RAWMA 9 - Mara Bible RV (BSI)

Khazoh photlyh Izarei phopi

¹ Krista liata biehmeiseihpa ei reih, haih va na. Ei chhie nata pha pahnona ta Thlahpa Pathaihpa liata eina pahnokhei.

² Ei palôh liata rietheina ru ngaitapa nata pachârôhna lei thei leipa ei vao thlâh haw.

³ Ei unawhzy, sapa lâta ei chiheihzy châna heta, kei he chhiesapa ta ypa ta, Krista tawhta chhawh pathlahpa ta y aw sah la ei tah tyh.

⁴ Izarei chyhsa châ ei ta, saw châna, rônahna, biehrai, ryhpa piena, achhyna nata bietai zy âmo eih a châ.

⁵ Pathlatuhzy kha ama mapawzy châ ei ta, sapa kyh lâta cha Krista tlai chhao cha, âmo chi tawhta a vaw puapa a châ. Ano cha ato zydua chô liata Khazohpa châ ta, chhâzaw ta reithaipa ta y mawh sy. Amen.

⁶ Châhrasala Khazohpa bie cha hraoleipa ta a y tahna châ vei. Izarei pathla zydua Izarei châ khai hlei veih ei.

⁷ Abarahâ pathlazy ama châpa vâta, ama zydua ta a sawzy châ khai hra veih ei. “Aisika liana heta na pathlazy a laichadaipa a châ aw,” tahpa tlao a châ.

⁸ Cha yzie cha, sapa sawzy cha Khazohpa sawzy châ leipa ei ta, bietai sawzy cha Abarahâ pathla ta raopa tlao ama châ.

⁹ “Tahmâ daihti hawhpa liana heta vaw tlô heih aw na ta, Sârâ ta sawchapaw a sa aw,” tahpa ta bietai piepa a châ.

¹⁰ Cha dei châ vei, Rebekâ chhao kha chyhsa pakha liata, miah pathlatuhpa Aisika liata maphieh a phao no kha,

¹¹ hawsaihzy ama pi hlâta, hmo phapa tlyma, hmo chhiepa tlyma ama tao hlâta, hmotaopa vâta châ leipa ta, atlyhna kyh liata Khazohpa hmochhuahpa cha a sie pazao lymâ thei nawpa ta,

¹² a hnohta, “Uhthei viapa ta seihnai viapa a chakao aw,” tahpa ta chhopa a châpa kha.

¹³ “Zakaw kyh pachâ na ta, Esaw deikua ei hao,” tahpa ropa a châ hra.

¹⁴ Cha khiahta cha, khâpa eima reih khao aw? Khazohpa liata sialeina a y ma? Y bao va!

¹⁵ Khazohpa ta Mawsi hnohta, “Ei ngiachhie awpa chyhsa cha ngiachhie aw na ta, zawh ei ngiah awpa chyhsa cha zawh ei ngiah aw,” tahpa ta a vaw reih ha khawh.

¹⁶ Chavâta chyhsapa khotlyna vâta châ leipa ta, hriapasana vâta châ hra vei, a ngiachhietuhpa Khazohpa vâta tlao a châ.

¹⁷ Chavâta Biehrai ta Phiraoh hnohta, “He hmo châta ei cha padua, ei hmotaotheina nâma liata paluahsa ta, khizaw zydua liata ei moh pathâhsapa ta a y thei nawpa ta,” a tahpa a châ.

¹⁸ Chatanachata Khazohpa ta a khopa maih ngiachhie tyh ta, a khopa maih chhorupa ta a tao tyh.

¹⁹ Nâ ta ei hnohta, “Khazohpa ta khazia miah a maochhie thlâh ha chy? Ahy ma a khopa a dyuh thei?” na tah ualua aw.

²⁰ Châhrasala chyhsapa y, Khazohpa a chakhia hrapa chi cha, ahy ma na châ? Hmotaopa ta a taotuhpa hnohta, “Khazia he hawhta eina tao chi?” a tah aw mâ?

²¹ Beihlei tlo kha tawhta, zachhihpa ta hmâ awpa beih sôh viapa nata hmâ chakhyh awpa beih sôh lei viapa zy tao awpa ta, beihvituhpa cha beihlei chô liata bie hnei vei mâ?

²² Khazohpa ta a hiehâhna palâsa ta, a hmotaotheina pahnosa awpa khoh hra sala, hiehâhna beih a leidia tlâhpazy chô liata palôh pasi ngaitapa ta a dao lylia khiahta cha, khâpa a pei aw?

²³ Ngiachhiena beihzy chô liata a rônahna palâsa nawpa ta, cha hmo cha Khazohpa ta a rônahna châta â chhuanoh chhielie hapa châ sala, khâpa a pei aw?

²⁴ Cha ngiachhiena beihzy cha, keimo, Zuzy hry tawhta a awpazy dei châ leipa pi ta, Zenitaizy hry tawhta a awpazy chhao eima châ hra.

²⁵ Khazohpa ta Hôsia châbu liata hetana heta a reipa kha: “Ei phopi a châ beih leipa cha, ‘Ei phopi,’ tah aw na ta; Kyhpachâ beih leipa cha, ‘Kyhpachâpa,’ ei tah aw.”

²⁶ “‘Ei phopi châ veih ei chi,’ a tahna su liata, ‘Khazohpa hroh sawzy,’ bipa ama châ aw.”

²⁷ Isai chhao ta Izarei kyh liata, “Izarei sawzy cha tilaipi sadi zie ta hluh hra ei sala, laibâhpa deita pachhapa ama châ aw.

²⁸ Abeipa ta hawh leipa ta a lei he tlokhuh a hrie aw,” a tahpa kha.

²⁹ Isai pyly ta, “Pheisaihzy Abeipa ta Chi pathla miah pahlôhpa vei mawh sala, Sawdawmâ hawhna khata châ aw pi ta, Kawmawrâ hawhna khata eima y aw,” tahpa ta a vaw rei chhielie haw.

Izarei ngiapâleina

³⁰ Khâpa eima reih khao aw? Siana a chadai leipa Zenitaizy ta ngiapâna ta siana tlao to ei ta,

³¹ siana ryhpa a chadaituhpa Izarei ta siana to thei vei.

³² Khâpa vâta maw? Ngiapâna ta a chadai leipa ei ta, hmotaopa ta to thei awpa hawhta amâ chadaipa vâta a châ. Achapiana lô liata amâ chapia haw,

³³ “Pachâ teh, Zaio liata achapiana lô soh na ta, Moleina lôpanô ei soh; Ahy rai ano a ngiapâpa cha, Maophyuh aw vei,” tahpa ta ropa hawhta.