RYHPACHANEINA 22 - Mara Bible RV (BSI)

Ryhpa nanopazy

¹ “Nama chiheihpa viahchao tôhpa tlyma, mietaku tlyma a leipa nama hmô khiahta cha, pahno lei namâ pachâ awpa châ vei. Nama chiheihpa lâ namâ chhi awpa a châ.

² Nama chiheihpa cha lâhnia liata pahrâ leipa sala, sahroh hneituhpa nama pahno leipa khiahta cha, sahroh a leipa cha nama o lâ a chhi aw ei chi ta, nama chiheihpa ta a vaw tlua hlâlei nama hnohta y aw ta, a vaw tlua tita nama pie aw.

³ Nama chiheihpa alâ chhao, cha hawhta tao aw ei chi ta, a chysia chhao cha hawhta nama tao aw. Cha hawhna chata nama chiheihpa hmo pahleipa nama hmôpa maih nama tao aw. Pahno lei namâ pachâ awpa châ vei.

⁴ Nama chiheih alâ tlyma, a viahchao tôhpa tlyma, lâpi liata a paopa nama hmô khiahta cha, pahno lei namâ pachâ awpa châ vei. Nama pathyukhei awpa a châ.

⁵ “Chanô ta chapaw chysia â tao awpa châ leipa ta, chapaw ta chanô chysia â tao awpa châ hra vei. Ahy rai cha hawhta a taopa maih cha, Abeipa nama Khazohpa châta pasichhihpa a châ.

⁶ “Tho liata tlyma, alei liata tlyma pavaw bu hmô u la, a panô ta a taw tlyma, a tih tlyma â byu thlu thlâh ha chy khiahta cha, a taw cha a panô chhaota nama la awpa châ vei.

⁷ A panô pathlie aw ei chi ta, a taw deikua nama la thei. Nama châta pha aw ta, nama hro a pareih aw.

⁸ “O thiehpa nama sa tita, o chô tawhta chyhsa tla tlamawpa ta, nama o liata thisaih maoh nama paysa lei nawpa ta, o chô cha bâkhâh ta nama dôh awpa a châ.

⁹ “Nama kre sadô liata chicheipa chi no nama chei pakaoh awpa châ vei. Chataleipatala nama kôvei zydua, chi nama cheipa chhao, nama kre sadô a patheipa chhao, pathaih leipa a châ pathlei aw.

¹⁰ “Viahchao tôhpa nata alâ hmaohkha ta lei nama paliesa awpa châ vei.

¹¹ “Sahmi nata lini pala sa pahlaopa namâ ky awpa châ vei.

¹² “Poh namâ bu awpa cha, a ki mia palih liata pala pai pachhaohpa ta nama chakhi awpa a châ.

Apatlana moleina ryhpazy

¹³ “Chyhsa ta lapinô hnei sala, â ziakhei khai tawhta a hao heihpa ta,

¹⁴ ‘He chanô he hnei na ta, châhrasala ano ei hnia nahta, laihsakôpa a châna ano liata hmô va na,’ tahpa ta pathaih leipa hawhta baipa ta, a moh a pachhie khiahta cha,

¹⁵ chanô paw nata nô ta laihsakôpa a châna pasiana cha, thokhy chhikao liata machâzy hmiakô liata ama palâsa aw.

¹⁶ Chanô paw ta machâzy hnohta, ‘He chyhsa he ei sawchanô pahneisa na ta, a hao heih tlôh ta,

¹⁷ “Na sawchanô he laihsakôpa a châna hmô va na,” tahpa ta pathaih leipa hawhta bai ta. Hezy he ei sawchanô laihsakôpa a châna pasiana a châ hih,’ tah aw ta, khihpi machâzy hmiakô liata poh ama pakai aw.

¹⁸ Chatanachata khihpi machâzy ta chanô vahpa cha a chhi aw ei ta, ama hrie aw.

¹⁹ Izarei laihsakôpa moh a pachhiepa vâta tâkâ sekel za kha pacheisa aw ei ta, chanô paw ama pie aw. Chatanachata chanô cha a lapinô ta y aw ta, a hro chhôh zydua ta a ma awpa châ vei.

²⁰ Hmo dopa châ sala, chanô cha laihsakôpa a châna pasia nawpa a y vei khiahta deikua cha,

²¹ a paw o liata sihryhpa ta y ta, Izarei liata hmo molei ngaitapa a taopa vâta, chanô cha a paw o chhikao lâ a chhi aw ei ta, a yna khihpi liata chyhsazy ta alô ta ama vawhsao awpa a châ. Cha hawhna chata nama hry liata hmo phaleipa cha nama pahlei awpa a châ.

²² “Chyhsa ta chyhsa hropa lapinô â ziakheipa hmôpa a châ khiahta cha, ama pano ta, a ziakheituhpa chapaw chhao, chanô chhao, ama thi awpa a châ. Cha hawhna chata hmo pha leipa cha Izarei tawhta nama pahlei aw.

²³ “Lapinô châta a pahawhpa laihsakôpa cha, chyhsa ta khihpi liata hmô sala, â ziakhei khiahta cha,

²⁴ khihpi chhôh liata a y thlâh hapa tlai ta chanô ta a awh leipa vâta nata chapaw chhao a vaih lapinô moh a pachhiepa vâta, ama pano ta khihpi thokhy chhikao lâ a chhi aw ei chi ta, alô ta nama vawhsao awpa a châ. Cha hawhna chata hmo pha leipa cha nama hry tawhta nama pahlei awpa a châ.

²⁵ “Lapinô châta a pahawhpa laihsa cha, chyhsa ta lyurâhpa liata hmô ta, patupakhipa ta â ziakhei khiahta deikua cha, a ziakheituhpa chapaw deita a thi aw.

²⁶ Laihsa cha kheihta hmah nama tah awpa châ vei. Laihsa chô liata thina taihta hrie tlâh a châpa moleina y vei. Cha hmo cha chyhsa ta a vaih thyuhnao ta a thiepa hawhpa a châ.

²⁷ Lyurâhpa liata a tyh ta, a pahawhpa laihsa cha awh taraw ta, châhrasala a pachha awpa ama y leipa vâta, hrie awpa châ vei.

²⁸ “Chyhsa ta laihsakôpa a pahawh leipa hmô ta, patu ta, â ziakheipa hmôpa a châ khiahta cha,

²⁹ a ziakheituhpa chapaw ta laihsa paw cha tâkâ sekel sypangawh pie aw ta, a moh a pachhie hapa vâta, ano cha lapinô ta a hnei aw. A hro chhôh zydua ta a ma awpa châ vei.

³⁰ “A paw lapinô a hneipa cha, a paw dua a thliapa a châpa vâta, chyhsa ta a paw lapinô a hnei awpa châ vei.