RYHPACHANEINA 26 - Mara Bible RV (BSI)

Thei hmiatuapa nata su hrawh su kha

¹ “Abeipa nama Khazohpa ta ryuto châta hnei awpa ta râh a cha piepa kei tlô aw ei chi ta, cha liata nama pahrâ tita,

² Abeipa nama Khazohpa ta râh a cha piepa liata chhaohlei patheipa tawhta kô a veih tua chaipa zydua la aw chi ta, hrâbyh liata khô aw chi ta, Abeipa nama Khazohpa ta a moh y nawpa ta â tlyh awpa su lâ nama siekhei tyh aw.

³ Cha daihti ta theihthaina rai a hriapa lâ vawh aw ei chi ta, a hnohta, ‘Abeipa ta miah pathlatuhpazy hnohta pie awpa ta bie â taihpa râh eima tlô haw tahpa tanoh Abeipa na Khazohpa hnohta eima phuah,’ nama tah aw.

⁴ Theihthaipa ta hrâbyh cha nama ku tawhta la aw ta, Abeipa nama Khazohpa maisâh thaby liata a patyuh aw.

⁵ Chatawhcha Abeipa nama Khazohpa hmiakô liata, ‘Eima paw cha Aramia chyhsa viavipa châ ta, Izi râh lâ zu ta, manôh chyhta chhaota cha liata za pahrâ ta, cha liata phopi rônahpa, thatlôpa nata maluh hluhpi vaw châ ta.

⁶ Izi mo ta miah taola ei ta, eima rie miah pathei ei ta, rai ru ngaitapa miah ama pahriasa.

⁷ Abeipa miah pathlatuhpazy Khazohpa awsao pi ta, Abeipa ta eima awna ao thei ta, eima rietheizie zy, eima hriapasazie zy nata tlybaipa ta eima yzie zy miah hmô ta.

⁸ Chatanachata Abeipa ta Izi râh tawhtapa cha ku thatlôpa nata bâh pazawhpa ta miah a kaw chhi ta, chichhih ngaitapa nata ngiana nata hmonoâhpazy hmâpa ta miah â kaw chhi papua.

⁹ He su lâ he miah a vaw chhi ta, he râh, sâhpiti nata kheihti lona râh he miah a pie.

¹⁰ Chavâta Hy Abeipa, tahmâ nâ ta miah na piepa chhaohlei thei pathei tua chaipazy eima vaw cheih,’ nama tah aw. Thei hmiatuapa nama hlâpazy cha Abeipa nama Khazohpa hmiakô liata soh aw ei chi ta, Abeipa nama Khazohpa cha a hmiakô liata a bôhpa ta namâ naoh aw.

¹¹ Chatanachata Abeipa nama Khazohpa ta nâmo nata nama pathlazy hnohta hmo phapa a cha piepa ei liata, Livai chi nata nama hry liata chihropa a ypazy chhaota thaphapa ta nama y aw.

¹² “Kô thôhna kô, su hrawh su kha piena kô liata, kô veihpa zydua tawhta su hrawh su kha soh aw ei chi ta, nama yna khih liata Livai chi a ypazy, mapaihpazy, paw hnei leipazy nata nôhmeizy ta nie ei sala, rihbiepa ta ama y thei nawpa ta nama pie aw.

¹³ Cha khai tawhta Abeipa nama Khazohpa hmiakô liata bie reih aw ei chi ta, a hnohta, ‘Eima hnohta bie miah na piepa hawhta, hmo pathaihpazy eima o tawhta papua pi ta, Livai chizy, mapaihpazy, paw hnei leipazy nata nôhmeizy eima pie. Na biepiepazy miakha hmah parao leipa pi ta, my hra ma pi.

¹⁴ Su hrawh su kha cha mâchhie eima sa nota nie leipa pi ta, eima pathaih lei daihti liata chhao kheihawhpa hmah la leipa pi ta, kheihawhpa hmah athihpa hlâ ma pi. Abeipa eima Khazohpa ao nathlie pi ta, bie miah na piepa zydua hawhta eima tao khai.

¹⁵ Na yna su pathaihpa vârâh tawhta za moh la, na phopi Izarei nata râh miah na piepa, miah pathlatuhpazy hnohta bie nâ vaw taihpa, sâhpiti nata kheihti lona râh he byhnâ pie mah y!’ nama tah aw.

Abeipa phopi pathaihpa

¹⁶ “Tanoh he Abeipa nama Khazohpa ta he bieraopazy nata pachianazy he tao awpa ta bie a cha pie ei. Chavâta nama pathipalôh tlokhuh ta nata nama thlahpa tlokhuh ta zyhpa ta nama tao awpa a châ.

¹⁷ Tanoh he Abeipa cha nama Khazohpa a châ tahpa phuah ha ei chi ta, a lâpizy a chhihpa ta, a bieraopazy, a biepiepazy nata a pachianazy zyhpa ta, a ao nathlie awpa ta bie namâ taih haw.

¹⁸ Abeipa chhao ta bie a châ taihpa hawh ei ta, tanoh tlai ta nâmo cha a ryu sôhpa nata a biepiepa zydua a zyh awpa phopi ta a cha tao ha ei.

¹⁹ Abeipa nama Khazohpa ta bie â vaw taih hapa hawhta, nâmo cha reithaina, moh phana nata palyupalihna kyhzy liata, phopi a paduapa zydua chô liata y awpa nata Abeipa nama Khazohpa châta phopi pathaihpa châ awpa ta a cha padua ei,” tah ta.