RYHPACHANEINA 11 - Mara Bible RV (BSI)

Abeipa hmotao rônahpazy

¹ “Chavâta Abeipa nama Khazohpa cha kyh pachâ u la, â hnawpazy, a bieraopazy, a pachianazy nata a biepiepazy khâ nama zyh awpa a châ.

² Tanoh pachâ tua u. Abeipa nama Khazohpa chhoreina, a rônahna, a ku thatlôpa nata a bâh pazawhpa zy kha pachâ tua u. A pahno leipa nata a hmô leipa nama sawzy hnohta ei reipa châ vei.

³ Izi râh liata Izi bei Phiraoh chô liata nata a râh zydua chô liata hmonoâhpa a taopazy nata a raihriazy a pahno leipa nata a hmô leipa zy hnohta ei reipa châ vei.

⁴ Izi pheisaihzy nata ama arâzy nata ama talailihzy chô liata a taozie nata, ama châ vaw chadai nota Tilaipi Saihpa ti ta a pavaosapazy nata tanoh taihta Abeipa ta âmo a pahleipadia hapa a pahno leipa nata a hmô leipazy hnohta ei reipa châ leipa ta,

⁵ He su nama vaw tlô hlâlei râhchawhpa liata nama châta a hmotaopa a pahno leipa nata a hmô leipa zy hnohta ei reipa châ hra vei.

⁶ Rubena sawchapawpa Eliabâ sawchapawpa Dâthâ nata Abirâ chô liata a hmotaopa, alei ta a pakah â ta, Izarei saw zydua hry liata âmo nata ama chhôhkhazy cha ama poh ozy nata hmo hrohneipa amâ chhipa zydua chhaota a palâ khai hapa a pahno leipa nata a hmô leipa nama sawzy hnohta ei reipa châ leipa ta,

⁷ nâmo, nama mo tlai ta Abeipa hmo rônahpa taopa zydua a hmôtuhpazy hnohta ei reipa a châ.

Bietai Râh byhnâzy

⁸ “Chavâta thatlôpa ta ypa ta, hnei awpa ta nama pangaipa râh cha nama hnei thei nawpa ta, tanoh ta biepiepa ei cha piepa zydua he nama zyh khai awpa a châ.

⁹ Chatanachata Abeipa ta châ pathlatuhpazy nata ama pathlazy hnohta pie awpa ta bie â vaw taihpa râh, sâhpiti nata kheihti lona râh liata bohpi nama pahrâ thei aw.

¹⁰ Hnei awpa ta nama pangaipa râh cha nama vaw puana Izi râh, âhnalasi sadô liata chi tu ei chi ta nama phei ta ti nama bao tyhpa râh hawhpa kha châ vei.

¹¹ Hnei awpa ta nama pangaipa râh cha tlâhzy nata saikaozy yna râh châ ta, vâsua ti a daopa râh a châ.

¹² Abeipa nama Khazohpa ta a mohôhpa râh châ ta, kô thaby tawhta kô chhâna taihta Abeipa nama Khazohpa mo ta a tawpâpa râh a châ.

¹³ “Chavâta ei biepiepa, tanoh ta ei cha piepazy he ngâchhihpa ta zyh u la, Abeipa nama Khazohpa cha nama pathipalôh tlokhuh ta nata nama thlahpa tlokhuh ta kyhpachâpa ta nama chakao khiahta cha,

¹⁴ nama râh liata a daihtita liata vâsua hmiatuapa nata vâsua hnôhchaipa zy pasuasa tyh aw na ta, chatanachata nama sâh, nama kresawhti nata nama sathaw kôveizy nama pakhy tyh aw.

¹⁵ Nama sahrohzy châta nama lyuzy liata sibiepa paysa aw na ta, nie aw ei chi ta, aoh veipa ta nama y aw.

¹⁶ A vaih teh u, chataleipatala nama palôh dôveipa ta y aw ta, tlei aw ei chi ta, khazoh hropazy chakaopa ta namâ chhy pathlei aw.

¹⁷ Chata a châ khiahta cha, Abeipa pathi nama chô liata ia aw ta, avâ khaw aw ta, avâ sua leipa aw ta, alei ta thei pathei leipa aw ta, Abeipa ta râh phapa a cha piepa tawhta thlai nama leidia aw.

¹⁸ “Chavâta ei biezy he nama palôh nata nama pachâna liata khô aw ei chi ta, ngiana châta nama ku liata chahry aw ei chi ta, nama mo nata mo likawh liata khiriena ta a y awpa a châ.

¹⁹ Nama sawzy pachu aw ei chi ta, nama o liata namâ tyu nota zy, lâpi liata nama sie nota zy, namâ zia nota nata nama thyu daihti zy liata nama reih tyh aw.

²⁰ Nama ochhi tôhzy nata nama kaohraizy liata roh aw ei chi ta,

²¹ chatanachata alei chô lâta avâ a y chhôh zydua cha, châ pathlatuhpazy hnohta pie awpa ta Abeipa ta bie â taihpa râh liata, nâmo nata nama pathlazy châta nama hro nohzy a pasisa aw.

²² Biepiepa ei cha piepa zydua ei he pakhâta ta zyh u la, Abeipa nama Khazohpa cha kyhpachâ u la, a lâpizy a chhihpa ta, ano khâchâ namâ patu khiahta cha,

²³ Abeipa ta phopi zydua he nama hmiakô tawhta cha papuapa aw ei ta, nâmo hlâta maluh hluh viapa nata thatlô viapa phopizy râh cha nama hnei aw.

²⁴ Nama phei pazah ta a tlypa maih cha nama eih a châ aw. Râhchawhpa tawhta Lebanaw taihta, Ufrâti chavah tawhta notla lâ tilaipi taihta nama râh a châ aw.

²⁵ Ahy ta hmah cha pahnie aw veih ei. Nama hnohta a reipa hawhta, Abeipa nama Khazohpa ta nama tlô awpa râh zydua liata nâmo china nata nâmo vâta thlazohna a paysa aw.

²⁶ “Moh teh u, tanoh nama hmiakô liata byhnâ nata chhiesana ei soh hih.

²⁷ Abeipa nama Khazohpa biepiepa, tanoh ta ei cha piepa ei he nama zyh khiahta cha, byhnâ châ aw ta,

²⁸ Abeipa nama Khazohpa biepiepazy cha zyh leipa ta, tanoh ta bie ei cha piepa ei he tleisaipa ta, nama pahno beih leipa khazoh hropazy nama pazi khiah deikua cha, chhiesana a châ aw.

²⁹ Abeipa nama Khazohpa ta hnei awpa ta nama pangaipa râh a cha tlôkhei ti ei ta, Kerizi Tlâh tawhta byhnâ aw aw ei chi ta, Ebâ Tlâh tawhta chhie nama sa aw.

³⁰ Cha tlâhzy cha Zawdâh haosâ, lâpi tawhta notla baih lâ, notla râh, Arabâ liata a ypa Kâna mo râh, Kilkal dady liata Môre thothih kiah liata a ypa tlâhzy a châ.

³¹ Zawdâh chaka aw ei chi ta, Abeipa nama Khazohpa ta râh a cha piepa ei cha nama kei hnei aw. Cha râh cha hneipa ta, cha liata nama pahrâ tita,

³² tanoh ta nama hmiakô liata ei sopa bieraopa nata pachiana zydua he pakhâta ta nama zyh khai awpa a châ.