RYHPACHANEINA 27 - Mara Bible RV (BSI)

Ebâ Tlâh liata maisâh

¹ Mawsi nata Izarei machâzy ta zawpizy biepie ei ta, ama hnohta, “Tanoh ta bie eima cha piepa zydua ei he a pyh teh u.

² Abeipa nama Khazohpa ta râh a cha piepa ei lâ sie awpa ta Zawdâh nama chaka noh ta alô laipazy bô aw ei chi ta, alô baina ta nama patusa aw ei.

³ Abeipa nama Khazohpa ta râh a cha piepa ei, châ pathlatuhpazy Zehôvâh Khazohpa ta bie a châ taihpa ei, sâhpiti nata kheihti lona râh a ngia awpa ta Zawdâh nama chaka tita, he ryhpa biezy he alôzy liana cha nama roh awpa a châ.

⁴ Zawdâh nama chaka khai nahta, tanoh ta bie ei cha piepa hawhna ei heta, Ebâ Tlâh liata alô zy bô aw ei chi ta, alô baina ta nama patusa aw.

⁵ Cha liata Abeipa nama Khazohpa châta alô maisâh tao aw ei chi ta, thua chaihrai nama hmâ awpa châ vei.

⁶ Abeipa nama Khazohpa maisâh cha khai leipa alôzy ta nama tao awpa châ ta, cha liata Abeipa nama Khazohpa lâta raopa hlânazy nama hlâ aw.

⁷ Aryhna hlâna atheihnazy hlâ aw ei chi ta, cha liata nie aw ei chi ta, Abeipa nama Khazohpa hmiakô liata thaphapa ta nama y aw.

⁸ He ryhpa bie zydua he, alôzy chô liana chata a sia ngaitapa ta nama roh awpa a châ,” tah ei ta.

⁹ Chatawhcha Mawsi nata Livai chi theihthaipazy ta Izarei zydua hnohta, “Hy Izarei, a chalih u la pakhâta ta nathlie teh u. Tanoh he Abeipa nama Khazohpa phopi nama châ haw.

¹⁰ Chavâta Abeipa nama Khazohpa bie nama zyh awpa châ ta, tanoh ta eima cha piepa a bieraopazy nata a biepiepazy he nama zyh awpa a châ,” tah ei ta.

Ebâ Tlâh liata chhiesana nata Kerizi Tlâh liata byhnâ awna

¹¹ Cha noh ta Mawsi ta zawpi cha biepie ta, ama hnohta,

¹² “Zawdâh nama chaka khai tawhta, zawpizy châta byhnâ aw awpa ta, Simeôna chi, Livai chi, Zudâh chi, Iskâra chi, Zawsi chi nata Benzami chizy Kerizi Tlâh liata a duah aw ei ta,

¹³ chhiesa awpa ta, Rubena chi, Kâdâ chi, Asera chi, Zebulawna chi, Dânâ chi nata Nâthalai chizy Ebâ Tlâh liata amâ duah aw.

¹⁴ Chatawhcha Livai pathlazy ta ao paro ngaitapa ta Izarei chyhsa zydua hnohta hetana heta ama phuah aw.

¹⁵ “Khaipa ta tlyma, leihpa ta tlyma khazoh nothlahpa tao ta, cha hawhta zôthaipa ku ta taopa, Abeipa châta pasichhihpa khazoh nothlahpa arulâta a vaopa cha chhiesapa ta y mawh sy,” tah aw ei ta, zawpi ta, “Amen” ama tah aw.

¹⁶ “A nô tlyma, a paw tlyma a za leipa cha chhiesapa ta y mawh sy,” tah aw ei ta, zawpi ta, “Amen” ama tah aw.

¹⁷ “A vaih râhri a pasiepa cha chhiesapa ta y mawh sy,” tah aw ei ta, zawpi ta, “Amen” ama tah aw.

¹⁸ “Lâpi leipa lâta mochaopa a pasiesapa cha chhiesapa ta y mawh sy,” tah aw ei ta, zawpi ta, “Amen” ama tah aw.

¹⁹ “Chihropazy, paw hnei leipazy, nôhmeizy adona a tlybaipa cha chhiesapa ta y mawh sy,” tah aw ei ta, zawpi ta, “Amen” ama tah aw.

²⁰ “A paw lapinô a ziakheipa cha, a paw dua a thliapa a châpa vâta, chhiesapa ta y mawh sy,” tah aw ei ta, zawpi ta, “Amen” ama tah aw.

²¹ “Sahroh kheihawhpa rai a ykheipa cha chhiesapa ta y mawh sy,” tah aw ei ta, zawpi ta, “Amen” ama tah aw.

²² “A sietanô, a paw sawchanô tlyma, a nô sawchanô tlyma, a ziakheipa cha chhiesapa ta y mawh sy,” tah aw ei ta, zawpi ta, “Amen” ama tah aw.

²³ “A lapinô nô a ziakheipa cha chhiesapa ta y mawh sy,” tah aw ei ta, zawpi ta, “Amen” ama tah aw.

²⁴ “Arulâta a vaih a thiepa cha chhiesapa ta y mawh sy,” tah aw ei ta, zawpi ta, “Amen” ama tah aw.

²⁵ “Paraona hnei leipa thie nawpa ta panaopapana a lapa cha chhiesapa ta y mawh sy,” tah aw ei ta, zawpi ta, “Amen” ama tah aw.

²⁶ “He ryhpa biezy a pyh leipa nata a tao leipa cha chhiesapa ta y mawh sy,” tah aw ei ta, zawpi ta, “Amen” ama tah aw.