RAWMA 4 - Mara Bible RV (BSI)

Ngiapâna ta Abarahâ thaichâna

¹ Cha khiahta la, sapa ryhpa ta miah pathlatuhpa Abarahâ kha, khâpa hmo a hmôpa hawhta ma eima reih aw?

² Abarahâ kha hmotaopa vâta thai pachâsapa a châ khiahta cha, a palai nawpa a hnei, Khazohpa hmiakô lia deikua cha hnei vei.

³ Biehrai ta kheihta ma a reih? “Abarahâ cha Khazohpa a ngiapâ ta, cha ngiapâna cha a siana ta raopa a châ,” a tah.

⁴ Raihriatuhpa hlao cha ngiachhiena hawhta pachâpa châ leipa ta, a bâhpa hawhta pachâpa a châ.

⁵ Rai a hria leipa chhao ta, moleipazy thai a pachâsatuhpa a ngiapâpa cha, â ngiapâna cha siana ta raopa a châ.

⁶ Hmotaopa vâta châ leipa ta, Khazohpa ta mosiapa ta a raopa nohlaona kyh cha, Dâvi chhao ta,

⁷ “Ama paraonazy a ngiahthaipa châ ta, Ama moleinazy khupa ta a ypazy cha, Ama nohlao na;

⁸ Abeipa ta moleina hnei leipa ta a raopa cha, A nohlao na,” tahpa ta a vaw reih haw.

⁹ Abarahâ ngiapâna cha a siana ta raopa a châ, eima tah tlôh khiahta cha, cha nohlaona cha chopawtaipazy châ deita ma, chopawtai leipazy châta chhao maw?

¹⁰ Abarahâ kha khâpa vâta ma mosiapa ta raopa a châ? Chopawtaipa a châ tawhta ma, tai hlâta maw? Chopawtaipa a châ tawhta châ leipa ta, chopawtai hlâ tawhta mosiapa ta rao hapa a châ.

¹¹ Chopawtaileipa a châ nota, mosiapa a châna pa-i nawpa ta, chopawtaipa ngiana cha ngiapâna ta hmô ta. Cha chata â chhuahpa cha, chopawtaileipa zydua paw ta tao ta, âmo chhao mosiapa ta raopa ama châ thei nawpa ta a châ.

¹² Chopawtaipazy chhao chopawtai thlâhthlipazy châ leipa ta, miah pathlatuhpa Abarahâ chopawtaipa a châ hlâta â ngiapâna pheihnie a pazituhpa ama châ thei nawpa ta, ano cha chopawtaipazy paw ta taopa a châ hra.

Ngiapâna ta hmôpa bietai

¹³ Ano cha khizaw ryu a to awpa a châna kyh, Abarahâ nata a pathlazy hnohta a vaw tlôpa bietai kha, ryhpa vâta a vaw tlôpa châ leipa ta, ngiapâna ta siana vâta a vaw tlôpa tlao a châ.

¹⁴ Ryhpa a zyhtuhpazy ta ryutotuhpazy ama châ awpa khiahta cha, ngiapâna cha hraoleipa châ aw ta, bietai chhao aruapa a châ aw.

¹⁵ Ryhpa ta pathiiana tlôkhei tyh ta, ryhpa y leina liata paraona y vei.

¹⁶ Chavâta bietai cha ngiachhiena liata a pahnieh ta, a pathla zydua châta pa-ipa a châ thei nawpa ta, ngiapâna ta a vaw tlôpa a châ. Ryhpa a hneipazy dei châ leipa ta, Abarahâ ngiapâna a hlykheituhpazy chhao ta ama hmô hra aw. Ano cha eima zydua paw a châ.

¹⁷ “Phopi hluhpi paw ta ei cha tao haw,” tahpa ta ropa hawhta, Abarahâ cha athihpa a pahrotuhpa nata hmo a y leipazy a paysatuhpa châ ta, â ngiapâpa Khazohpa mohmô liata eima zydua paw a châ.

¹⁸ “Cha hawhna chata na pathlazy ama y aw,” tahpa ta chhopa a châpa hawhta, phopi hluhpi paw châ awpa ta, hnabeiseih â chhih leipa chhao ta, ngiapâna ta khâchâ hnabeiseih lymâ ta.

¹⁹ Kô za kha châ daihmâ ha ta, a pôhpa pachâpa ta, athipa hawhta a châ ha bâpa chhao ta nata Sârâ chhi a choh hapa chhao ta, ngiapâna kyh liata thachhâpa ta y beih vei.

²⁰ Ngiapâna a phahla beih leipa ta, Khazohpa bietai a lôh leipa ta y beih vei. Â ngiapâna a thatlô via rili ta, Khazohpa a palyupalih lymâ.

²¹ Khazohpa cha a bietai hawhta a tao thei tahpa khâchâ a ngiapâ ta.

²² Chavâta â ngiapâna cha a siana ta raopa a châ.

²³ “A siana ta raopa a châ,” tahpa biezy cha ano châ dei ropa châ leipa ta,

²⁴ keimo châta chhao a châ. Athihpa hry tawhta eima Beipa Zisu a pathyutuhpa cha eimâ ngiapâ khiahta cha, keimo chhao mosiapa ta raopa eima châ hra aw.

²⁵ Cha Zisu cha keimo moleina vâta thie awpa ta patusapa châ ta, thai eima châ nawpa ta pathyupa a châ.