RUTHI 2 - Mara Bible RV (BSI)

Ruthi nata Bôaza

¹ Naomi cha a vahpa heinawh a hniapa pakha hnei ta, ano cha Elimele phoheihpa chyhsa sia kawpa châ ta, a moh cha Bôaza a châ.

² Môabâ zuah Ruthi ta Naomi hnohta, “Lyu lâ sie aw na ta, a mohmô liata ngiachhiena ei hlaopa lyu liata kâmo ei kei tho aw,” tah ta. Naomi ta a hnohta, “Ei sawchanô y, sie mah y,” tah ta.

³ Ruthi cha a thao ta, sie ta, lyu liata sâh hriatuhpazy hnôh lâta kâmo thoh laih ta. Elimele phoheihpa Bôaza lyu liata kei sie chho ta.

⁴ Bôaza cha Bethlehe tawhta vaw tlô ta, sâh hriatuhpazy hnohta, “Abeipa nama hnohta y mawh sy!” tah ta. Âmo ta, “Abeipa ta byhnâ cha pie mawh sy,” tahpa ta a chhy ei ta.

⁵ Bôaza ta a chakaotuhpa, sâh hriatuhpazy hyutuhpa hnohta, “He laihsa he ahy eih ma a châ tly?” tah ta.

⁶ Sâh hriatuhpazy hyutuhpa ta a chhy ta, “Môabâ laihsa, Môabâ râh tawhta Naomi hnohta â vypa a châ.

⁷ ‘Ngiachhiepa ta kâmo na pathohsa la, sâh hriatuhpazy hnôh lâta sapiahzy hry liata ei tho laih aw,’ na tah ta. A vy ta, buakha â pahâpa tah leipa ta cha, my tawhta tahmâ taihta a hria pazao lymâ,” tah ta.

⁸ Bôaza ta Ruthi hnohta, “Ei sawchanô y, a phapa ta nathlie teh, kâmo thoh awpa ta lyu hro lâ sie leipa la, he tawhna heta a pasie leipa la, keima laihsazy kiapâh liana heta y thlâh ha mah y.

⁹ Sâh ama hria ngâna su moh la, âmo cha pazi laih mah y. Satliazy ta kheihta hmahta ama cha tah lei nawpa ta, bie ei pie ha ei. Na dâh a phi tita, tibyhzy sona lâ vawh la, satliazy thai chiehpa ti doh lymâ mah y,” tah ta.

¹⁰ Ruthi cha â khu lâta pao ta, alei lâ a bôh ta, Bôaza hnohta, “Chihropa châ na ta, châhrasala na pahno khoh chi ta, na mohmô liata ngiachhiena ei vaw hlao thlâh hapa he kheihtazie ta ma a châ tly?” tah ta.

¹¹ Bôaza ta a chhy ta, a hnohta, “Na vahpa a thi tawhta na nohnô chô liata na hmotaozie zydua â kipa ta na chho khai ha ei ta, na nô nata na paw nata na pina râh zy vaw siesaipa ta, na pahno beih leipa phopi lâta nâ vypa chhao eina chho khai ha ei.

¹² Na hmotaopazy cha Abeipa ta cha thô sala, nâ boh nawpa ta a mathlaw ry liata nâ vaw ngiapa Abeipa Izarei Khazohpa ta lymâ kipa cha pie mawh sy!” tah ta.

¹³ Ruthi ta, “Ei zibeipa y, na mohmô liata khokheina ei hlaopa a châ hih! Na laihsazy hry liata a hlao pha vei hraw sah la, châ chakaotuhnô he thlah na palôh chi ta, reikah phapa ta bie einâ chho chi hih,” tah ta.

¹⁴ Pati nie â vaw daih nahta, Bôaza ta Ruthi hnohta, “He lâ a vy la, viahchhâzy he vaw nie la, na viahchhâ tlâzy kha kresawhti thaopa liana he vaw ny teh,” tah ta. Chatanachata Ruthi cha sâh hriatuhpazy kiapâh liata a tyuh hra ta, Bôaza ta viahchhâ pakâhpa pie ta. A py biena taih nie ta, a nie laibâhpa chhao a y.

¹⁵ Ruthi cha kâmo thoh heih awpa ta â thao nahta, Bôaza ta a satliazy hnohta, “Sapiahzy hry liata sâh su chhao palasa u la, pakhâ khuh vy.

¹⁶ Sapiah liata sâh suhzy chhao thaopa u la, ano a hua awpa ta siesai raruah u la, ra khuh vy,” tah ta.

¹⁷ Ruthi cha lyu liata zâlâ taihta kâmo cha tho ta. Sâh suh a pakhypazy cha chakhyh ta, bâli sâh kachu hmo kha rachhôh a châ.

¹⁸ Sâh cha phaoh ta, khihpi lâ sie ta. A kâmo thohpa cha a nohnô ta hmô ta. A py a bie tawhta a nie laibâhpa a vaw phaopa cha a nohnô pie ta.

¹⁹ A nohnô ta a hnohta, “Khataih liata ma tanoh kâmo na tho? Khataih liata ma na hria? Châ pahno khohpa chyhsa cha byhnâ topa ta y mawh sy,” tah ta. Ahy hnohta ma a hria tahpa Ruthi ta a nohnô cha chho ta, a hnohta, “Tanoh rai ei kei hriana paw moh cha Bôaza a châ,” tah ta.

²⁰ Naomi ta a myuhnô hnohta, “Ahrohpa nata athipa chô liata a phana khâ a palâsa tyhpa Abeipa ta ano cha byhnâ pie mawh sy,” tah ta. Naomi ta a hnohta, “Kha chyhsa kha eima heinawh hniapa, miah a chatlaituh awpazy hry liata pakha a châ,” tah ta.

²¹ Môabâ zuah Ruthi ta, “Cha dei châ vei, ei hnohta, ‘Ei sâh ama hria khai hlâlei cha ei satliazy hnohta hria lymâ hra mah y,’ eina tah,” tah ta.

²² Naomi ta a myuhnô Ruthi hnohta, “Ei sawchanô y, ano satliazy hnohta na sie tyh awpa cha a pha na, lyu hropa liata cha ama cha pasasa pathlei aw na,” tah ta.

²³ Chatanachata Ruthi cha Bôaza laihsazy kiapâh lia ypa ta, bâli sâh nata âtâ sâhzy hria khaina taihta kâmo cha tho ta. Ruthi cha a nohnô hnohta pahrâ ta.