RYHPACHANEINA 14 - Mara Bible RV (BSI)

Sa pathaihpa nata pathaih leipa

¹ “Abeipa nama Khazohpa sawzy nama châ. Athihpa châta sasyh namâ â awpa châ leipa ta, nama khipâh sâ ngyupa ta nama patlyh awpa châ vei.

² Abeipa nama Khazohpa châta phopi pathaihpa châ ei chi ta, Abeipa ta ano ryuto châ awpa ta alei chô liata phopi zydua hry tawhta â tlyh eihpa nama châ.

³ “Hmo pasichhihpa rai nama nie awpa châ vei.

⁴ Viahchao, mietaku, mie,

⁵ sakhih, sasu, sakicheihpa, sathawh, râh mie, sawzaw nata tlâh mietaku zy cha nama nie thei aw.

⁶ Sa to a chakie pachiah ta miano ta â pachhaihpa maih nata thie a chaeihpa maih nama nie thei aw.

⁷ A thie chaeih ta, a chaki a pachhaihpazy hry liata, hezy deikua he nama nie awpa châ vei: Râraoseihpa nata pazupi nata pihvao zy he ama thie chaeih ei ta, châhrasala ama chakie miano ta â pachhaih leipa vâta nama châta sa pathaih leipa a châ.

⁸ Vao he a chakie cha a pachhaih ta, châhrasala a thie a chaeih leipa vâta nama châta sa pathaih leipa a châ. A sa nama nie awpa châ leipa ta, thiruapa chhao nama hria awpa châ vei.

⁹ “Ti liata a pahrâpa zydua hry liata hezy he nama nie thei aw: Mathlaw nata phuhlu a hneipa maih nama nie thei aw.

¹⁰ Mathlaw nata phuhlu a hnei leipa cha nie thei aw veih ei chi, nama châta sa pathaih leipa a châ.

¹¹ “Pavaw pathaihpa zydua nama nie thei.

¹² Pahmôhpi, vâkhieh, vâkhieh vyhpa;

¹³ hmôchhih, riarâtaoh chi to, raawh chi to;

¹⁴ vawpô;

¹⁵ valâtla, seihhaohpa, pahmôh chyhpa chi to;

¹⁶ vaku chyhpa, tutahlupa, vaku ki hneipa;

¹⁷ ti pavaw daoh laipa, vâkhieh chapaipa, nga a niepa tyhphy;

¹⁸ vawpô nata riasi chizy, nôpinô nata pazu tâbalâpa zy cha nama châta sa pathaih leipa ama châpa vâta, nama nie awpa châ vei.

¹⁹ Mathlaw hnei ta, a pô ta a ypa lôvâpa zydua nama châta sa pathaih leipa châ ta, nie awpa châ vei.

²⁰ Mathlaw hneipa sa pathaihpa zydua nama nie thei.

²¹ “Ano kho ta a thipa sa kheihawhpa hmah nama nie awpa châ vei. Nama khihzy liata a ypa chihropa nie awpa ta pie thei ei chi ta, râh hropa chyhsa hnohta nama zuah thei hra. Nâmo cha Abeipa nama Khazohpa châta phopi pathaihpa nama châ. Mie taw sa cha a panô sâhpiti ta nama chhoh awpa châ vei.

Su hrawh su kha ryhpa

²² “Kô chareih nama lyu kôvei zydua tawhta su hrawh su kha nama pie tyh awpa a châ.

²³ Abeipa nama Khazohpa china châh nama pahno lymâ thei nawpa ta, nama sâh, nama kresawhti, nama sathaw nata nama viahchao hri nata nama mietaku zaw hry liata a pataw tua chaipazy tawhta su hrawh su kha cha, Abeipa nama Khazohpa ta a moh y nawpa ta â tlyh awpa su liata, ano hmiakô liata nama nie tyh aw.

²⁴ Abeipa nama Khazohpa ta byhnâ a cha pie ti ei ta, Abeipa nama Khazohpa ta a moh y nawpa ta â tlyh awpa su cha, nama yna tawhta a hla kawpa châ sala, su hrawh su kha cha, cha lâ a cheih thei awpa nama châ vei khiahta cha,

²⁵ tâkâ lâta nama palie aw. Tâkâ cha cheih aw chi ta, Abeipa nama Khazohpa ta su â tlyhpa lâ nama pangai aw.

²⁶ Tâkâ cha Abeipa nama Khazohpa ta a moh y nawpa ta â tlyh awpa su liata nama palôh khopa maih chalei nawpa ta nama hmâh aw. Viahchao tlyma, mietaku tlyma, kresawhti tlyma, kresawhti patapa tlyma, nama palôh khopa maih chalei aw ei chi ta, cha liata Abeipa nama Khazohpa hmiakô liata nâmo nata na chhôhkhazy nie aw ei chi ta, thaphapa ta nama y aw.

²⁷ Livai chizy cha nâmo hawhta tovyuh nata ryuto ama hnei hra leipa vâta, nama yna khih liata Livai chi a ypazy nama my awpa châ vei.

²⁸ “Kô thôh chhâna maihta, cha kô liata kôvei zydua tawhta su hrawh su kha vaw cheih aw ei chi ta, nama yna khih liata nama pahmaoh aw.

²⁹ Nâmo hawhta tovyuh nata ryuto a hnei leipa Livai chi nama khih liata a ypazy, mapaihpazy, paw hnei leipazy nata nôhmeizy a vy aw ei ta, nie aw ei ta, rihbiepa ta ama y aw. Chatanachata Abeipa nama Khazohpa ta nama ku raihria zydua liata byhnâ a cha pie aw ei.