RYHPACHANEINA 2 - Mara Bible RV (BSI)

Râhchawhpa liata viavina kôzy

¹ “Cha khai tawhta a lie pi ta, Abeipa ta ei hnohta a reipa hawhta, Tilaipi Saihpa lâpi a chhihpa ta râhchawhpa lâ sie pi ta. Serâ Tlâh chahlôpa ta noh hluhpi eima sie.

² Abeipa ta ei hnohta,

³ ‘He tlâh chahlôpa ta bohpi sie ha ei chi ta, maw lâ pangaipa ta sie bâ muh vy.

⁴ Zawpi biepie la, ama hnohta, “Seirâ liata a pahrâpa Esaw pathla nama unawhzy râh nama sie pahlie bâ aw. Cha chi kaw aw ei ta, chavâta a sohsi kaw muh vy.

⁵ Âmo cha a dyuh khuh vy. Ama râh cha phei tlyna khi dâhdei chhao cha pie aw veih ei na. Seirâ Tlâh cha Esaw hnohta a pahrâ nawpa ta ei piepa a châ.

⁶ Nama nie awpazy âmo tawhta sôh ta chalei aw ei chi ta, nama do awpa tizy sôh ta nama chalei aw.

⁷ Abeipa nama Khazohpa ta nama ku raihria zydua liata byhnâ cha pie tyh ei ta, he râhchawhpa kawh ngaitapa nama siepahliezie haipa chhao a pahno. Kô sypalih chhôh zydua Abeipa nama hnohta y ta, khâpa hmah a phahla veih ei chi,” tah mah y,’ tah ta.

⁸ Chatanachata Seirâ liata a pahrâpa eima unawhpa Esaw pathlazy chahrihpa ta, Arabâ lâpi nata Elâthâ nata Eziôkebe zy tawhta lâhlapi ta sie pi ta. Lâ tlei pi ta, Môabâ râhchawhpa lâpi lâta eima sie.

⁹ “Abeipa ta ei hnohta, ‘Môabâ mo patypamâ leipa u la, a dyuh hra khuh vy. Ama râh cha nama pahrâ nawpa ta cha pie aw veih ei na. Ari râh cha Lawta pathlazy hnohta ama pahrâ nawpa ta ei pie ha ei.

¹⁰ Kha hlâta cha, cha râh liata Anâki mo hawhta chyhsa pahreihpa nata doh seihpa nata maluh hluh ngaitapa Emi mo y tyh ei ta.

¹¹ Anâki mo hawhta, âmo chhao cha Rephai mo tahpa ta pahnopa ama châ. Châhrasala Môabâ mo ta Emi mo tahpa ta ama aw tyh.

¹² Kha hlâta cha, Seirâ liata chhao Hôri mo ama pahrâ tyh. Châhrasala Izarei sawzy ta Abeipa ta ryuto râh a piepa chô liata ama taopa hawhta, Esaw pathlazy ta Hôri mo cha pho ei ta, ama mohmô tawhta pahleipadia ei ta, ama râh liata ama pahrâ haw.

¹³ Abeipa ta, “Thyu u la, Zere chavah chaka teh u,” tah ta. Chatanachata Zere chavah cha chaka pi ta.

¹⁴ Kâdesbânia tawhta vaw pua pi ta, Zere chavah eima chakana taihta eima viavi chhôh zydua cha kô sythôh nata kô charie a châ. Cha daihti chhôh ta, Abeipa ta zikyu â râ hapa hawh ei ta, cha chhâ liata chariah a dyuh theipa pheisaih zydua riehmo tawhta ama leidia khai haw.

¹⁵ Riehmo tawhta a pahleipadia khai hlâlei ei cha, Abeipa ku ta âmo cha â dyuh lymâ ei.

¹⁶ “Chariah a dyuhpa chyhsa zydua zawpi hry tawhta leidia ei ta, ama thi khai tawhta,

¹⁷ Abeipa ta na chho ta,

¹⁸ ‘Tanoh he Ari liata Môabâ râhri na chaka aw.

¹⁹ Amawna mo râh nâ hnia tita, âmo cha patypamâ leipa la, a dyuh hra khah y. Cha râh cha Lawta pathlazy hnohta ama pahrâ nawpa ta ei piepa râh a châpa vâta, Amawna mo râh cha, cha pie aw va na,’ tah ta.

²⁰ Cha râh cha, kha hlâta cha Rephai mo pahrâ tyhna râh a châpa vâta, Rephai râh hawhta pachâpa a châ hra. Amawna mo ta Zazumi mo tahpa ta ama aw tyh.

²¹ Anâki mo hawhta chyhsa pahreihpa nata doh seihpa nata maluh hluh ngaitapa châ ei ta, châhrasala Abeipa ta âmo cha Amawna mo hmiakô liata pahleipadia ta, Amawna mo ta pho ei ta, ama râh liata ama pahrâ haw.

²² Cha hawhna chata Abeipa ta Seirâ liata a pahrâpa Esaw pathlazy châta chhao tao hra ta, Esaw pathlazy hmiakô liata Hôri mo cha pahleipadia ta, Esaw pathlazy ta Hôri mo cha pho ei ta, tanoh taihta ama râh liata ama pahrâ.

²³ Kâza taihta khitawzy liata a ypa Avimi mo chhao, Kâftaw tawhta a vaw puapa Kâftaw mo ta pahleipadia ei ta, ama râh liata ama pahrâ ha hra.

²⁴ “Abeipa ta, ‘Thyu u la, sie u la, Anaw saikao chaka teh u. Moh teh u, Amawri chyhsa Hesbaw bei Sihaw nata a râh cha nama ku liata ei cha pie ha ei. A râh hnei pathao u la, ano cha a dyuh teh u.

²⁵ Tanoh he avâ ry liata phopi zydua chô liata nâma china nata thlazohna paysa aw na ta, na thâtih a theipa maih a chalyu aw ei ta, nâma vâta pachârôh ngaitapa ta ama y aw,’ tah ta.

Sihaw bei Hesbaw pahniena

²⁶ “Kedemô râhchawhpa tawhta Hesbaw bei Sihaw hnohta aryhna bie reih awpa ta chyhsa tuah na ta, a hnohta,

²⁷ ‘Na râh siepahlie eina pasai awpa chi ta ei châ haw. Lâlai a chhihpa ta sie aw na ta, chachâh lâ tlyma, chavei lâ tlyma, tlei aw va na.

²⁸ Ei nie awpa châta sôh ta niebaw na chaleisa aw chi ta, ei doh awpa ti chhao sôh ta eina chaleisa aw chi. Phei ta na râh siepahlie awpa rie na pasai mah y.

²⁹ Seirâ liata a pahrâpa Esaw pathlazy nata Ari liata a pahrâpa Môabâ mo ta ei chô liata ama taopa hawhta, Zawdâh chakapa ta Abeipa eima Khazohpa ta miah a piepa râh ei ngia hlâlei na râh siepahlie na pasai mah y,’ tah na ta.

³⁰ Châhrasala Hesbaw bei Sihaw ta a râh siepahlie miah pasaih vei. Nama ku liata a cha pie thei nawpa ei ta, Abeipa nama Khazohpa ta a palôh kuh pachhasa ta, tanoh ta a duahmo nama pahnopa hawhna heta, chhôrupa ta a tao haw.

³¹ “Chatawhcha Abeipa ta ei hnohta, ‘Moh teh, Sihaw nata a râh ei cha pie pathao haw. A râh cha hnei la pahrâ mah y,’ na tah ta.

³² Sihaw cha miah a dyuh awpa ta, a chyhsa zydua chhaota Zahâ liata vaw pua ta.

³³ Abeipa eima Khazohpa ta Sihaw cha miah pie ta, ano nata a sawchapawzy nata a chyhsa zydua eima thie khai haw.

³⁴ Cha daihti liata, a khihpi zydua la pi ta, chapawzy, chanôzy nata hawtizy eima pahleipadia khai haw. Pakha hmah pahlôh ma pi.

³⁵ Eima lapa khihpizy eima hraona sôhthih nata sahrohzy deita keimo châta eimâ la.

³⁶ Anaw saikao chhâna liata Arôerâ nata saikao liata khihpi a ypa tawhta Kilia taihta, thokhy a sâh tupa khihpi eima châta y vei. Abeipa eima Khazohpa ta eima ku liata miah a pie khai haw.

³⁷ Amawna pathlazy râh nata Zabaw chavah kiah zydua nata tlâh râh khihpizy deikua cha, Abeipa eima Khazohpa ta la lei awpa ta miah a pakhâ hapa hawhta, a hnia veih ei chi.