RYHPACHANEINA 15 - Mara Bible RV (BSI)

Dyuchei ngiahthaina kô sarina

¹ “Kô sari chhâna maihta dyuchei ngiahthaina nama phuah aw.

² He he dyuchei ngiahthaina ryhpa a châ: Dyu pacheisatuhpa maihta a vaih dyuchei â ngiahthai awpa a châ. Abeipa ngiahthaina phuahpa a châ hapa vâta, a vaih nata a unawhpa dyuchei a hiah awpa châ vei.

³ Chihropa cha dyuchei hiah thei aw ei chi ta, nama hneipa kheihawhpa rai nama unawhpa hnohta a ypa deikua cha, nama ku tawhta nama pathlie awpa a châ.

⁴ Abeipa nama Khazohpa ta ryuto châta hnei awpa ta râh a cha piepa ei liata byhnâ cha pie aw ei ta, dyhchhiepa nama hry liata y aw veih ei.

⁵ Byhna nama to thei nawpa ta, Abeipa nama Khazohpa ao pakhâta ta nathlie aw ei chi ta, tanoh ta biepiepa ei cha piepa zydua he nama zyh awpa a châ.

⁶ Abeipa nama Khazohpa ta bie a châ taihpa hawh ei ta byhnâ a cha pie aw ei. Phopi hluhpi dyu pacheisa aw ei chi ta, nâmo deikua dyuchei aw veih ei chi. Phopi hluhpi chô liata ryu reih aw chi ta, âmo deikua nama chô liata ryureih aw veih ei.

⁷ “Abeipa nama Khazohpa ta râh a cha piepa ei khih miakha liata nama unawhzy hry liata dyhchhiepa ama y khiahta cha, nama unawh dyhchhiepazy chô liata lôhkhô namâ hli awpa châ leipa ta, nama ku nama pako awpa châ vei.

⁸ Âmo lâta nama ku pazawh aw ei chi ta, amâ phahlana pavao nawpa ta, amâ ngiahpa zie ta dyu namâ pacheisa awpa a châ.

⁹ A vaih teh u, chataleipatala, ‘Dyuchei ngiahthaina kô, kô sarina a vaw tlô daihmâ haw,’ tahpa ta nama unawh dyhchhiepa cha uasa a chhuah leipa ta, bao khoh leina palôh chhiepa nama hnei pathlei aw. Cha hawhta nama y khiahta cha, Abeipa lâ cha tlôkhei aw ei ta, nama châta moleina a châ aw.

¹⁰ Riapha kawpa ta nama pie awpa châ ta, nama pie tita a ngiapachhina palôh nama hnei awpa châ vei. Cha hawhta nama tao khiahta cha, Abeipa nama Khazohpa ta nama hmotaopa zydua nata nama raihria zydua liata byhnâ a cha pie aw ei.

¹¹ Khatino rai ta dyhchhiepazy nama râh liata ama y aw. Chavâta, “Nama râh liata dyhchhiepa nata phahlapa nama unawhzy lâta nama ku pazawh muh vy,” tahpa ta bie ei cha pie ei.

Sei mohôhnazie

¹² “Nama unawhpa Hebrai chyhsa chapaw tlyma, chanô tlyma, nama hnohta zuapa ama châ khiahta cha, kô charu cha chakao aw ei ta, a kô sarina liata cha, khotalaina hnei awpa ta pua nama pasai awpa a châ.

¹³ Khotalaipa ta ama pua tita, ku ruapa ta nama pasiesa awpa châ vei.

¹⁴ Nama mietaku zaw, nama sawhri nata nama kresawhti saohpazy tawhta mochhih leipa ta nama pie awpa a châ. Abeipa nama Khazohpa ta byhnâ a cha piepa hawh ei ta, âmo chhao nama pie hra awpa a châ.

¹⁵ Izi râh liata sei ta y ei chi ta, Abeipa nama Khazohpa ta a cha chatlaipa ei kha namâ thei thlâh awpa a châ. Chavâta he biezy he tanoh ei cha pie ei.

¹⁶ Seizy ta nâmo nata nama chhôhkhazy kyh ama cha pachâpa vâ ei ta, nama hnohta ypa pha tah ei sala, ‘Cha puasai aw veih ei na,’ ama tah khiahta cha,

¹⁷ thua pazaopa la aw ei chi ta, ochhi pachhaipa ta ama nah vieh aw ei chi ta, chhâzaw ta nama sei ta ama y aw. Nama seichanô chô liata chhao, cha hawhta nama tao aw.

¹⁸ Nama unawhpa Hebrai seizy cha ahlaohpa hriapa lie no ta hria ei ta, kô charu ama cha chakao hapa vâta, khotalaina pie ta papua awpa cha, nama châta hmo ru tupa ta nama pachâ awpa châ vei. Abeipa nama Khazohpa ta nama hmotaopa zydua liata byhnâ a cha pie aw ei.

Thei hmiatuapazy pananona

¹⁹ “Nama viahchao hri nata nama mietaku zaw hry liata a chapawpa a pataw tuapa maih cha, Abeipa nama Khazohpa châta nama panano awpa a châ. Nama viahchao hri liata a chapawpa a pataw tua chaipa cha, rai nama pahriasa awpa châ leipa ta, nama mietaku zaw hry liata a chapawpa a pataw tua chaipa hmi chhao nama ngyu awpa châ vei.

²⁰ Sahroh chapawpa a pataw tuapazy cha, nâmo nata nama chhôhkhazy ta Abeipa ta su â tlyh awpa liata, Abeipa nama Khazohpa hmiakô liata kô chareih nama nie tyh awpa a châ.

²¹ Seina a hneipa, pheisypa tlyma, mochaopa tlyma, seina kheihawhpa rai a hneipa cha, Abeipa nama Khazohpa lâta atheihna ta nama hlâ awpa châ vei.

²² Nama yna khih liata nie aw ei chi ta, sa pathaih leipazy nata pathaihpazy chhao, sasu nata sakhih sazy niepa hawhta pachâpa ta nama nie thei khai aw.

²³ A thisaih deikua nama nie awpa châ vei. Ti hawhta alei liata nama patlai awpa a châ.