RYHPACHANEINA 20 - Mara Bible RV (BSI)

Adyuhna ryhpazy

¹ “Nama chariahzy a dyuh awpa ta nama sie tita, nâmo hneipa hlâta hluh viapa arâzy, talailihzy nata pheisaihzy nama hmô nahta, âmo cha nama chi awpa châ vei. Izi râh tawhta châ kaw chhi papuatuhpa Abeipa nama Khazohpa nama hnohta a y aw.

² Adyuhna lâ nama sie chy ta, theihthaipa vaw pua aw ta, zawpi hnohta bie a reih aw.

³ Theihthaipa ta zawpi hnohta, ‘Hy Izarei, nathlie teh, tanoh cha nama chariahzy a dyuh awpa ta, adyuhna lâ nama sie aw. Riahchhiepa ta y khuh vy. Chi leipa u la, a chalyu hra leipa u la, âmo vâta thlazohpa ta y khuh vy.

⁴ Abeipa nama Khazohpa nama hnohta sie aw ta, nama chariahzy châ dyuhpa aw ei ta, a cha pachha aw ei,’ a tah aw.

⁵ Cha khai tawhta hyutuhpazy ta zawpi hnohta bie reih aw ei ta, ama hnohta, ‘O thiehpa sa ta a hlâ mâh leipa nama y ma? Kua sala a o lâ a di mawh sy. Chataleipatala adyuhna liata thi pathlei aw ta, chyhsa hropa ta a o cha a to pathlei aw.

⁶ Kre sadô tao ta a thei a nie mâh leipa nama y ma? Kua sala a o lâ a di mawh sy. Chataleipatala adyuhna liata thi pathlei aw ta, chyhsa hropa ta a kre sadô thei a nie pathlei aw.

⁷ Lapinô a pahawh ta a hnei mâh leipa nama y ma? Kua sala a o lâ a di mawh sy. Chataleipatala adyuhna liata thi pathlei aw ta, chyhsa hropa ta â pahawhpa cha a hnei pathlei aw,’ ama tah aw.

⁸ Hyutuhpazy ta zawpi hnohta reih via aw ei ta, ‘A chipa nata riahchhiepa nama y ma? Kua sala a o lâ a di mawh sy. Chataleipatala ano palôh duapa hawhta a unawhzy palôh a paduasa pathlei aw,’ ama tah aw.

⁹ Hyutuhpazy ta zawpi hnohta bie ama reih khai nahta, zawpi a chhihtha awpa pheisaih hyutuhpazy ama rao aw.

¹⁰ “A dyuh awpa ta khihpi namâ hnia tita, aryhna bie nama reih tua awpa a châ.

¹¹ Khihpi ta châ vaw ryh ei sala, nama hnohta amâ vaw hlâ khiahta cha, cha liata a pahrâpa zydua cha nama rai hriatuhpa ta y aw ei ta, ama cha chakao aw.

¹² Châ ryh khoh leipa ei sala, ama châ dyuh khiah deikua cha, khihpi cha nama dôh aw.

¹³ Abeipa nama Khazohpa ta khihpi nama ku liata a cha pie ti ei ta, khihsaw chapaw pitlohpa zydua zaozi ta nama thie khai aw.

¹⁴ Chanôzy, hawtizy, sahrohzy nata khihpi liata hmo a ypa zydua deikua cha, hraona sôh ta a la aw chi ta, chariahzy nama hraona sôh, Abeipa na Khazohpa ta a cha piepa ei cha nama châta a châ aw.

¹⁵ Cha hawhna chata nama yna tawhta lâhlapi ta a ypa khihpi zydua chô liata nama tao aw. Nama chheipâh râhzy liata khihpizy chô liata deikua cha, cha hawhta nama tao awpa châ vei.

¹⁶ Abeipa nama Khazohpa ta ryuto châta a cha piepa ei liata phopizy pahrâna khihpizy liata cha, husona a hneipa kheihawhpa hmah nama pahlôh awpa châ vei.

¹⁷ Abeipa nama Khazohpa ta bie a cha piepa hawh ei ta, Hiti mo, Amawri mo, Kâna mo, Perizi mo, Hivi mo nata Zebu mozy cha tlokhuh nama pahleipadia khai awpa a châ.

¹⁸ Chataleipatala ama khazohzy amâ chhyna liata hmo pasichhihpa ama taopa zydua tao hra awpa ta cha pachu aw ei ta, Abeipa nama Khazohpa chô liata nama molei pathlei aw.

¹⁹ “Khihpi la a chhuahpa ta bohpi dôhpa ta namâ dyuh tita, cha liata thozy pahlei a chhuahpa ta ahrei ta nama thlu awpa châ vei. A thei nama nie thei awpazy châ ei ta, nama thlu awpa châ vei. Râh liata tho namâ dyuh awpa cha, chyhsapa ma ama châ?

²⁰ A thei niepa chi châ vei tahpa nama pahnopa thozy deita paraopa ta thlu aw chi ta, nama chariahpa khihpi cha lapa a châ hlâlei khihpi dôh nawpa châta nama hmâh thei aw.