RYHPACHANEINA 29 - Mara Bible RV (BSI)

Môabâ liata biehrai pathiehna

¹ Hezy he Abeipa ta Izarei sawzy hnohta Hôribâ liata bie a hraipa thota, Abeipa ta Mawsi hnohta Môabâ râh liata biepie heih ta, Izarei sawzy chô liata bie a hraipazy a châ.

² Mawsi ta Izarei saw zydua aw ta, hetana heta Abeipa bie a chho ei. “Abeipa ta nama mohmô lia tlai ta Izi râh liata Phiraoh nata a chyhsa zydua nata a râh zydua chô liata a taopa zydua hmô ei chi ta,

³ pasiana ru ngaitapa nata ngiana nata hmonoâh rônahpazy chhao nama mo tlai ta nama hmô hra.

⁴ Châhrasala Abeipa ta pahno thaina pathipalôh, hmô theina mo nata thei theina nahzy tanoh taihta cha pie veih ei.

⁵ Râhchawhpa liata kô sypalih cha chhihtha ei na ta, nama pôhpa liata nama chysiazy chy leipa ta, nama phei liata nama pheikyzy chy hra vei.

⁶ Kei he Abeipa nama Khazohpa ei châ tahpa nama pahno thei nawpa ta, viahchhâ nie leipa ei chi ta, kresawhti nata kresawhti patapa chhao doh veih ei chi.

⁷ He su nama vaw tlô nahta, miah a dyuh awpa ta Hesbaw bei Sihaw nata Bâsanâ bei Ôkâ vaw pua ei ta, châhrasala eima pahnie haw.

⁸ Ama râh la pi ta, Rubena chi, Kâdâ chi nata Manase chi khophie pahrâ nawpa ta eima pie.

⁹ Chavâta nama hmotaopa zydua liata thlaochhipa ta nama y lymâ thei nawpa ta, he biehrai biezy he zyh u la tao teh u.

¹⁰ Tanoh nama zydua ta Abeipa nama Khazohpa hmiakô liata a duah ei chi ta, nama chi pawhrâhpazy, nama machâzy, nama sawhkhâ molaipazy, Izarei chapaw zydua,

¹¹ nama hawtizy, nama lapinôzy, chihropa nama riehmo liata a y hrapazy, nama tho a thlupa tawhta nama ti a thaihpa taihta Abeipa nama Khazohpa hmiakô liata namâ duah hih.

¹² Chatanachata Abeipa nama Khazohpa ta tanoh ta nama hnohta a hraipa, Abeipa nama Khazohpa biehrai bietai liata namâ ngia thei aw.

¹³ Châ pathlatuhpa Abarahâ, Aisika nata Zakaw zy hnohta bie â taihpa nata nâmo hnohta chhao a reipa hawhta, tanoh he a phopi ta cha padua ei ta, ano cha nama Khazohpa a châ haw.

¹⁴ He biehrai nata bietai he nâmo hnoh dei ta a taopa châ leipa na ta,

¹⁵ tanoh ta Abeipa eima Khazohpa hmiakô liata a duahpazy nata tanoh eima hnohta a y hra leipazy hnohta chhao ei tao.

¹⁶ “Izi râh liata kheihta ma eima y tyh tahpa nata nama kaw chapiapa râhzy kheihta ma eima kaw sie pahlie tahpa nama pahno.

¹⁷ Ama hmo pasichhihpazy hmô ei chi ta, tho nata lô, tâkâ nata ngôhzy ta taopa ama khazoh nothlahpazy chhao nama hmô.

¹⁸ A vaih teh u, chataleipatala nama hry liata chapaw tlyma, chanô tlyma, pho tlyma, chi tlyma, tanoh Abeipa eima Khazohpa tawhta ama palôh tleisaipa ta, cha phopizy a chhypa khazohzy cha ngaipa ta chakao aw ei ta, nama hry liata châmaih khapa thari a thla pathlei aw.

¹⁹ “Cha hawhpa chyhsa ta he biehrai biezy he a thei tita, anosasyh ta a palôh ta byhnâ a awpa aw ta, ‘Ei palôh chhorupa lâpi a chhih hraw sah la, ei boh thlâh ha aw,’ tahpa ta pachâ aw ta, cha chata khihti phana râh chhao, râhchawhpa chhao, raona a tlôkhei aw.

²⁰ Ano cha Abeipa ta a ngiahthai khoh leipa aw ta, Abeipa hiehâhna nata hiatliana ta a khu aw. He châbu liata ropa chhiesana zydua he a chô liata tla thlu aw ta, Abeipa ta avâ ry tawhta a moh a pahlei aw.

²¹ Abeipa ta ano cha, Izarei chizy hry tawhta la papua aw ta, ryhpa châbu liata ropa chhiesana biehrai zydua hawhta, chhiena rarôh ypa a chô liata a patlôsa aw.

²² “Chhâ a vaw y awpa, nama hnôhlâ ta nama saw a vaw y awpazy nata chihropa chyhsa râh hlapi tawhta a vy awpazy ta, cha râh liata Abeipa ta potlana nata hri a chareisapazy ama hmô aw.

²³ A râh pôhpalôhpa cha, kaih nata alôh nata kârypa, khâpa chi hmah cheih leina, khâpa hmah pyu leina, sibiepazy chhao thao leina, Abeipa ta hiehâhpa nata pathi iapa ta a paraopa Sawdawmâ nata Kawmawrâ nata Adamâ nata Zebaw râhzy hawhta paraopa a châ aw.

²⁴ Phopi to ta, ‘Khâpa vâta ma Abeipa ta cha râh cha, cha hawhta a tao tly? Cha hawhta hiehâhna ru ngaitapa a patlôsapa cha, khâpa ma a chhâpa a châ tly?’ ama tah aw.

²⁵ “Cha tina cha chyhsazy ta, ‘Izi râh tawhta â chhi papua nona ei khata, Abeipa, ama pathlatuhpazy Khazohpa ta ama hnohta a taopa biehrai tleisai ei ta,

²⁶ ama pahno beih leipa khazoh hropa, Abeipa ta âmo châta a rao leipa khazohzy chakao ei ta, amâ chhypa vâta a châ.

²⁷ Chavâta cha râh chô liata Abeipa a pathi ia ta, he châbu liata ropa chhiesana zydua he ama chô liata patlôsa ta,

²⁸ hiehâhna ru ngaitapa nata pathiiana sah ngaitapa ta ama râh tawhta phia pathlah ta, tanoh ta ama yzie hawhna heta, râh hro lâta a papaipatla ha ei,’ ama tah aw.

²⁹ “Hmo nyupazy cha Abeipa eima Khazohpa eih châ ta, hmo palâhâhpazy deikua keimo nata eima pathlazy eih a châ. Chatanachata he ryhpa bie zydua he eima zyh thei aw.