RUTHI 3 - Mara Bible RV (BSI)

Ruthi nata Bôaza sawhri liata

¹ Chatawhcha a nohnô Naomi ta Ruthi hnohta, “Ei sawchanô y, na châta a pha awpa apahâna su cha tluapa aw va na ma?

² A laihsazy hnohta kâmo na thohna paw Bôaza kha eima heinawh hniapa a châ. Moh teh, tazâ cha sawhri liata bâli sâh a zie aw.

³ Na ngai a si la, sathaw a thu la, na chysia a tobi la, sawhri lâ cha zu mah y. A nie a do khai hlâlei deikua cha, nâ pahnosa awpa châ vei.

⁴ Â zia tita, â ziana su ngia la, vawh la, a phei lâ poh kei hy la, a kei zia mah y. Ano ta na tao awpa a cha chho aw,” tah ta.

⁵ Ruthi ta, “Na reipa zydua cha ei tao aw,” tah ta.

⁶ Ruthi cha sawhri lâ zu ta, a nohnô biepiepa hawhta tao ta.

⁷ Bôaza cha nie ta a doh khai nahta, a palôh a ly ngaita ta, vawh ta sâh pathluna chhâna liata a kei zia ta. Ruthi cha a zyhta ta vawh ta, a phei lâta poh cha hy ta, a phei thaby liata a zia ta.

⁸ Zâcho ta khâpa tlyma ta Bôaza cha pahra ta, a palie ta, chanô pakha tlai cha a phei thaby liata a vaw zia thlâh ha ta.

⁹ “Ahy na châ?” tah ta. Chanô ta “Châ chakaotuhnô Ruthi ei châ. Heinawh hniapa châ chi ta, chavâta châ chakaotuhnô he na poh na hy teh,” tah ta.

¹⁰ Bôaza ta, “Ei sawchanô y, Abeipa ta byhnâ cha pie mawh sy! Satlia sipasapa tlyma, hneirôhpa tlyma, na pazi leina liana heta, hmia lâta hmo pha na taopa hlâna chhao khata, tahmâ ta na hmo pha taopa he a rônah via syulyu.

¹¹ Chavâta ei saw­chanô y, chi khah y, na reipa zydua cha na châta ei tao aw, eima khih chyhsa zydua ta chanô sia ngaitapa na châzie ama pahno khai.

¹² Heinawh hniapa cha ei châ tlai. Châhrasala kei hlâta heinawh hnia viapa pakha y ta.

¹³ Tazâ cha y thlâh ha tua tlai la, mylâ my ta, heinawh hniapa ta na chô liata a tao awpa cha, ano ta a tao khoh khiahta cha a pha, ano ta heinawh hniapa tao awpa cha tao mawh sy. Châhrasala heinawh hniapa tao awpa na chô liata a tao khoh vei khiahta cha, Abeipa hrona reipa ta ei reih, heinawh hniapa tao awpa cha, kei ta na chô liata ei tao aw. Khihdei hlâlei cha a zia thlâh ha mah y,” tah ta.

¹⁴ Chatanachata khihdei hlâlei cha a phei thaby liata a zia ta, chyhsa hmiasiah thei hlâta thyu ha ta. Bôaza ta, “Chanô sawhri lâ â vy tahpa chyhsa ta pahno khah ei se,” tah ta.

¹⁵ Chatawhcha Bôaza ta Ruthi hnohta, “Na poh kha vaw cheih la, vaw dao teh,” tah ta. A poh cha dao ta, bâli sâh saikhua hmo charu panuapa ta, patlai ta, paphaosa ta, khih lâ sie ha ta.

¹⁶ A nohnô kô a tlô nahta, a nôhno ta, “Ei sawchanô, kheihta ma na chhichâ?” tah ta. Bôaza ta a chô liata a taopa zydua cha, Ruthi ta a nohnô chho ta.

¹⁷ “He bâli sâh saikhua hmo charu he na pie ta, ‘Na nohnô lâ ku ruapa ta nâ di awpa châ vei,’ eina tah,” tah ta.

¹⁸ Naomi ta, “Ei sawchanô y, kheih hawhta ma hmo a vaw y aw tahpa na pahno hlâlei cha, hâ thla ha mah y. Cha hmo cha tanoh tlai ta a tao khai hlâlei cha, cha chyhsa cha a chalih aw vei,” tah ta.