RYHPACHANEINA 1 - Mara Bible RV (BSI)

Môabâ bypi liata Ryhpa chaneina

¹ He biezy he Zawdâh nochhi lâ râhchawhpa liata Mawsi ta Izarei saw zydua hnohta a reipazy a châ. Cha su cha Arabâ râh Supha dady liata y ta, hiakha lâ baih liata Pârâ y ta, hiakha lâ liata Tôpheli, Lâbâ, Hazerô nata Dizahâ zy a y.

² Hôribâ tawhta Kâdesbânia cha Seirâ Tlâh lâpi lâta noh hrawh hleikha sie a châ.

³ Izi râh ama puasai tawhta kô sypalihna, thla hrawh hleikhana, noh khana noh liata, Izarei sawzy kyh liata Abeipa ta a hnohta bie a piepa zydua cha, Mawsi ta Izarei sawzy chho ta.

⁴ Cha biezy cha Hesbaw liata a pahrâpa Amawri bei Sihaw a pahnie tawhta nata Astarô nata Edarei liata a pahrâpa Bâsanâ bei Ôkâ a pahnie tawhta Mawsi ta a reipa biezy a châ.

⁵ Zawdâh nochhi lâ Môabâ râh liata, Mawsi ta hetana heta ryhpa a chhopasia.

⁶ “Abeipa eima Khazohpa ta Hôribâ tlâh liata bie miah chho ta, ‘He tlâh liata bohpi tlai nama y haw.

⁷ Chavâta a pasie bâ u la, Amawri tlâh râh lâ nata a chheipâh Arabâ râh lâ zy sie teh u. Tlâh râh, by râh, Neke râh, tilaipi kiah râh, Kâna râh nata Lebanaw râh lâ zy sie u la, chavah laipa Ufrâti chavah taihta sie teh u.

⁸ Moh teh u, nama hmiakô liata râh ei cha sopa ei hih. Sie u la, châ pathlatuhpa Abarahâ, Aisika nata Zakaw nata ama pathla vaw y lymâ awpazy hnohta pie awpa ta Abeipa ta bie â taihpa râh cha kei pahrâ teh u,’ miah tah ta.

Ryureituhpazy raona

⁹ “Cha nota nama hnohta, ‘Kei dei ta cha chhihtha thei khao veih ei na.

¹⁰ Abeipa nama Khazohpa ta cha papôh ei ta, moh teh u, tahmâ cha vâ awhsi zie tlai ta nama vaw pôh haw.

¹¹ Abeipa, châ pathlatuhpazy Khazohpa ta tahmâ ta nama maluh hlâta a lie sâh hluhpi ta cha papôh ei sala, bie a châ taihpa hawh ei ta, byhnâ cha pie mawh ei sy!

¹² Kheihta ma kei dei ta namâ tymânazy, nama phaohrizy nata namâ eichhianazy ei phaoh thei aw?

¹³ Nama chi chyu tawhta chyhsa sopa, hmo a pahno thaipa nata chyhsa zachhihpazy a tlyh u la, nama chô liata hyutuhpazy ta ei tao aw ei,’ tahpa ta cha chho ei na ta.

¹⁴ Nâmo ta, ‘Na reipa cha eima châta tao awpa ta hmo phapa a châ,’ tahpa ta nâ chhy ei chi ta.

¹⁵ Chatanachata nama chi to tawhta chyhsa sopa nata novâhna ta a biepa hyutuhpazy a chhi ei na ta, nama chô liata hyutuhpazy ta ei tao ei. A sâh chô liata hyutuhpazy, a za chô liata hyutuhpazy, sypangawh chô liata hyutuhpazy, pahrawh chô liata hyutuhpazy nata nama chi chhituhpazy ta ei tao ei.

¹⁶ Cha daihti liata, nama ryureituhpazy hnohta biehneina pie na ta, ama hnohta, ‘Nama unawhzy likah biepeipazy nathlie u la, chyhsa nata a unawhpa likah liata â do ngaitapa ta ryureih u la, chyhsa nata a hnohta a ypa chihropa likah liata chhao â do ngaitapa ta ryureih muh vy.

¹⁷ Ryureina liata thlua hlei nama hnei awpa châ vei. Mochyhpa nata molaipa bie â lyupa ta nama nathlie awpa châ ta, ahy hmia hmah nama moh awpa châ vei. Ryureina cha Khazohpa eih a châ. Nama châta bie rupa cha ei hnohta vaw tlôkhei tyh aw ei chi ta, kei ta ei pachia tyh aw,’ tah na ta.

¹⁸ Cha daihti liata, hmo nama tao awpa zydua bie ei cha pie ei.

Izarei ta bietai râh a ngia khoh vei

¹⁹ “Abeipa ta bie miah a piepa hawhta, Hôribâ tlâh tawhta pua pi ta, Amawri tlâh râh lâpi, râhchawhpa kawh ngaitapa nata chichhih ngaitapa nama hmôpa zydua kha siepahlie khaipa ta, Kâdesbânia khih tlô pi ta.

²⁰ Nama hnohta, ‘Abeipa eima Khazohpa ta miah a piepa Amawri tlâh râh nama tlô haw.

²¹ Moh teh u, Abeipa nama Khazohpa ta nama hmiakô liata râh a cha sopa ei. Khy u la, Abeipa, châ pathlatuhpazy Khazohpa ta a cha chhopa hawhna ei khata, râh cha kaw pahrâ teh u. Chi leipa u la, riahchhiepa ta y hra khuh vy,’ cha tah ei na ta.

²² Nama zydua ta nâ vaw hnia ei chi ta, ei hnohta, ‘Râh kaw mohparu ta, lâpi eimâ chhih awpa nata khihpi eima chapia awpazy kyh miah za tlôkhei awpa ta, eima hmia lâta chyhsazy tuah ei suh u,’ tah ei chi ta.

²³ Cha hmo chata na palysa ta, nama hry tawhta chyhsa pahrawh hleino, chi kha tawhta pakha lymâ ta a tlyh na ta.

²⁴ Pua ei ta, tlâh râh lâ cha khy ei ta, Eskaw Saikao tlô ei ta, râh cha mohparu ei ta.

²⁵ Cha râh liata theilâpazy lyu ei ta, za phaoh ei ta, ‘Abeipa eima Khazohpa ta râh miah a piepa cha, râh pha ngaitapa a châ,’ tahpa ta bie ama za tlôkhei.

²⁶ “Châhrasala khy khoh leipa ei chi ta, Abeipa nama Khazohpa biepiepa cha zyh khoh veih ei chi.

²⁷ Nama poh o liata paphôh ei chi ta, ‘Abeipa ta miah â haopa vâta Amawri mo ku liata miah hlâ ta, miah pahleipadia awpa ta Izi râh tawhta miah â kaw chhi papua hih.

²⁸ Khataih lâ cha ma eima khy aw? Eima unawhzy ta, “Cha phopi cha keimo hlâta pahreih via ei ta, ama doh chhao a sâh via ta, ama khihpizy lai kaw ta, avâ a daihpa thokhyzy ta amâ dôh. Anâki pathlazy chhao eima hmô,” tah ei ta, eima hnabei miah ama pady khai haw,’ tah ei chi ta.

²⁹ Kei ta nama hnohta, ‘Nama nô a papo leipa u la, âmo cha chi khuh vy.

³⁰ Nama hmia lâta a siepa Abeipa nama Khazohpa ta, Izi râh liata nama mohmô lia tlai ta nama châta a taopa hawhna khata, a châ dyuhpa aw ei.

³¹ Chyhsa ta a sawchapawpa a pipa hawhta, Abeipa nama Khazohpa ta râhchawhpa liata cha pi laih ei ta, he su nama vaw tlôna taihta lâpi tlykha ta a cha pi lymâpa ei nama hmôpa hawhna khata,’ tah na ta.

³² Chatanachôta Abeipa nama Khazohpa cha ngâ veih ei chi.

³³ Nama poh o parai nawpa tluapa ta nama hmia lâta sie ta, zâ ta mei ta, nohchhô ta meihdo ta cha chhihthapa ta, nama siena lâpi châ pahmôtuhpa Abeipa nama Khazohpa cha ngâ veih ei chi.

Izarei sawzy hriena

³⁴ “Abeipa ta nama bie reipazy cha thei ta, a pathi ia ta,

³⁵ ‘He chhâ moleipazy hry tawhta ahy hmahta châ pathlatuhpazy hnohta pie awpa ta bie ei taihpa râh phapa cha hmô aw veih ei.

³⁶ Zephune sawchapawpa Kâlebâ deikua cha, tlokhuh ta Abeipa a zipa vâta, râh phapa cha hmô aw ta, a tlypa râh cha ano nata a sawzy ei pie aw ei,’ tahpa ta bie a taih ta.

³⁷ Nâmo vâta Abeipa cha keima chô liata chhao a pathi ia ta, ei hnohta, ‘Nâ chhao, cha râh cha a ngia aw va chi.

³⁸ Châ chakaotuhpa Nunâ sawchapawpa Zawsua deikua â ngia aw. Ano kha pasyu mah y. Ano ta râh cha ryu ta Izarei a patosa aw.

³⁹ Chariah ta ama patu aw nama tahpa hawtizy nata chhie nata pha a pahno mâh leipa tanoh nama sawzy heta a ngia aw ei ta, râh cha âmo pie aw na ta, âmo ta ama hnei aw.

⁴⁰ Nâmo deikua cha a lie u la, Tilaipi Saihpa lâpi a chhihpa ta râhchawhpa lâta sie teh u,’ tah ta.

Hômâ liata Izarei pahniepa a châ

⁴¹ “Chatawhcha nâmo ta, ‘Abeipa chô liata eima vaw molei haw. Abeipa eima Khazohpa ta bie miah a piepa hawhta, khy aw pi ta eimâ kaw dyuh aw,’ tah ei chi ta. Nama zydua ta chariah chhaichhi a tobi ei chi ta, tlâh râh lâ khypa cha hmo naopa hawhta pachâ ei chi ta.

⁴² Abeipa ta, ‘Ama hnohta reih teh, khy leipa u la, a kaw dyuh hra khuh vy. Nama hry liata y tlôh leipa aw na ta, nama chariahpazy ta ama cha pahnie pathlei aw,’ na tah ta.

⁴³ Cha chho ei na ta, châhrasala nathlie khoh veih ei chi. Abeipa biepiepa chakhia ei chi ta, tlâh râh lâ nama khy raruah.

⁴⁴ Tlâh râh liata a pahrâpa Amawri mo ta châ vaw dyuh ei ta, kheih hripi ta chyhsa amâ chadaipa hawhta cha chadai ei ta, Seirâ tawhta Hômâ taihta ama cha thie lymâ.

⁴⁵ Vaw kua ei chi ta, Abeipa hmiakô liata cha ei chi ta, châhrasala Abeipa ta nama ao nathlie leipa ta, nâmo lâta a nah pachôh khoh khao vei.

⁴⁶ Chavâta Kâdesâ liata noh hluhpi châh ei chi ta, noh hluhpi tlai cha liata nama ypa kha a châ.