RAWMA 5 - Mara Bible RV (BSI)

Khazohpa nata aryhna

¹ Chavâta ngiapâna vâta thai eima châ ha tawhta cha, eima Beipa Zisu Krista zawhzi ta Khazohpa nata a ryhpa ta eima y haw.

² Ano vâ lilaw ta tahmâ ta eimâ duana ngiachhiena liana heta ngiapâna ta a ngia ha pi ta, Khazohpa rônahna hnabeiseihpa ta a lypa ta eima y.

³ Cha dei châ vei, eima rietheina liata chhao a lypa ta eima y. Rietheina ta tiamana tao ta,

⁴ tiamana ta hrozie phapa tao ta, hrozie phapa ta hnabeiseihna a tao tahpa eima pahno.

⁵ Thlahpa Pathaihpa miah a piepa khata Khazohpa kyhpachâna eima pathipalôh liata a hry hapa vâta, cha hnabeiseihna chata maophyuhpa ta miah paysa vei.

⁶ Eima chiehlei nona khata, Krista cha moleipazy vyuhpa ta a daihtita liata thi ha ta.

⁷ Chyhsa siapa châta thi awpa cha chyhsa ta khoh kaw hlei aw vei; chyhsa phapa châta deikua cha, a thi ngâhpa ama y ngyu ma.

⁸ Châhrasala Khazohpa ta a kyhpachâna cha keimo châta vaw paluahsa ta, moleipazy eima châ nota, Krista cha eima châta thi ha ta.

⁹ Chavâta tahmâ a thisaih ta thai pachâsapa eima châ tawhta chhochhi cha, ano vâta Khazohpa hiehâhna tawhta pachhapa ta eima y via pachai aw.

¹⁰ Khakhaipa eima châ nota hmahta, a Sawchapawpa thina vâta Khazohpa nata a ryhpa ta eima y khiahta cha, tahmâ eimâ ryh ha tawh chhochhi cha, a hrona vâta pachhapa ta eima y via pachai aw.

¹¹ Cha dei châ vei, tahmâ aryhna miah a pahmôsatuhpa eima Beipa Zisu Krista vâta Khazohpa liata eimâ ly.

Âdâh liata thina nata Krista liata hrona

¹² Chyhsa pakha vâta moleina khizaw liata a ngia ta, moleina vâta thina a ngia ta, cha hawhna chata, chyhsa zydua ta hmo ama paraopa vâta, thina ta chyhsa zydua cha a chahryh haw.

¹³ Ryhpa y hlâta khizaw liata moleina y ha ta, ryhpa a y vei khiahta cha, moleina cha moleina ta pachâpa châ vei.

¹⁴ Châhrasala Âdâh daihti tawhta Mawsi daihti taihta, Âdâh paraona hawhta hmo a parao leipazy chô liata chhao, thina chata ryu a reih lymâ. Âdâh cha a vy awpa pakhona a châ.

¹⁵ Châhrasala hmosaipiepa cha moleina nata a lyu vei. Chyhsa pakha moleina vâta hmahta chyhsa hluhpi ama thi khiahta cha, Khazohpa ngiachhiena nata chyhsa pakha, Zisu Krista ngiachhiena hmosaipiepa chhochhi cha, chyhsa hluhpi chô liata vaoheipa ta a y tlai aw.

¹⁶ Hmosaipiepa cha chyhsa pakha moleina vâta hmo a vaw ypa nata a lyu vei. Thailei pachâsana pachiana cha chyhsa pakha vâta vaw y ta, thai pachâsana hmosaipiepa deikua cha, moleina hluhpi vâta tlao a vaw ypa a châ.

¹⁷ Chyhsa pakha moleina vâta, cha chyhsa pakha vâta hmahta thina ta ryu a reih khiahta cha, chyhsa pakha, Zisu Krista vâta ngiachhiena hluh ngaitapa nata siana hmosaipiepa a daotuhpazy chhochhi ta cha, hrona liata ryu ama reih tlai aw.

¹⁸ Moleina miakha vâta chyhsa zydua thailei pachâsapa ama châpa hawhta, siana hmotaopa miakha vâta chyhsa zydua thai pachâsapa châ ei ta, hrona ama hnei.

¹⁹ Chyhsa pakha reingiah leina vâta chyhsa hluhpi moleipa ama châ hapa hawhta, chyhsa pakha reingiahna vâta chyhsa hluhpi mosiapa ama châ aw.

²⁰ Moleina pôh nawpa ta ryhpa vaw y ta, châhrasala moleina a pôhna lia maihta ngiachhiena a pôh via rili.

²¹ Moleina chata thina ta ryureih ta, ngiachhiena deikua cha, eima Beipa Zisu Krista zawhzi ta chhâzaw hrona a tlôkheipa siana ryureina a châ.