RYHPACHANEINA 24 - Mara Bible RV (BSI)

Lapinô mana ryhpa

¹ “Chyhsa ta lapinô hnei sala, a hro liata hmo ngia leipa khâpa tlyma a hmôpa vâta, mo tloh leina a hnei khiahta cha, mana châ ropa aw ta, a ku liata pie aw ta, a o tawhta a papua aw.

² A pua tawhta chyhsa hropa lapinô châ heih sala,

³ a vahpa panona chhao ta khoh khao heih leipa ta, mana châ ropa ta, a ku liata pie ta, a o tawhta a papua ha khiahta cha, a vahpa panona a thi hapa chhao ta,

⁴ a vahpa hmiatuapa, ano a papua tuapa khata, cha chanô cha a lapinô ta hnei heih thei khao aw vei. A papuapalei hapa châ ta, a hnei heih khiahta cha, Abeipa hmiakô liata pasichhihpa a châ. Abeipa nama Khazohpa ta ryuto châta râh a cha piepa ei a pamoleisatuhpa nama châ awpa châ vei.

⁵ “Lapinô hnei dyupa cha adyuhna lâ a sie awpa châ leipa ta, rai hropa chhao pie awpa châ vei. Kô kha chhôh a o liata y aw ta, a lapinô a palysa aw.

Ryhpa chi nanopazy

⁶ “Chyhsa ta sâh chariehna lô a chô nata a ry miano ta tlyma, a chô lâtapa sai ta tlyma, sôhkâ ta a la awpa châ vei. Cha hawhta taopa cha, sôhkâ ta chyhsa hrona lapa a châ.

⁷ “Chyhsa ta a unawhpa Izarei chyhsa paru sala, sei ta ma a tao tly, a zuah tlyma, pahnopa a châ khiahta cha, parutuhpa cha thie awpa a châ. Cha hawhna chata hmo pha leipa cha nama hry tawhta nama pahlei awpa a châ.

⁸ “Phawhpa hri kyh liata, pakhâta ta tao aw ei chi ta, theihthaipa Livai chizy ta ama cha chhopa hawhta nama tao aw. Ama hnohta bie ei piepa hawhta, a sohsi ngaitapa ta nama tao aw.

⁹ Izi râh tawhta nama kaw puana lâpi liata Abeipa nama Khazohpa ta Miria chô liata a taozie kha a thei thlâh ha teh u.

¹⁰ “Hmo kheihawhpa tlyma nama vaih dyu nama pacheisa tita, ano tawhta sôhkâ la awpa ta a o chhôh lâ namâ ngia awpa châ vei.

¹¹ Khôtho liata a duah aw ei chi ta, dyu nama pacheisapa ta sôhkâ cha khôtho lâ a cha kaw cheipa aw ei.

¹² Dyhchhiepa a châ khiahta cha, a sôhkâ cha nama o liata nama pariesa awpa châ vei.

¹³ Noh a tla nahta, sôhkâ châta a poh nama lapa cha nama pie ha awpa a châ. Chatanachata zâ ta a bu awpa hnei aw ta, byhnâ a cha awpa aw ei. Cha cha Abeipa nama Khazohpa hmiakô liata nama siana a châ aw.

¹⁴ “Rai nama pahriasapa dyhchhiepa nata phahlapazy cha, nama chiheihpa ama châpa chhao ta, chihropa nama râh khih miakha liata a pahrâpa ama châpa chhao ta, nama tlybai awpa châ vei.

¹⁵ Dyhchhiepa châ ei ta, ama noh hlao cha amâ ngâchhâ chhôhpa a châpa vâta, ama hria noh lia tlai ta, noh tla hlâta ama hria hlao nama pie lymâ awpa a châ. Chataleipatala nama chô liata ama palôh tlâh leina Abeipa lâ tlôkhei aw ei ta, moleina vâta thailei nama châ pathlei aw.

¹⁶ “Sawzy vâta pawzy thie awpa châ leipa ta, pawzy vâta sawzy thie awpa châ hra vei. Chyhsa to âmo moleina vâ chyu ta thie awpa a châ.

¹⁷ Chihropa nata paw hnei leipazy adona nama charichamy awpa châ leipa ta, nôhmei poh sôhkâ ta nama lapa awpa châ hra vei.

¹⁸ Nâmo chhao Izi râh liata sei ta y ei chi ta, Abeipa nama Khazohpa ta cha su tawhta a cha chatlaipa ei kha namâ thei thlâh ha awpa a châ. Chavâta cha hmo cha tao awpa ta bie ei cha pie ei.

¹⁹ “Nama lyu liata sâh nama hria nota, lyu liata sapiah nama my khiahta cha, la awpa ta nama kuahnao awpa châ vei. Mapaihpazy, paw hnei leipazy nata nôhmeizy châta nama siesai awpa a châ. Chatanachata Abeipa nama Khazohpa ta nama ku raihria zydua liata byhnâ a cha pie aw ei.

²⁰ Nama ôli thei nama lyu tita, nama lyu bâhpazy nama kuahnao awpa châ vei. Mapaihpazy, paw hneileipazy nata nôhmeizy châta nama siesai awpa a châ.

²¹ Nama kre sadô liata kre thei nama lyu tita, kâmo nama thoh awpa châ vei. Mapaihpazy, paw hnei leipazy nata nôhmeizy châta nama siesai awpa a châ.

²² Izi râh liata sei ta nama ypa kha a thei thlâh ha teh u. Chavâta cha hmo cha tao awpa ta bie ei cha pie ei.