RYHPACHANEINA 23 - Mara Bible RV (BSI)

Abeipa pakhypi a hlao thei lei awpazy

¹ “Chyhsa a tihmô keipa tlyma, a chapaw chhaichhi taipa tlyma cha Abeipa pakhypi liata amâ hlao awpa châ vei.

² “Riasaw cha Abeipa pakhypi liata â hlao awpa châ vei. A pathla chhâ hrawhna taihta ahy hmahta Abeipa pakhypi liata amâ hlao awpa châ vei.

³ “Amawna chyhsa tlyma, Môabâ chyhsa tlyma cha Abeipa pakhypi liata â hlao awpa châ vei. Ama pathlazy chhâ hrawhna taihta khati ta hmahta Abeipa pakhypi liata amâ hlao awpa châ vei.

⁴ Izi râh tawhta nama kaw pua nota, viahchhâ nata ti ta ama cha dy leipa vâta nata chhie cha sapa awpa ta Mesôpôtamia râh Pethô khih liata Beô sawchapawpa Bâlâma ama hruapa vâta, Abeipa pakhypi liata amâ hlao awpa châ vei.

⁵ Châhrasala Abeipa nama Khazohpa ta Bâlâma cha nathlie khoh vei. Abeipa nama Khazohpa ta kyh a cha pachâpa vâ ei ta, chhiesana cha nama châta byhnâ ta tlao a pachâsa haw.

⁶ Ama thlalôh nawpa nata ama hneirôh nawpa ta, nama hro chhôh zydua khati ta hmahta nama pachâkhei awpa ei châ vei.

⁷ “Edômâ mo cha nama unawhpa châ ei ta, namâ hao awpa châ vei. Izi mo chhao namâ hao awpa châ vei, nâmo chhao ama râh liata mapaihpa nama châpa kha.

⁸ Chhâ thôhna tawhta cha, ama pathlazy Abeipa pakhypi liata amâ hlao thei aw.

Riehmo pathaina ryhpa

⁹ “Nama chariahzy a dyuh awpa ta riehmo nama paryh tita, hmo pathaih leipa to tawhta namâ panano awpa a châ.

¹⁰ “Nama hry liata chapaw ahy tlyma, zâ ta a baoti a puapa vâta pathaih leipa a châ khiahta cha, riehmo puasai chy aw ta, riehmo lâ a ngia mâh khao aw vei.

¹¹ Zâlâ a vaw châ nahta, ti ta a ngai a si aw ta, noh tla tawhta riehmo lâ â ngia aw.

¹² “Riehmo khôtho lâ lyupâh puana su rao aw ei chi ta, cha liata lyupâh nama pua tyh aw.

¹³ Nama hmobaohzy hry liata alei lina hnei aw chi ta, cha cha hmâpa ta lyupâh pua awpa ta khôtho liata namâ tyu nawpa su chao aw ei chi ta, nama lyupâh cha alei ta nama khu lilaw heih aw.

¹⁴ Cha pachha awpa ei nata nama chariahpazy nama hmiakô liata cha pie awpa ei ta, Abeipa nama Khazohpa cha nama riehmo liata a vaw hlai tyh tlôh aw ta, chavâta nama riehmo cha a pathaih awpa a châ. Chataleipatala nama hry liata hmo pathaih leipa hmô aw ta, a cha siesai pathlei aw ei.

Ryhpa hropazy

¹⁵ “A zibeipa a râsai ta nâmo châ vaw ngaipa sei cha, a zibeipa lâ nama pakuasa awpa châ vei.

¹⁶ A pahrâ khohna khih liata nama hry liata y aw ta, nama tlybai awpa châ vei.

¹⁷ “Izarei sawchanôzy hry liata nothlahpa achhyna o liata âzuahnô ta ama y awpa châ leipa ta, Izarei sawchapawzy hry liata chhao nothlahpa achhyna o liata âzuahpa ama y awpa châ vei.

¹⁸ Bie namâ taihpa châta pie awpa ta, chanô azuana ty nata chapaw azuana ty tawhta hmôpa sôhzy Abeipa nama Khazohpa o lâ nama cheih awpa châ vei. A miano heta Abeipa nama Khazohpa châta pasichhihpa a châ.

¹⁹ “Apôhna hneipa ta nama unawhzy dyu nama pacheisa awpa châ vei. Tâkâ liata apôhna tlyma, niedo liata apôhna tlyma, apôhna hneipa ta khâpa hmah dyu nama pacheisa awpa châ vei.

²⁰ Chihropazy cha apôhna hneipa ta dyu nama pacheisa thei. Nama chiheihpazy deikua cha apôhna hneipa ta dyu nama pacheisa awpa châ vei. Chatanachata hnei awpa ta nama pangaipa râh liata nama raihria zydua liata Abeipa nama Khazohpa ta byhnâ a cha pie aw ei.

²¹ “Abeipa nama Khazohpa lâta bie namâ taihpa a y khiahta cha, pahawh pasâh leipa ta nama pie awpa a châ. Chataleipatala Abeipa nama Khazohpa ta châ hnaw tlôh aw ei ta, nama châta moleina a châ pathlei aw.

²² Bie namâ taih leipa khiahta cha, thailei châ aw veih ei chi.

²³ Nama hmao tawhta a puapa cha, nâmo kho tlai ta, nâmo pakah tlai ta Abeipa nama Khazohpa liata bie namâ taihpa a châpa vâta, nama tao thlyu awpa a châ.

²⁴ “Nama vaih kre sadô nama chapia nota, nama lôhrâtlôna taih nie thei ei chi ta, nama hrâbyh liata deikua nama khô awpa châ vei.

²⁵ Nama vaih lyu sâh hria mâh leipa nama chapia nota, nama ku ta sâh suh pahrie thei ei chi ta, sâkarâ ta deikua nama vaih sâh cha nama â awpa châ vei.