RYHPACHANEINA 16 - Mara Bible RV (BSI)

Zawpakhô Kyhchhi

¹ “Abeipa nama Khazohpa ta Abi thla liata Izi râh tawhta zâ ta a châ kaw chhi papuapa vâ ei ta, Abi thla cha chay aw chi ta, Abeipa nama Khazohpa châta zawpakhô kyhchhi nama tao aw.

² Abeipa ta a moh y nawpa su â tlyh awpa liata Abeipa nama Khazohpa lâta nama mietaku zaw hry tawhta nata viahchao hri hry tawhta zawpakhô atheihna châta nama hlâ aw.

³ Atheihna sa cha viahchhâ thinô pahlaopa chhaota nama nie awpa châ vei. Izi râh tawhta a para ngaitapa ta nama kaw puapa atheithlâhna châta, noh sari chhôh viahchhâ thinô pahlao leipa, pasataona viahchhâ nama nie awpa a châ. Chatanachata Izi râh tawhta nama kaw puana noh cha, nama hro chhôh zydua ta namâ thei thlâh ha aw.

⁴ Nama pahrâna râh zydua liata noh sari chhôh thinô hmô awpa a y awpa châ vei. Noh khana noh zâlâ ta namâ theihna sa cha, a kheihawhpa hmah zâ chhôh zydua nata a mylâ taihta a y awpa châ vei.

⁵ Zawpakhô atheihna cha Abeipa nama Khazohpa ta a cha piepa ei khih to liata hlâ thlâh awpa châ leipa ta,

⁶ Abeipa nama Khazohpa ta a moh y nawpa ta â tlyhpa su liata, Izi râh tawhta nama kaw puana daihti, zâlâ noh tla daihti liata zawpakhô atheihna cha nama hlâ tyh awpa a châ.

⁷ Atheihna sa cha rao aw ei chi ta, Abeipa ta su â tlyhpa liata nama nie aw. My ta a lie aw chi ta, nama poh ozy lâ namâ di aw.

⁸ Noh charu chhôh viahchhâ thinô pahlao leipa nie aw ei chi ta, noh sarina noh cha Abeipa nama Khazohpa châta pakhypi pathaihpa a châ aw. Cha noh liata cha, rai na hria awpa cha vei.

Hâta Kyhchhi

⁹ “Hâta ei sari nama paki aw. Cha cha sâkarâ ta sâh nama tai pathao noh tawhta rei awpa a châ.

¹⁰ Chatawhcha Abeipa nama Khazohpa châta Hâta Kyhchhi taopa aw ei chi ta, Abeipa nama Khazohpa ta byhnâ a cha piepa lymâ hawh ei ta, lôhthai hlâna nama hlâ aw.

¹¹ Chatanachata Abeipa nama Khazohpa ta a moh y nawpa ta â tlyhpa su liata, nama sawchapawzy, nama sawchanôzy, nama seichapawzy, nama seichanôzy, Livai chi nama yna khih liata a pahrâpazy, nama hry liata a ypa chihropazy nata paw hnei leipa nata nôhmeizy chhaota Abeipa nama Khazohpa hmiakô liata thaphapa ta nama y aw.

¹² Izi seichâna liata nama ypa kha a thei thlâhpa ta, cha bieraopazy cha pakhâta ta nama zyh awpa a châ.

Byureih Kyhchhi

¹³ “Nama sawhri tawhta nata nama kre saohna khaoh tawhta nama kôveizy nama paly khai nahta, noh sari chhôh byureih kyhchhi nama chay awpa a châ.

¹⁴ Cha kyhchhi cha, nama sawchapawzy, nama sawchanôzy, nama seichapawzy, nama seichanôzy, Livai chi nama khih liata a ypazy, chihropazy, paw hnei leipazy nata nôhmeizy chhaota thaphapa ta nama hmâh tyh aw.

¹⁵ Abeipa ta â tlyhpa su liata Abeipa nama Khazohpa châta noh sari chhôh kyhchhi nama chay awpa a châ. Chatanachata Abeipa nama Khazohpa ta nama kôvei nata nama ku raihria zydua liata byhnâ cha pie aw ei ta, namâ lyna â ki aw.

¹⁶ “Chapaw zydua ta Abeipa nama Khazohpa ta â tlyh awpa su liata kô kha ta ei thôh a hmiakô liata namâ luah tyh awpa a châ. Viahchhâ thinô pahlao leipa kyhchhi liata zy, hâta kyhchhi liata zy, byureih kyhchhi liata zy, Abeipa hmiakô liata ku ruapa ta namâ luah awpa châ vei.

¹⁷ Chyhsa to Abeipa nama Khazohpa ta byhnâ a cha patosapa lymâ hawh ei ta nama pie awpa a châ.

Ryureina siapa

¹⁸ “Abeipa nama Khazohpa ta a cha piepa ei khih to liata, chi to châta ryureituhpa nata hyutuhpazy rao aw ei chi ta, âmo chata ryureina siapa ta zawpizy ryu ama reipa tyh aw.

¹⁹ Adona nama charichamy awpa châ leipa ta, khokhei viapa nama hnei awpa châ vei. Panaopapana nama la awpa châ vei. Panaopapana ta asopazy mo pachao ta, mosiapazy â sia lâta bie a pareisa tyh.

²⁰ Nama hro thei nawpa nata Abeipa nama Khazohpa ta râh a cha piepa ei cha ryu ta nama to thei nawpa ta, adona, adona deita nama zi awpa a châ.

Zyhna pahlaopahli lei awpa

²¹ “Abeipa nama Khazohpa châta maisâh nama tao awpa kiapâh liata kheihawhpa tho hmahta Aseri tôh ta hmâpa ta nama bô awpa châ vei.

²² Abeipa nama Khazohpa ta â haopa alô chhao nama bô awpa châ vei.