RYHPACHANEINA 12 - Mara Bible RV (BSI)

Abeipa atlyhpa achhyna su

¹ “Hezy he, alei chô liata nama hro chhôh zydua ta, Abeipa, châ pathlatuhpazy Khazohpa ta hnei awpa ta a cha piepa ei râh liata pakhâta ta nama zyh awpa bieraopazy nata pachianazy a châ.

² Nama pho awpa phopizy ta tlâh sâhpazy nata tlâh byuhpazy liata nata tho hrohpa to ry liata ama khazohzy ama chakaona su zydua nama parao khai awpa a châ.

³ Ama maisâhzy pacho aw ei chi ta, ama lôbôzy a tlawh ta phychheih aw ei chi ta, ama Aseri tôhzy mei ta nama rao aw. Ama khazoh nothlahpazy chhawh pachhô aw ei chi ta, cha su tawhta ama moh nama pahlei ha aw.

⁴ Âmo taozie hawhta, Abeipa nama Khazohpa cha namâ chhy awpa châ vei.

⁵ “Abeipa nama Khazohpa ta nama chi zydua hry liata a moh y nawpa ta â tlyhpa, a pahrâ nawpa su tlua aw ei chi ta, cha su lâ cha nama pangai tyh aw.

⁶ Cha liana chata nama raopa hlânazy, namâ theihnazy, nama su hrawh su khazy, nama chalopa hlânazy, nama bietaizy, nama lôhthai hlânazy, nama viahchao hri nata mietaku zaw hry liata a pataw tua chaipa zy nama vaw cheih awpa a châ.

⁷ Cha liata Abeipa nama Khazohpa hmiakô liata nie aw ei chi ta, Abeipa nama Khazohpa ta nama ku raihria maih liata byhnâ a cha piepa vâ ei ta, nâmo nata nama chhôhkhazy thaphapa ta nama y aw.

⁸ “Tanoh ta eima taozie hawhna heta, chyhsa to âmo ta pha ama tahpa hawhta ama tao awpa châ vei,

⁹ Abeipa nama Khazohpa ta a pahâ nawpa nata ryu châta a cha piepa ei râh nama tlô mâh leipa vâta.

¹⁰ Châhrasala Zawdâh chaka aw ei chi ta, Abeipa nama Khazohpa ta ryuto châta râh a cha piepa liata nama pahrâ tita, nama chheipâh liata nama chariahpa zydua tawhta cha pahâsa aw ei ta, â bohpa ta nama y aw.

¹¹ Hmohlâpa kyh liata nama hnohta ei biepiepa zydua, nama raopa hlânazy, namâ theihnazy, nama su hrawh su khazy, nama chalopa hlânazy nata Abeipa lâta bie namâ taihpa hmo phapazy cha, Abeipa nama Khazohpa ta a moh y nawpa ta â tlyh awpa su liata nama hlâ tyh aw.

¹² Chatanachata nâmo nata nama sawchapawzy, nama sawchanôzy, nama seichapawzy, nama seichanôzy nata nama hry liata tovyuh nata ryuto râh a hnei leipa Livai chi nama khih liata a ypazy chhao, Abeipa nama Khazohpa hmiakô liata thaphapa ta nama y aw.

¹³ Nama raopa hlânazy cha, su rypaohpa nama hmôpa maih liata hlâ thlâh lei awpa ta a vaih teh u.

¹⁴ Nama raopa hlânazy cha, nama chizy hry tawhta Abeipa ta â tlyh awpa chi pahrâna su liata hlâ tyh aw ei chi ta, cha liata nama hnohta ei biepiepa zydua nama tao tyh aw.

¹⁵ “Chatahrasala Abeipa nama Khazohpa ta byhnâ a cha piepa hawh ei ta, nama khihzy liata sa thie thei aw ei chi ta, nama khopa hawhta a sa nama nie thei aw. Sa pathaih leipazy nata pathaihpazy nie thei khai aw ei chi ta, zuneihpa nata sakhih sazy nama niepa hawhta nama nie thei aw.

¹⁶ Thisaih deikua nama nie awpa châ vei. Ti hawhta alei liata nama patlai awpa a châ.

¹⁷ Nama sâh, nama kresawhti, nama sathaw nata nama viahchao hri nata mietaku zaw hry liata a pataw tua chaipazy tawhta su hrawh su kha, nama bietai hmopiepazy, nama lôhthai hmopiepazy nata hmohlâ eihpazy chhao nama khih liata nama nie awpa châ vei.

¹⁸ Nâmo nata nama sawchapawzy, nama sawchanôzy, nama seichapawzy, nama seichanôzy nata Livai chi nama khih liata a ypazy ta, Abeipa nama Khazohpa ta su a rao awpa liata nie aw ei chi ta, nama ku raihria theilâpa cha, Abeipa nama Khazohpa hmiakô liata thaphapa ta nama nie aw.

¹⁹ Nama râh liata nama pahrâ chhôh ta, Livai chi pathlua lei awpa ta a vaih teh u.

²⁰ “Nama hnohta a bietai hawhta, Abeipa nama Khazohpa ta nama râh a pakawh tita, nama aoh liata sa a chhaoh sala, “Sa eima nie aw,” nama tah khiahta cha, nama khona daihti maihta sa nama nie thei aw.

²¹ Abeipa nama Khazohpa ta a moh y nawpa ta â tlyh awpa su nata namâ hla tu khiahta cha, nama hnohta ei biepiepa hawhta, Abeipa ta a cha piepa ei nama viahchao hri nata mietaku zaw hry liatapa thie aw chi ta, nama khona daihti maihta nama khih liata nama nie thei aw.

²² Zuneihpa sa nata sakhih sazy nama niepa hawhta nie aw chi ta, sa pathaih leipa nata pathaihpa nama nie thei khai aw.

²³ Thisaih deikua cha a nie rai ta nama nie awpa châ vei. Thisaih cha hrona châ ta, hrona cha sa nata nama nie pâ awpa châ vei.

²⁴ Thisaih nama nie awpa châ vei. Thisaih cha ti hawhta alei liata nama patlai awpa a châ.

²⁵ Thisaih nama nie awpa châ vei. Cha cha Abeipa mohmô ta hmo dopa nama taopa châ aw ta, nâmo nata nama pathla vaw y lymâ awpazy châta a pha aw.

²⁶ Nama hlâ awpa hmo pathaihpazy nata pie awpa ta bie namâ taihpazy deikua cha cheih aw chi ta, Abeipa ta su a rao awpa lâ nama sie aw.

²⁷ Nama raopa hlânazy cha Abeipa nama Khazohpa maisâh liata a sapa nata a thisaih nama hlâ aw. Namâ theihna thisaih cha Abeipa nama Khazohpa maisâh liata patlai aw chi ta, a sa deikua cha nama nie thei aw.

²⁸ Cha bie ei cha piepa zydua ei cha pakhâta ta nathlie u la, zyh muh vy. Chatanachata Abeipa nama Khazohpa mohmô ta hmo phapa nata hmo dopa nama taopa châ aw ta, nâmo nata nama pathla vaw y lymâ awpa chhâ zydua châta a pha aw.

Nothlahpa a chhy lei awpa ta zikyurâna

²⁹ “Pho awpa ta nama siehnaopa phopizy cha, Abeipa nama Khazohpa ta nama hmiakô liata chhawh pathlahpa ta, âmo cha pho ei ta ama râh liata nama pahrâ tita,

³⁰ nama hmiakô liata pahleipadiapa ta ama ypa hawhna khata, âmo lâpi a chhihpa ta namâ ao hra lei nawpa ta a vaih u la, ‘He phopizy heta kheihta ma ama khazohzy ama chakao tly? Âmo taozie hawhta kei chhao ei tao hra aw,’ tahpa ta ama khazohzy kyh hiahri khuh vy.

³¹ Abeipa na Khazohpa cha âmo taozie hawhta namâ chhy awpa châ vei. Ama khazohzy amâ chhyzie liata, Abeipa ta â haopa hmo pasichhihpa to tao ei ta, ama sawchapawzy nata ama sawchanôzy taih mei liata raopa ta ama khazohzy lâta ama hlâ tyh.

³² Bie ei cha piepa zydua ei he pakhâta ta nama tao awpa a châ. Nama baichha awpa châ leipa ta, nama thy bâ awpa châ hra vei.