RAWMA 7 - Mara Bible RV (BSI)

Ryhpa tawhta puana

¹ Unawh saih u, ryhpa cha chyhsapa hro chhôh deita ta a chô liata ryu a reih tyh tahpa pahno veih ei chi mâ? Cha cha ryhpa a pahnopazy hnohta ei reih.

² Vahpa a hneipa chanô châta, a vahpa hro chhôh cha, ryhpa ta a vahpa liata a chahry. A vahpa a thi tawh deikua cha, ahneina ryhpa tawhta a pua haw.

³ A vahpa hro chhôh ta mohropa a hnei khiahta cha, apheinô ama tah aw. A vahpa a thi ha khiah deikua cha, ahneina ryhpa tawhta pua ha ta, chapaw hropa a hneipa chhao ta, apheinô châ vei.

⁴ Cha hawhna chata, unawh saih u, nâmo chhao, ryhpa cha Krista pôhpa liata nama thisai haw. Chatanachata mohropa, athihpa hry tawhta pathyupa Krista eih châ ha ei chi ta, Khazohpa châta thei pha eima pathei thei aw.

⁵ Sapa ta eima y no kha, ryhpa ta molei khonazy papua tyh ta, eima pôhpa pachiahpazy liata thina thei pathei awpa ta rai a hria tyh.

⁶ Tahmâ deikua cha, miah a chahrypa cha thisaipa ta, ryhpa tawhta eima pua haw. Chatanachata châropa parohpa siezie hawhta châ khao leipa ta, Thlahpa hro thiehpa ta eima chakao thei haw.

Ryhpa nata moleina

⁷ Khâpa eima reih khao aw? Ryhpa cha moleina ma? Châ bao va! Ryhpa y leipa sala, moleina ei pahno lei awpa tlai. Ryhpa ta, “Na uahva awpa châ vei,” tah leipa sala, uahvana cha khâpa ma a châ tahpa pahno aw va na.

⁸ Châhrasala moleina ta biepiepa cha rypaohna ta hmâpa ta, uahvana to kei liata a paysa tyh. Ryhpa y leipa sala, moleina cha a thipa a châ.

⁹ Eikhano kha ryhpa hnei leipa ta hroh na ta, châhrasala biepiepa a vaw y nahta, moleina a vaw hra ta, kei cha ei thi haw.

¹⁰ Hro nawpa ta biepiepa cha, thi nawpa tlao a châ tahpa ei vaw pahno haw.

¹¹ Moleina ta biepiepa cha ryhpaohna ta hmâpa ta, na dôvei ta, biepiepa hmâpa ta eina thie.

¹² Chavâta ryhpa cha pathaih ta, biepiepa chhao pathaih ta, sia ta, a pha.

¹³ Cha khiahta la, hmo phapa cha kei châta thina a châ ma? Châ bao va! Hmo phapa cha moleina ta hmâh ta, keima liata thina a tlôkheipa tlao a châ. Chatanachata moleina cha moleina a châ tahpa a lâ aw ta, molei ngaitapa a châzie biepiepa ta a palâsa aw.

¹⁴ Ryhpa cha thlahpa hmo a châ tahpa eima pahno. Kei deikua cha sapa chyhsa, moleina sei ta zua hapa ei châ.

¹⁵ Hmo ei taopa he a pachâna pahno va na. Ei tao khopa tao leipa na ta, ei haopa hmo tlao ei tao tyh.

¹⁶ Ei khoh leipa ei tao tlôh khiahta cha, ryhpa cha pha ei tahkheipa a châ.

¹⁷ Chatanachata ei hmotaopazy cha keima taopa châ leipa ta, keima liata a ypa moleina ta a tao tyhpa a châ.

¹⁸ Ei sapa liata hmo phapa rai y vei tahpa ei pahno. Hmo pha tao khona keima liata y ta, châhrasala tao theina hnei va na.

¹⁹ Ei tao khohpa hmo phapa tao leipa na ta, ei tao khoh leipa hmo chhiepa ei tao tyh.

²⁰ Ei tao khoh leipa ei tao tlôh khiahta cha, a taotuhpa cha kei châ leipa na ta, keima liata a ypa moleina ta a taopa a châ.

²¹ Chatanachata he ryhpa he ei vaw pahno haw: Hmo phapa tao ei khoh nahta, moleina ta einâ vaw hnia ha tyh.

²² Ei palôh ta Khazohpa ryhpa liata a ly na ta,

²³ ei pôhpa pachiahpazy liata deikua cha, ryhpa nanopa a y tahpa ei pahno. Cha chata ei palôh ryhpa cha a dyuh ta, ei pôhpa pachiahpazy liata moleina ryhpa a ypa lâna chata sei ta einâ chhi tyh.

²⁴ Chyhsa ngiachhiechhihpa ei châ kaw dia! He thina pôhpa tawhna heta ahy nâ pachha aw?

²⁵ Zisu Krista eima Beipa vâta Khazohpa cha reithaipa ta y mawh sy! Kei tlai chhao cha, ei palôh ta Khazohpa ryhpa chakao ta, ei sapa ta deikua cha, moleina ryhpa ei vaw chakao ha tyh.