RAWMA 6 - Mara Bible RV (BSI)

Molei thisaina nata Krista liata hrona

¹ Khâpa eima reih khao aw? Ngiachhiena a pôh thei nawpa ta, moleina eima tao pazao aw ma?

² Châ bao va! Keimo moleina a thisai hapazy pi ta cha, kheihta ma moleina liata eima y thei khao aw?

³ Keimo Krista Zisu liata bâti a châ hapazy pi cha, a thina liata bâti eima châ ha tahpa pahno veih ei chi ma?

⁴ A thina liata bâti châpa ta, a hnohta pabupa ta y pi ta, Krista cha Paw rônahna ta athihpa hry tawhta a pathyupa hawhna khata, keimo chhao hrona thiehpa ta eima charei aw.

⁵ A thina liata thi hrapa ta, ano nata eimâ zao ha khiahta cha, a thyuheihna liata chhao thyu hrapa ta, ano nata eimâ zao tlai aw.

⁶ Moleina a phaohpa pôhpa he pahleipadiapa ta, moleina sei ta eima y khao lei nawpa ta, eima chyhsa parohpa cha a hnohta khaipâpa ta a y haw tahpa eima pahno.

⁷ A thi hapa cha moleina tawhta a pua haw.

⁸ Krista hnohta eima thi ha khiahta cha, a hnohta eima hroh aw tahpa eimâ ngiapâ.

⁹ Krista, athihpa hry tawhta pathyupa cha, thi khao aw vei tahpa eima pahno. Thina ta a chô liata bie hnei khao vei.

¹⁰ A thina cha moleina lâ kyh liata chhâzaw châta ei kha thi ta, a hrona deikua cha, Khazohpa lâ kyh liata a hroh.

¹¹ Cha hawhna chata nâmo chhao, moleina lâ kyh liata a thi hapa ta a rao u la, Khazohpa lâ kyh liata deikua cha, Krista Zisu liata a hrohpa ta a rao teh u.

¹² Nama sapa khona pipatlohsa awpa ta, nama pôhpa thi theipa chô liata moleina ta ryureih khah sy.

¹³ Nama pôhpa pachiahpazy cha, sialeina chhaichhi châta moleina lâta hlâ leipa u la, thina tawhta hrona lâ chhihthapazy nama châpa hawhta, Khazohpa lâta a hlâ u la, nama pôhpa pachiahpazy cha siana chhaichhi châta Khazohpa lâta hlâ teh u.

¹⁴ Ryhpa ry liata y khao leipa ei chi ta, ngiachhiena ry liata nama y hapa vâta, moleina ta nama chô liata biehnei khao aw vei.

Siana seizy

¹⁵ Kheihta ma a châ aw? Ryhpa ry liata y leipa pi ta, ngiachhiena ry liata eima ypa vâta, moleina tao awpa a châ ma? Châ bao va!

¹⁶ Ahy lia rai ta ama bie zyh awpa ta sei ta namâ ngia khiahta cha, a bie nama zyhpa sei nama châ tahpa pahno veih ei chi ma? Moleina sei ta namâ ngia khiahta cha, thina lâ châ chhi aw ei ta, reingiahna sei ta namâ ngia khiahta cha, siana lâ a châ chhi aw ei.

¹⁷ Châhrasala Khazohpa cha reithaipa ta y mawh sy! Nâmo, eikhano ta moleina sei a châ tyhpazy chi kha, ama pachunazy palôh hmeiseihpa ta a zyhtuhpazy nama vaw châ haw.

¹⁸ Moleina tawhta pua ei chi ta, siana seizy nama vaw châ haw.

¹⁹ Nama sapa chiehleina pahnopa ta, chyhsapa pachâna lâ tawhta ei reipa a châ. Nama pôhpa pachiahpazy cha, pathaih leina sei ta vaw hlâ tyh ei chi ta, moleina papôh rilina sei ta nama hlâ tyhpa hawhna khata, tahmâ la nama pôhpa pachiahpazy cha pathaihna lâ a chhipa siana seizy châ awpa ta hlâ teh u.

²⁰ Moleina seizy nama châ nota la, siana ta nama chô liata biehnei vei.

²¹ Tahmâ ta nama zakhei kawpa hmo nama vaw tao tyhpazy tawhna khata, khâpa theilâpa ma nama hmô? Kha hmozy chhâna cha thina a châ.

²² Tahmâ deikua cha, moleina tawhta khotalaipa châ ha ei chi ta, Khazohpa seizy nama châ haw. A theilâpa nama hmôpa cha pathaihna lâta a chhipa châ ta, cha chhâna cha chhâzaw hrona a châ.

²³ Moleina hlao cha thina châ tlôh ta, Khazohpa hmosaipiepa deikua cha, eima Beipa Krista Zisu zawhzi ta chhâzaw hrona a châ.