RYHPACHANEINA 13 - Mara Bible RV (BSI)

Nothlahpa a chhy lei awpa ta zikyurâna

¹ “Nama hry liata hrohsopa tlyma, mâ sapa ta chhochhieliena bie a reihpa tlyma vaw pua ei sala, ngiana tlyma, hmonoâhpa tlyma cha pamosa ei sala,

² ngiana nata hmonoâhpa ama cha chhopazy cha vaw tlô sala, nama hnohta, “Khazoh hropazy pazi sih la, âmo cha chakao ei suh u,” tahpa ta nama pahno beih leipa khazohzy pazi awpa ta ama cha chho khiahta cha,

³ cha hrohsopa bie tlyma, mâ sapa ta chhochhielietuhpa bie tlyma cha nama nathlie awpa châ vei. Abeipa nama Khazohpa ta ano cha nama pathipalôh tlokhuh ta nata nama thlahpa tlokhuh ta kyh nama pachâ ma, pachâ vei ma, tahpa a pahno khohpa vâta a cha pasiapa ei a châ.

⁴ Abeipa nama Khazohpa pazi aw ei chi ta, ano cha chipa ta, a biepiepazy nama zyh awpa a châ. A ao nathliepa ta, ano chakao aw ei chi ta, ano cha khâchâ namâ patu awpa a châ.

⁵ Cha hawhpa hrohsopa tlyma, mâ sapa ta chhochhieliena bie a reihpa tlyma deikua cha, Izi râh tawhta châ kaw chhi papuatuhpa, sei châna o tawhta châ chatlaituhpa Abeipa nama Khazohpa adyuhna bie reih ta, Abeipa nama Khazohpa ta a chhih awpa ta bie a cha piepa ei lâpi tawhta patleisa a châ chhuahpa vâ ei ta, thie awpa a châ. Cha hawhna chata hmo pha leipa cha nama hry tawhta nama pahlei ha aw.

⁶ “Na nô sawchapawpa na unawhpa ta tlyma, na sawchapaw ta tlyma, na sawchanô ta tlyma, na kalachhôh liata na lapinô ta tlyma, na hrona tlu ta kyh na pachâpa na viasa pha chaipa ta tlyma ta, ‘Vawh sih la, khazoh hropazy chakao ei suh u,’ tahpa ta, nâ nata châ pathlatuhpazy ta nama pahno beih leipa khazoh a chhy awpa ta arulâta a cha reipasao khiahta cha,

⁷ lâhnia liata a ypa nama chheipâh phopizy khazoh rai châ sala, lâhla liata a ypa khazoh rai châ sala, alei chhâna hiakha lâ tawhta hiakha lâ taihta a ypa khazoh a châpa chhao ta,

⁸ a rei na zyh awpa châ leipa ta, a bie na nathlie awpa châ hra leipa ta, na ngia a cha chhie awpa châ vei. Na phih awpa nata na nyu awpa châ hra vei.

⁹ Na thie thlyu awpa a châ. Thie awpa ta nâ ta a chô liata na ku pathla tua chai aw chi ta, cha khai tawhta zawpi ta a chô liata ku ama pathla aw.

¹⁰ Izi râh tawhta châ kaw chhi papuatuhpa, sei châna o tawhta nâmo châ kaw chhituhpa Abeipa nama Khazohpa tawhta patleisa a châ chhuahpa vâ ei ta, alô ta nama vawhsao awpa a châ.

¹¹ Chatanachata Izarei saw zydua ta thei aw ei ta, chi aw ei ta, nama hry liata cha hawhpa moleina chichhihpa cha tao khao aw veih ei.

¹² “Abeipa nama Khazohpa ta pahrâ nawpa ta a cha piepa ei nama khihpi miakha liata bie ama reipa thei u la,

¹³ nama hry tawhta moleipazy pua ei ta, nama pahno beih leipa khazoh hropazy a chhy awpa ta ama khihpi liata a pahrâpazy ama paviasa tahpa nama thei khiahta cha,

¹⁴ patluah aw ei chi ta, nama tlua aw. Pakhâta ta hiahri aw ei chi ta, biedopa châ sala, cha hawhpa hmo pasichhihpa cha nama hry liata taopa a châ tahpa pahno pasiapa a châ khiahta cha,

¹⁵ cha khihpi liata a pahrâpazy cha zaozi ta nama thie thlyu awpa châ ta, khihpi chhôh liata a ypa zydua nata sahroh zydua zaozi ta nama pahleipadia khai awpa a châ.

¹⁶ Hraona sôh zydua khihpi tlyliah khophie liata pahmaoh aw ei chi ta, khihpi nata hraona sôh zydua cha Abeipa nama Khazohpa lâta raopa hlâna ta tlokhuh mei ta nama rao khai aw. Cha khihpi cha chhâzaw ta lei byuhpa ta y aw ta, sa pathi heihpa châ khao aw vei.

¹⁷ Hraona sôh hmoziehpazy kheihawhpa hmah nama hria awpa châ vei. Chatanachata Abeipa cha a hiehâhna ru ngaitapa tawhta a palôh pananopa ta, a zawngiahna nama chô liata palâsa aw ta, châ pathlatuhpazy hnohta bie â taihpa hawhta, cha ngiachhie aw ei ta, a cha papôh aw ei.

¹⁸ Cha hawhta a châ thei nawpa ta, Abeipa nama Khazohpa ao nathlie aw ei chi ta, a mohmô liata hmo dopa taopa ta, tanoh ta ei cha piepa ei Abeipa nama Khazohpa biepiepa zydua he nama zyh khai awpa a châ.