RYHPACHANEINA 17 - Mara Bible RV (BSI)

Khazohpa achhynazie pakhâpazy

¹ “Seina a hneipa nata rei pasipasua thei awpa a hneipa viahchao tôhpa tlyma, mietaku tlyma hmâpa ta, Abeipa nama Khazohpa lâ namâ theih awpa châ vei. Cha cha Abeipa na Khazohpa châta hmo pasichhihpa a châ.

² “Abeipa nama Khazohpa ta a cha piepa ei nama yna khih liata a y hrapa chapaw tlyma, chanô tlyma ta a biehrai paraopa ta, Abeipa nama Khazohpa mohmô ta moleina hmo tao sala,

³ sie ta khazoh hropazy chakaopa ta chazy cha â chhy aw tlyma, a châ vei khiah, noh tlyma, thlâpâ tlyma, avâ liata a ypa kheihawhpa tlyma a chhypa ta, bie ei pie leipa tao sala,

⁴ a thâtih cha chho ei sala, nama vaw pahno khiahta cha, pakhâta ta namâ laichadai aw. Biedopa a châ tahpa pasiapa châ sala, cha hawhpa hmo pasichhihpa cha Izarei liata taopa a châ khiahta cha,

⁵ cha hmo moleipa a taotuhpa chapaw tlyma, chanô tlyma cha nama yna khih hawka lâ a chhi aw chi ta, cha chapaw tlyma, cha chanô tlyma cha alô ta nama vawhsao awpa a châ.

⁶ Thie awpa cha, pahnokheituhpa pano tlyma, pathôh tlyma pahnokheina bie ta thie awpa a châ. Pahnokheituhpa pakha bie ta thie awpa châ vei.

⁷ Pahnokheituhpazy ta thie awpa chô liata ama ku pathla tua chai aw ei ta, cha khai tawhta zawpi ta ku ama pathla aw. Cha hawhna chata hmo pha leipa cha nama hry tawhta nama pahlei awpa a châ.

Bie pachiana

⁸ “Thisaih a palona kyh tlyma, kheihawhpa vâta leihna kyh tlyma, atudaina kyh tlyma, nama yna khih liata biepeipa kheihawhpa rai châ sala, nâmo pachia awpa biepeipa rupa nama hnohta ama vaw tlôkhei khiahta cha, thyu aw ei chi ta, Abeipa nama Khazohpa ta â tlyh awpa su lâ nama sie aw.

⁹ Cha daihti liata Livai chi theihthaipazy nata ryureituhpazy lâ vawh aw ei chi ta, ama hnohta nama tlôkhei aw. Âmo ta bietluna ama cha chho aw.

¹⁰ Abeipa ta â tlyh awpa su tawhta bietluna ama cha chhopa hawhta tao aw ei chi ta, ama cha pachupa hawhta pakhâta ta nama tao aw.

¹¹ Ryhpa ama cha pachupa hawhta nata bietluna ama cha chhopa hawhta tao aw ei chi ta, bietluna ama cha chhopa cha chachâh lâ tlyma, chavei lâ tlyma nama tleisai awpa châ vei.

¹² Abeipa nama Khazohpa chakaotuhpa theihthaipa nata ryureituhpa bie nathlie leipa ta, a papeisa leipa chyhsa cha thie awpa a châ. Cha hawhna chata, moleina cha Izarei tawhta nama pahleipadia aw.

¹³ Chatanachata chyhsa zydua ta thei aw ei ta, chi aw ei ta, papeisa leipa ta y khao aw veih ei.

Izarei bei hro nata ryureina

¹⁴ “Abeipa na Khazohpa ta râh a cha piepa ei a ngiapa ta, cha râh cha hneipa ta, cha liata nama pahrâ tita, ‘Eima chheipâh liata phopi zydua taozie hawhta bei eima hnei hra aw,’ nama tah khiahta cha,

¹⁵ bei cha hnei aw ei chi ta, Abeipa nama Khazohpa ta â tlyhpa tlai bei ta nama hnei aw. Nama unawhzy hry tawhta pakha bei ta nama tao aw. Nama unawh a châ leipa chihropa cha, bei ta nama tao awpa châ vei.

¹⁶ Bei cha arâzy deikua a hluhpi a hnei awpa châ leipa ta, arâ hluhpi hnei thei nawpa ta Izi râh lâ chyhsa a tuah awpa châ vei. Abeipa ta, ‘Tahmâ tawhta cha, cha lâpi lâ nama kua beih khao awpa châ vei,’ cha tah ha tlôh ei ta.

¹⁷ Lapinô hluhpi a hnei awpa châ vei. Chataleipatala a lapinôzy ta a palôh ama paviasa pathlei aw. Tâkâ nata ngôh hluhpi a hnei awpa châ hra vei.

¹⁸ “A khinarâh beidyuchhai liata â tyu tita, Livai chi theihthaipazy a vaopa ryhpa cha, châbu liata â ro awpa a châ.

¹⁹ Ryhpa châbu cha a hnohta khâ y aw ta, a hro chhôh noh zydua ta a reih tyh aw. Chatanachata Abeipa a Khazohpa china kyh a chu thei aw ta, cha ryhpa nata bieraopazy liata bie zydua zyh aw ta, a tao lymâ aw.

²⁰ Chatanachata a palôh lai leipa aw ta, a unawhzy chô lâta a soh aw vei. Biepiepa cha chachâh lâ tlyma, chavei lâ tlyma tlei sai leipa aw ta, â beina Izarei râh liata ano nata a pathlazy bohpi amâ bei thei aw.