RYHPACHANEINA 10 - Mara Bible RV (BSI)

Lôphia mianona

¹ “Cha daihti liata Abeipa ta ei hnohta, ‘Lôphia hmiatuapa hawhna khata lôphia miano khai heih la, kei lâta tlâh lâ a khy la, a khô nawpa thobyh tao mah y.

² Lôphia hmiatuapa na pakei hapazy liata bieropazy kha lôphiazy liata roh heih aw na ta, byh liata na khô aw,’ tah ta.

³ Chatanachata Akeisia tho ta byh tao na ta, hmiatuapa hawhta lôphia miano khai na ta, lôphia miano cheipa ta tlâh lâ khy na ta.

⁴ Abeipa ta lôphia hmiatuapazy liata a ropa, namâ pôhpakhy noh ta tlâh liata mei hry tawhta nama hnohta a reipa Biepiepa Miahrawh kha, lôphiazy liata roh heih ta. Cha cha Abeipa ta na pie ta.

⁵ Chatawhcha a zâ lie na ta, tlâh tawhta za chô na ta, lôphiazy cha byh ei taopa liata khô na ta, Abeipa ta bie eina piepa hawhta cha liata y thlâh ha ta.

⁶ “Izarei sawzy cha Berô Benezakâ tawhta Môserâ lâta sie ei ta. Cha liata Arawna thi ta, cha liata pabu ei ta. A sawchapawpa Eliaza ta ano su liata theihthaipa rai hria ta.

⁷ Cha tawhna chata Kukôdâ lâ sie ei ta, Kukôdâ tawhta chavah ti hluhna râh Zôbathâ lâ sie ei ta.

⁸ Cha daihti liata Abeipa ta Livai chizy cha Abeipa Biehrai Byh a sy awpa nata Abeipa hmiakô liata a duah ta ano chakao awpa nata a moh ta byhnâ a awtuhpa châ awpa ta panano ta, tanoh taihta cha hawhta ama hria lymâ.

⁹ Chavâta Livai cha a unawhzy hry liata tovyuh nata ryuto hnei vei. Abeipa nama Khazohpa ta a hnohta a reipa hawhta, Abeipa cha a ryuto a châ.

¹⁰ “Daihti hmiatuapa liatapa hawhna khata, tlâh liata noh sypalih nata zâ sypalih y na ta. Cha nona chhao chata Abeipa ta ei bie nathlie heih ta. Chavâta Abeipa ta a cha pahleipadia khoh leipa ei a châ.

¹¹ Abeipa ta ei hnohta, ‘Thyu la, phopi kha chhihtha la, ama hmia lâta sie teh. Chatanachata sie aw ei ta, ama pathlatuhpazy hnohta bie ei taihpa râh ama hnei thei aw,’ tah ta.

Khazohpa ta â hnawpa

¹² “Chavâta Hy Izarei, Abeipa nama Khazohpa ta a châ hnawpa ei cha khâpa hropa châ leipa ta, Abeipa nama Khazohpa cha chipa ta, a lâpi zydua a chhih ta, ano kyhpachâ ta, nama pathipalôh tlokhuh ta nata nama thlahpa tlokhuh ta Abeipa nama Khazohpa cha chakao ta,

¹³ nama pha nawpa ta tanoh bie ei cha piepa ei, Abeipa biepiepazy nata bieraopazy zyhpa a châ.

¹⁴ Moh tua u, avâ nata avâ a sâh chaipa nata leilô nata a chhôh liata a ypa zydua he Abeipa nama Khazohpa eih sai a châ.

¹⁵ Cha hawhpa Abeipa chata châ pathlatuhpazy chô liata a palôh tlâh ta, ama kyhpachâ ta, tanoh nama châna hawhna heta, nâmo, ama pathlazy cha phopi zydua chô lâta cha sopa ta, a châ tlyhpa ei a châ hih.

¹⁶ Chavâta nama pathipalôh chopaw tai u la, chhorupa ta y khao khuh vy.

¹⁷ Abeipa nama Khazohpa cha khazohzy Khazohpa, beizy Beipa, Khazoh rônahpa, Khazoh thatlôpa nata chichhihpa, khokhei hlei hnei leipa nata panaopapana hmo a la beih leipa a châ.

¹⁸ Paw hnei leipazy nata nôhmeizy châta â dopa ta pachia ta, mapaihpazy kyhpachâ ta, niedo nata chysiazy a pie ei.

¹⁹ Chavâta mapaihpazy kyh pachâ teh u, nâmo chhao Izi râh liata mapaihpazy nama châ hrapa kha.

²⁰ Abeipa nama Khazohpa cha chi aw chi ta, ano chakao aw chi ta, ano cha khâchâ patu aw chi ta, ano moh ta bie namâ taih awpa a châ.

²¹ Abeipa cha nama reithai awpa a châ. Ano cha nama Khazohpa châ ta, he hmo ronahpa nata rarôh ypa, nama mo ta a hmôpazy a taotuhpa a châ.

²² Châ pathlatuhpazy kha Izi râh lâ sysari ta zu ei ta, tahmâ cha Abeipa nama Khazohpa ta vâ awhsi zie ta hluhpa ta a cha tao ha ei.