RYHPACHANEINA 28 - Mara Bible RV (BSI)

Reingiahna byhnâzy

¹ “Abeipa nama Khazohpa ao cha pakhâta ta nathliepa ta, tanoh ta bie ei cha piepa zydua ei he zyhpa ta nama tao khiahta cha, Abeipa nama Khazohpa ta khizaw phopi zydua hlâta chônô viapa ta a cha tao aw ei.

² Abeipa nama Khazohpa ao nama nathlie khiahta cha, he byhnâ zydua heta cha zi aw ei ta, nama hmia lâta a sie lymâ aw.

³ “O lâta byhnâ to aw ei chi ta, râh lâ chhao byhnâ nama to aw.

⁴ “Nama chhi theizy, nama chhaohlei theizy, nama sahrohzy, nama viahchaotaw nata nama mietakutawzy byhnâ topa ta y aw ei ta, ama pôh aw.

⁵ “Nama hrâbyh nata nama viahchhâ nyhna beikoh zy byhnâ topa ta ama y aw.

⁶ “Namâ ngia nota byhnâ to aw ei chi ta, nama pua tita byhnâ nama to aw.

⁷ “Châ dyuhtuhpa nama chariahzy Abeipa ta nama hmiakô liata panawhsa aw ta, châ dyuh awpa ta lâpi miakha tawhta a vaw ngia aw ei ta, lâpi miasari lâta amâ râpai aw.

⁸ “Abeipa ta nama sawvâzy chô liata byhnâ patlôsa aw ta, nama ku raihria zydua byhnâ a pie aw. Abeipa nama Khazohpa ta râh a cha piepa ei liata byhnâ a cha pie aw ei.

⁹ “Bie a châ taihpa hawh ei ta, Abeipa nama Khazohpa biepiepazy zyhpa ta a lâpizy namâ chhih khiahta cha, Abeipa ta ano châta phopi pathaihpa ta a cha tao aw ei.

¹⁰ Chatanachata Abeipa moh bipa nama châpa khizaw phopi zydua ta hmô aw ei ta, ama cha chi aw.

¹¹ Châ pathlatuhpazy hnohta pie awpa ta Abeipa ta bie â vaw taihpa râh liata Abeipa ta byhnâ hluhpi a cha pie aw ei. Nama sawteih nawhteih pha aw ta, nama sahrohzy pôh aw ta, nama chhaohlei a pathei aw.

¹² “Abeipa ta ryubyh phapa avâzy cha pahypa aw ei ta, a daihtita liata nama râh liata avâ pasuasa aw ta, nama ku raihria zydua byhnâ a pie aw. Chatanachata phopi hluhpi dyu pacheisa aw ei chi ta, nâmo deikua ta dyu chei aw veih ei chi.

¹³ Tanoh ta bie ei cha piepa ei, Abeipa nama Khazohpa biepiepazy he zyhpa ta, pakhâta nama tao khiahta cha, Abeipa nama Khazohpa ta chaolahmei châ leipa ta, luh ta cha tao aw ei ta; a ry châ leipa ta, a chô ta a cha tao aw ei.

¹⁴ Tanoh ta bie ei cha piepa ei he, a kheihawhpa lia hmahta chachâh lâ tlyma, chavei lâ tlyma tleisai leipa ta, khazoh hropazy pazi leipa ta nama chakao leipa khiahta cha, cha hawhta nama châ aw.

Reingiahleina hlaozy

¹⁵ “Abeipa nama Khazohpa ao nathlie leipa u la, Abeipa biepiepa nata a bieraopa tanoh ta ei cha piepazy ei he zyh leipa ta, nama tao leipa khiahta deikua cha, he chhiesana zydua he nama chô liata vaw tlô aw ta, nama hmia lâta a cha siekhâh lymâ aw ei.

¹⁶ “O lâta chhiesapa ta y aw ei chi ta, râh lâta chhao chhiesapa ta nama y aw.

¹⁷ “Nama hrâbyh nata nama viahchhâ nyhna beikoh zy chhiesapa ta a y aw.

¹⁸ “Nama chhi theizy, nama chhaohlei theizy, nama sahrohzy, nama viahchaotaw nata nama mietakutawzy chhiesapa ta y aw ei ta, pôh aw veih ei.

¹⁹ “Namâ ngia nota chhiesapa ta y aw ei chi ta, nama pua tita chhiesapa ta nama y aw.

²⁰ “Hmo pha leipazy taopa ta, Abeipa nama tleisaipa vâta, Abeipa ta nama ku raihria zydua liata chhiesana, tymâna nata palôh chhâna zy vaw tuah aw ta, pahleipadiapa châ aw ei chi ta, thlai nama leidia aw.

²¹ Hnei awpa ta namâ ngiapa râh tawhta a cha pahleipadia khai hlâlei ei cha, Abeipa ta nama chô liata hri a patlôsa aw.

²² Chaohna, chasipa, thlohna, thata palona, nohkâhna, raohna nata maohna zy hmâpa ta Abeipa ta cha hrie aw ei ta, nama leidia hlâlei ama châ chadai lymâ aw.

²³ Nama luh chô lâta avâzy cha dawh châ aw ta, nama ry lâta alei cha thua a châ aw.

²⁴ Abeipa ta nama râh vâsua cha dohlei nata buchadoh lâta pachâsa aw ta, nama leidia hlâlei avâ tawhta nama chô liata a za tla aw.

²⁵ “Abeipa ta nama chariahzy hmiakô liata cha panawh aw ei ta, âmo a dyuh awpa ta lâpi miakha a chhih aw ei chi ta, lâpi miasari lâta ama hmiakô liata namâ râpai aw. Chatanachata khizaw khinarâh zydua chipa ta a paysatuhpa nama châ aw.

²⁶ Nama rizy cha avâ pavaw zydua nata alei sazy ta nie aw ei ta, a laih awpa y aw veih ei.

²⁷ Abeipa ta Izi kheihluhzy, byuhpa hrizy, riatha nata pathapa hrizy ta cha hrie aw ei ta, tlâh thei aw veih ei chi.

²⁸ Abeipa ta hruna, mochaona nata palôh tymâna zy ta a cha hrie aw ei.

²⁹ Mochaopa ta azohpa liata a pathâpazipa hawhta, nohchhô sawhvaw ta pathâpazi aw ei chi ta, nama lâpizy liata thlao a chhi leipa aw chi ta, tlybaipa nata hraopa ta y aw ei chi ta, châ pachha awpa ahy hmah y aw veih ei.

³⁰ “Lapinô a pahawh aw ei chi ta, chyhsa hropa ta â ziakhei aw. O sa aw ei chi ta, tlôh aw veih ei chi. Kre sadô tao aw ei chi ta, a thei nie aw veih ei chi.

³¹ Nama mohmô liata nama viahchao tôhpa thiepa châ aw ta, a sa nie aw veih ei chi. Nama hmiakô liata nama alâ a daophi raruahpa châ aw ta, cha pie khao aw veih ei. Nama mietakuzy cha nama chariahpazy piepa châ aw ta, châ pachha awpa ahy hmah y aw veih ei.

³² Nama sawchapawzy nata nama sawchanôzy chihropa hnohta piepa châ aw ei ta, âmo vâpa ta noh chareih nama mo bâna taihta sai aw ei chi ta, tao theipa khâpa hmah hnei aw veih ei chi.

³³ Nama pahno leipa phopi ta nama chhaohlei patheipa nata nama hriapasana theizy nie khai aw ei ta, nâmo cha khâ tlybai awpa nata riepathei awpa deita nama châ aw.

³⁴ Nama mo ta a hmôpa hmozy ta a cha pahrusa aw ei.

³⁵ Abeipa ta nama pakhu nata nama pheizy liata kheihluh pasapa tlâh thei leipa cha pathlasa aw ei ta, nama pheipazah tawhta nama laki taihta a y aw.

³⁶ “Abeipa ta nâmo nata nama bei nama pachâsa awpa cha, nama pahno beih leipa phopi, châ pathlatuhpazy chhao ta ama pahno beih leipa phopi lâ châ chhi aw ei ta, cha liata khazoh hropazy, tho nata lô khazohzy nama chakao aw.

³⁷ Chatanachata Abeipa ta a châ chhi nawpa phopi zydua hry liata, chichhihpa nata bieso nata hmo chhiepa lâta pakhopâna nama châ aw.

³⁸ “Lyu liata sâh hluhpi tu aw ei chi ta, khawsu ta nie khai aw ta, a chyhta dei nama hria aw.

³⁹ Kre sadô tao aw chi ta, mohôh aw chi ta, châhrasala châkariepa ta nie khai aw ta, a kresawhti doh aw veih ei chi. Kre thei chhao lyu aw veih ei chi.

⁴⁰ Nama râh zydua liata ôli tho loh aw ei chi ta, châhrasala nama ôli theizy zô khai aw ta, a thaw a thu aw veih ei chi.

⁴¹ Sawchapawzy nata sawchanôzy sa aw ei chi ta, châhrasala sei ta a chhi aw ei ta, nâmo eih châ aw veih ei.

⁴² Nama theilâpa kô zydua nata nama chhaohlei patheipa zydua khawsu châta a châ khai aw.

⁴³ “Chihropa nama hry liata a ypazy nâmo hlâta a sâh via rili aw ei ta, nâmo deikua cha namâ hnai via lymâ aw.

⁴⁴ Ama sôh dyuchei aw ei chi ta, nâmo sôh dyu cha chei aw veih ei. Âmo cha luh châ aw ei ta, nâmo cha chaolahmei nama châ aw.

⁴⁵ “Abeipa nama Khazohpa ao nathlie leipa ei chi ta, zyh awpa ta bie a cha piepa ei a biepiepazy nata a bieraopazy nama zyh leipa vâta, pahleipadiapa nama châ hlâlei, he chhiesana zydua he nama chô liata a vaw tlô aw. Chhiesanazy ta châ chadai aw ei ta, ama cha pha aw.

⁴⁶ Cha cha nâmo nata nama pathlazy chô liata Khazohpa hriena a tlôpa kyh chhâzaw ta ngiana nata noâhchhihpa a châ aw.

⁴⁷ Hmo to ativyna daihti liata Abeipa nama Khazohpa cha alypa nata thaphapa ta nama chakao leipa vâta,

⁴⁸ nâmo châ dyuh awpa ta Abeipa ta a vaw tua awpa nama chariahzy cha, nodidâhphina, thluahruana nata ato phahlana chôta chakao aw ei chi ta, a cha pahleipadia khai hlâlei ei cha, nama rao liata thua raopaky a cha paky aw ei.

⁴⁹ “Abeipa ta nâmo châ dyuh awpa ta, khizaw chhâna lâhlapi tawhta phopi miakha pahmôhpi a pathlôpa hawhta vaw tuah aw ta, cha phopi cha a reih nama thei leipa,

⁵⁰ machâzy a za leipa nata hawtizy a ngiachhie leipa phopi a hrâh ngaitapa a châ aw.

⁵¹ Cha phopi chata nama sahroh zaw nata nama chhaohlei patheipazy nie khai aw ta, tlokhuh a cha pahleipadia khaina taih ei ta nama sâh, nama kresawhti, nama sathaw, nama viahchao hri nata mietaku zaw zy ama nie khai aw. Nama châta khâpa hmah pahlôh aw vei.

⁵² “Nama râh chhôh zydua liata nama ngâpa thokhy a sâhpa nata a ipazy ama pacho khai hlâlei nama khihpi zydua liata cha dôh aw ei ta, Abeipa nama Khazohpa ta râh a cha piepa liata nama khihpi zydua lia tlai ta ama cha dôh aw.

⁵³ Nama chariahzy ta cha dôh aw ei ta, nôpopa ta ama cha so awpa vâta, Abeipa nama Khazohpa ta a cha piepa nama chipathla nama sawchapawzy nata na sawchanôzy sa taih nama nie aw.

⁵⁴ Nama hry liata chyhsa nôpha chaipa nata ngiachhiena a hnei chaipa taihta a unawhpa nata a lapinô kho ngaitapa nata a saw a hroh tlakaihpa ngiachhie thei khao aw veih ei.

⁵⁵ Nama chariah ta cha dôh aw ei ta, nama khihpi zydua liata nôpopa ta cha soh aw ei ta, chyhsa ta khâpa hmah a hnei khao lei awpa vâta, a sawzy sa a nie haipa cha mohropazy pie hra awpa pachâ thei aw vei.

⁵⁶ “Nama hry liata chanô panyu chaipa nata nainyu chaipa, a nainyu tupa nata a panyu tupa vâta a pheipazah alei a tly beih leipa taih ta, a vahpa kho ngaitapa nata a sawchapaw nata a sawchanô zy ngiachhie thei khao aw vei.

⁵⁷ Nama chariah ta cha dôh aw ei ta, nama khihpi zydua liata nôpopa ta ama cha soh awpa vâta, chanô ta ato a phahla aw ta, a phei nata phei likawh tawhta a saw a vaw pih dyupa nata â pyh haipa sawzy taih arulâta a nie aw.

⁵⁸ “Abeipa nama Khazohpa moh rônahpa nata chichhihpa nama chi thei nawpa ta, he châbu liata â rohpa ryhpa bie zydua he zyh leipa ta nama tao vei khiahta cha,

⁵⁹ Abeipa ta nâmo nata nama pathlazy chô liata potlana chichhihpa a pai thai khao leipa nata hri ru ngaitapa a pai thai khaoleipazy a chareisa aw.

⁶⁰ Nama chi kaw tyhpa Izi râh hrizy kha nama chô liata chareisa heih aw ta, a cha kopâ aw ei.

⁶¹ He ryhpa châbu liata ro leipa pasana nata potlana to chhao, nama leidia khaina taihta Abeipa ta nama chô liata a patlôsa aw.

⁶² Abeipa nama Khazohpa ao nama nathlie leipa vâta, avâ liata awhsi zie a châ tyhpa ei chi kha, a chyhta dei nama y aw.

⁶³ Abeipa ta nama chô liata hmo phapa tao ta, nama maluh cha papôh awpa â lynazie a châpa hawhta, nama leina tao awpa nata cha pahleipadia awpa chhao cha Abeipa alynazie châ aw ta, hnei awpa ta namâ kei ngiapa râh tawhta phia pathlahpa nama châ aw.

⁶⁴ “Abeipa ta kaokih liata, alei chhâna miakha lâ tawhta miakha lâ chhâna taihta a ypa phopizy hry liata cha papai aw ei ta, cha liata nâmo nata châ pathlatuhpazy ta nama pahno beih leipa tho nata lô khazohzy nama chakao aw.

⁶⁵ Cha phopizy hry liata huhnona rai hnei leipa aw ei chi ta, nama pheipazah châta a pahâna rai y aw vei. Cha liata Abeipa ta palôh achalyuna, mo bâna nata thlahpa thazeina zy a cha pie aw ei.

⁶⁶ Nama hrona cha khatino rai ta chichhihpa ta y aw ta, chhô nah zâ ta thlazohpa ta y aw ei chi ta, chhôhmohpa ta hrona noh hnei aw veih ei chi.

⁶⁷ Nama palôh liata chichhihna nata na mo ta a hmôpazy vâta, my ta, ‘Zâlâ a châ bâ mawh sala,’ tah aw ei chi ta, zâlâ ta, ‘My a châ bâ mawh sala,’ nama tah aw.

⁶⁸ Nama hnohta, ‘Hmô heih khao aw veih ei chi,’ ei tahpa Izi râh lâpi liata Abeipa ta balyh ta châ chhi pakhua heih aw ei ta, cha liata nama chariahpazy seichapaw nata seichanôzy châta a zuah aw ei chi ta, ahy ta hmah cha chalei khoh aw veih ei,” tah ta.