabâ râh chhao âmo râh châ ta, Zawdâh chavah cha râhri ta hmâpa ta, Chinere tawhta sie lymâ ta, nochhi lâta Piskâ baikhaihpa ry liata Tilaipi Iahpa Arabâ tilaipi taihta a châ.

¹⁸ “Cha daihti liata bie cha pie ei na ta, nama hnohta, ‘Abeipa nama Khazohpa ta he râh he nama hnei awpa ta a cha pie ei. Nama pasaipha zydua chariah chhaichhi a tobipa ta nama unawhpa Izarei sawzy hmia lâta chavah ama chaka aw.

¹⁹ Sahroh hluhpi nama hnei tahpa pahno na ta, chavâta nama lapinôzy nata nama saw hawtipazy cha nama sahrohzy chhaota khihpi ei cha piepazy liata ama y aw.

²⁰ Abeipa nama Khazohpa ta nama unawhzy a piepa râh, Zawdâh haosâ lâ râh cha nama unawhzy ta pahrâpa ta, Abeipa ta nâmo hawhta apahâna a pie ti ei ta, nâmo cha hnei awpa ta râh ei cha piepa chyu lâ namâ kaw lie aw,’ tah na ta.

²¹ Cha daihti lia pyly ta Zawsua cha biepie na ta, a hnohta, ‘He bei pano chô liata Abeipa nama Khazohpa hmotaopa zydua na mo ta a hmô khai haw. Cha hawhna chata na tlô awpa khinarâh zydua chô liata Abeipa ta a tao aw.

²² Âmo cha nama chi awpa châ vei, Abeipa nama Khazohpa ta a châ dyuhkhei aw ei,’ tah na ta.

Mawsi Kâna râh a ngia thei vei

²³ “Cha daihti liata Abeipa lâta thlahchhâ na ta, a hnohta,

²⁴ ‘Hy Abeipa Zehôvâh, châ chakaotuhpa he na rônahna nata na ku thatlôna pahmôsa chi ta, avâ liata tlyma, alei liata tlyma, na raihriazy he kheihawhpa khazoh ma a hria thei aw tly? Na hmotao rônahpazy he kheihawhpa khazoh ma a tao thei aw tly?

²⁵ Ngiachhiepa ta Zawdâh chavah na chakasa la, Zawdâh haosâ râh phapa, tlâh râh phapa nata Lebanaw râh hao na patlôsa mah y,’ tah na ta.

²⁶ Châhrasala nâmo vâta ei chô liata Abeipa a pathi ia ta, na nathlie khoh vei. Abeipa ta ei hnohta, ‘Â daih, cha kyh cha na chho khao khah y.

²⁷ Piskâ tlâh laki lâ kiah la, notla lâ, maw lâ, chho lâ nata nochhi lâ a heih la, na mo ta sai mah y. Nâ la Zawdâh he chaka aw va chi.

²⁸ Zawsua he biehneina pie la, pasyu la, a thapatlô mah y. Ano ta zawpizy he chhihtha aw ta, na kaw sai awpa râh cha ama ryuto châta a rai aw ei,’ tah ta.

²⁹ Chatanachata Bepeô dady saikao liata y pi ta.