RYHPACHANEINA 19 - Mara Bible RV (BSI)

Abohna khihpi ryhpazy

¹ “Abeipa nama Khazohpa ta ama râh a cha piepa phopizy cha, Abeipa na Khazohpa ta chhawh pathlah aw ta, âmo su a thlapa ta, ama khihpizy nata ama ozy liata nama pahrâ tita,

² Abeipa nama Khazohpa ta hnei awpa ta râh a cha piepa su lialôh viapazy liata khihpi miathôh nama rao aw.

³ Lianycheihpazy a râ nawpa khihpizy châ aw ta, khihpizy pangaina lâpizy tao aw ei chi ta, Abeipa nama Khazohpa ta ryu ta a cha patosapa nama râh cha, su thôh ta pachhaihpa ta râhrizy nama tao aw.

⁴ “Abohna khihpizy lâ a râ thei awpazy cha, kha hlâta hmiahaona hnei hlei leipa ta a vaih a thie tlamawpazy ama châ aw.

⁵ Chyhsa pakha cha tho thlu awpa ta a vaih nata lyurâhpa lâ sie sala, tho â chai nota ahrei hâh tlopa ta a vaih a vawhsao pathlei khiahta cha, cha khihpi miakha lâ a râ aw ta, a hrona a pabohsa aw.

⁶ Chataleipatala thisaih phuh latuhpa ta a hiehâh lichih ta lianycheihtuhpa cha a chadai aw ta, lâpi a pasipa vâta pha aw ta a tusao pathlei aw. Kha hlâta hmiahaona a hnei leipa vâta, a vaih cha a thi tlâh châ taraw vei, a thie pathleipa a châ.

⁷ Chavâta abohna khihpi miathôh rao awpa ta bie ei cha pie ei.

⁸ Abeipa nama Khazohpa ta châ pathlatuhpazy hnohta bie â vaw taihpa hawhta, nama râhrizy pakawhpa ta, châ pathlatuhpazy hnohta pie awpa ta bie â vaw taihpa râh zydua a cha pie aw ei.

⁹ Cha tina chata tanoh ta bie ei cha piepa zydua he zyh aw ei chi ta, nama tao awpa a châ. Abeipa nama Khazohpa cha kyhpachâ aw ei chi ta, a lâpizy khâ namâ chhih aw. Chatanachata abohna khihpi miathôh thota khihpi hropa miathôh nama rao baichhi aw.

¹⁰ Chataleipatala Abeipa nama Khazohpa ta ryuto châta râh a cha piepa liata paraona a hnei leipa thisaih palopa châ aw ta, thisaih maoh nama phaoh pathlei aw.

¹¹ “Chyhsa ta a vaih â haopa vâta a byh ta, thyuhnaopa ta tusao sala, abohna khihpi miakha lâ â râ khiah deikua cha,

¹² a khih machâzy ta chyhsa tuah aw ei ta, cha chyhsa cha a vaw chhi aw ei ta, thie awpa ta thisaih phuh latuhpa ku liata ama hlâ aw.

¹³ Nama ngiachhie awpa châ vei. Paraona a hnei leipa thisaih a palopa vâta, thaileichâna cha Izarei tawhta nama pasipathai awpa a châ. Chatanachata nama châta a pha aw.

Ohmo lyuhmo râhrizy

¹⁴ “Abeipa nama Khazohpa ta hnei awpa ta râh a cha piepa ei, ryu ta nama to awpa râh liata chyhsa hmiatuapazy ta ama vaw bôpa nama vaih râhri lô nama pasie awpa châ vei.

Pahnokheina ryhpazy

¹⁵ “Ryhpa paraopa vâta tlyma, kheihawhpa hmo paraopa vâta tlyma leihpa chyhsa cha, pahnokheituhpa pakha bie ta thailei pachâsa awpa châ vei. Pahnokheituhpa pano bie ta tlyma, pahnokheituhpa pathôh bie ta tlyma pa-i awpa a châ.

¹⁶ Pahnokheituhpa pakheipa ta chyhsa ahy tlyma hmo a paraopa hawhta a leih khiahta cha,

¹⁷ biepeipa a hneipazy cha, cha daihti liata theihthaipazy nata ryureituhpazy lâ ama pano ta vawh aw ei ta, Abeipa hmiakô liata amâ duah aw.

¹⁸ Ryureituhpazy ta pakhâta ta pasia aw ei ta, bie pahnokheituhpa cha pahnokheituhpa pakheipa châ sala, a unawhpa cha haipa ta a leihpa a châ khiahta cha,

¹⁹ a unawhpa chô liata tao â chhuahpa hawhta, ano chô liata nama tao awpa a châ. Cha hawhna chata hmo pha leipa cha nama hry tawhta nama pahlei ha aw.

²⁰ Cha thâtih cha laibâhpazy ta thei aw ei ta, chi aw ei ta, cha hawhpa hmo pha leipa cha nama hry liata tao khao aw veih ei.

²¹ Nama ngiachhie awpa châ vei. Hrona vyuhpa ta hrona, mo vyuhpa ta mo, hâh vyuhpa ta hâh, ku vyuhpa ta ku, phei vyuhpa ta phei a châ aw.