RUTHI 4 - Mara Bible RV (BSI)

Bôaza ta Ruthi a chatlai

¹ Bôaza cha khihpi thokhy chhikao lâ khy ta, cha liata a tyuh ta. Bôaza reipa ama heinawh hniapa cha a vy ta. Bôaza ta a hnohta, “Unawh, he lâ a vy la, a vaw tyuh tua,” tah ta. Cha chyhsa cha vawh ta, a kei tyuh ta.

² Bôaza ta khihpi machâzy hry tawhta pahrawh a chhi ta, ama hnohta, “He liata a tyuh teh u,” tah ta, a tyuh ei ta.

³ Chatawhcha heinawh hniapa hnohta, “Môabâ râh tawhta a vaw kuapa Naomi ta eima unawhpa Elimele râh kha zuah ta.

⁴ Cha kyh cha nâma cha chho ta, he liata a tyuhpazy mohmô liata nata ei chiheih machâzy mohmô liana heta, râh cha nâ ta na chalei awpa ta cha chho awpa ei khoh. Na chatlai awpa khiahta cha, chatlai la, na chatlai lei awpa khiahta deikua cha, na chatlai khoh leipa ei pahno thei nawpa ta, na chho mah y. Nâma leipa ta cha a chatlai hro awpa y veih ei. Kei he nâma châ pazipa ei châ,” tah ta. Cha chyhsa chata, “Ei chatlai aw,” tah ta.

⁵ Bôaza ta, “Naomi ku tawhta lyu na chalei noh ta, Môabâ zuah Ruthi, athipa nôhmei chhao na hnei pâ awpa a châ. Chatanachata athipa moh cha lei leipa aw ta, a ryuto râh liata a y lymâ aw,” tah ta.

⁶ Heinawh hniapa ta, “Kei la, cha râh cha chatlai thei aw va na, chataleipatala keima ryuto tlao ei parao pathlei aw na. A chatlai thei awpa ei châna tovyuh cha nâ ta to mah y. Kei ta la chatlai thei aw va na,” tah ta.

⁷ Hlâno Izarei daihti liata cha, hmo chatlai awpa nata a ri awpa kyhzy liata, hetana heta ama vaw tao tyh. Hmo amâ hlâpa pa-i nawpa ta, pheiky pahluh ei ta, amâ pie tyh. Cha hawhna chata bie pa-ina châta Izarei liata tao tyhpa a châ.

⁸ Chavâta heinawh hniapa ta Bôaza hnohta, “Nâma ta tlao chalei teh,” tah ta, a pheiky pahluh ta, Bôaza cha pie ta.

⁹ Bôaza ta machâzy nata zawpi zydua hnohta, “Elimele hmo hneipa zydua nata Khilô nata Mâhlô hmo hneipa zydua cha, Naomi ku tawhta tanoh ei chalei haw tahpa nâmo sahlao he pahnokheituhpazy nama châ.

¹⁰ Cha dei châ vei, athipa cha a ryuto râh liata a moh a lei lei nawpa nata athipa moh cha a unawhzy tawhta nata a liahritlona khih thokhy chhikao tawhta chhawh pathlahpa ta a y lei nawpa ta, Mâhlô ta a panôhmeipa Môabâ zuah Ruthi chhao ei lapinô châta ei chalei haw. Tanoh nâmo he pahnokheituhpazy nama châ,” tah ta.

¹¹ Khihpi hawka liata zawpi zydua nata machâzy ta, “Pahnokheituhpazy eima châ. Na o liata chanô a vaw ngiapa cha, Izarei phopi hmaohkha ta a paduapa Râkheli nata Liah hawhna khata Abeipa ta tao mawh sy. Ephrâthâ liata na nohâh y sala, Bethlehe liata na moh pathâh mawh sy.

¹² Abeipa ta he laihsa liata chipathla cha pie aw ta, ano liana chata, na pathlazy cha Tâmâri ta Zudâh châta a sapa Pereza pathlazy hawhta vaw châ mawh ei sy,” tah ei ta.

Bôaza ta Ruthi a hnei

¹³ Chatawhcha Bôaza ta Ruthi cha a chhi ta, a lapinô vaw châ ha ta. A zialâh ta, Abeipa ta saw paphaosa ta, sawchapaw sa ta.

¹⁴ Chanôzy ta Naomi hnohta, “Tanoh heinawh hniapa hnei leipa ta châ paysa leipa Abeipa cha reithaipa ta y sala, a moh Izarei liata pathâh mawh sy!

¹⁵ Ano cha hrona châ pie pathituhpa châ aw ta, na machâ râhsâ ta châ chyhtuhpa a châ aw. Kyh châ pachâpa na myuhnô, sawchapaw pasari hlâta na châta a pha viapa ta ano cha a sa ha hih,” tah ei ta.

¹⁶ Naomi ta hawsaih cha la ta, a byh liata pazia ta, hawsaih cha ano ta mohôh ta.

¹⁷ Ama opa chanôzy ta a moh bipa ei ta, “Naomi châta sawchapaw a vaw pih haw,” tah ei ta, a moh Ôbedâ ama bi. Ôbedâ cha Zese paw châ ta, Zese cha Dâvi paw a châ.

Dâvi thyutôna

¹⁸ Hezy he Pereza pathlazy ama châ: Pereza ta Hezrô sa ta,

¹⁹ Hezrô ta Râmi sa ta, Râmi ta Aminadâ sa ta,

²⁰ Aminadâ ta Nâsô sa ta, Nâsô ta Salmô sa ta,

²¹ Salmô ta Bôaza sa ta, Bôaza ta Ôbedâ sa ta,

²² Ôbedâ ta Zese sa ta, Zese cha Dâvi paw a châ.