RAWMA 3 - Mara Bible RV (BSI)

Khazohpa ngâchhihna

¹ Cha khiahta la, Zu chyhsa châpa cha phahnaina khâpa a hnei? Chopawtaipa chhao cha khâpa athôhna a hnei?

² Kyh to liata a phahnai. A phahnaina chaipa cha, Khazohpa biezy pavaosapa ama châpa he a châ.

³ Thokha ngâchhih leipa ei sala, kheihta a châ aw? Âmo ngâchhih leina chata Khazohpa ngâchhihna hraoleipa ta a tao aw ma?

⁴ Châ bao va! Chyhsa zydua a haihpa châ hra ei sala, Khazohpa cha adopa a châ, Biehrai liata, “Na bie ta thai châ la, Pachiapa ta na y tita, Pahniena to mah y,” tahpa ta ropa hawhna khata.

⁵ Châhrasala keimo sialeina ta Khazohpa siana a palâsa khiahta cha, khâpa eima reih khao aw? Eima chô liata a hiehâhna a patlôsana kyh liata, Khazohpa cha sialeipa a châ ma? Cha cha chyhsapa lâ tawhta ei reipa a châ.

⁶ Châ bao va! Chata a châ khiahta cha, Khazohpa ta kheihta khizaw a pachia thei aw?

⁷ Kei ta haipa bie ei reipa vâta, Khazohpa biehmeiseihpa cha ano parônahsana taihta â lâ khiahta cha, khazia moleipa hawhta thailei pachâsapa ta ei y?

⁸ Chyhsa thokha ta, “‘Hmo phapa a vaw pua thei nawpa ta, hmo moleipa tao ei suh u,’ ama tah na,” tahpa ta â doleipa ta miah ama baipa hawhna khata eima tao thlâh ha aw ma? Cha hawhpa chyhsazy cha thailei a châ awpa rai ama châ.

Ahy hmah asiapa y veih ei

⁹ Cha khiahta la, keimo Zuzy pi he Krikâh mo hlâta eima pha via hlei ma? Châ bao va! Zuzy chhao, Krikâh mo chhao, moleina sei liata a ypa eima châ khaizie eima rei hapa kha.

¹⁰ Biehrai liata, “Ahy hmah a siapa y veih ei, Pakha hmah y veih ei;

¹¹ Ahy hmah a pahno thaipa y veih ei, Ahy hmah Khazohpa a tluapa y veih ei.

¹² Ama zydua ta pavia khai ha ei ta, Phahnai leipa ama châ khai haw; Hmo pha a taopa y veih ei, Pakha hmah y veih ei.

¹³ Ama rao cha thlâ a pahypa châ ta, Ama paleih dôna bie reina châta hmâh ei ta, Ama hmao liata parih châmaih a y.

¹⁴ Ama pakah cha chhiesana nata ruchhôna ta a bie.

¹⁵ Thisaih palo awpa ta ama phei chatlie kaw ta,

¹⁶ Ama lâpizy liata raona nata rietheina a y;

¹⁷ Thlalôhna lâpi pahno veih ei.

¹⁸ Ama mo liata Khazohpa china rai y vei,” tahpa ta ropa a châ.

¹⁹ Ryhpa ta a reipa maih cha, ryhpa ry liata a ypazy hnohta reipa a châ tahpa eima pahno. Chatanachata pakah to hmao mopa ta y aw ei ta, khizaw zydua he Khazohpa ryureina ry liata a y thei aw.

²⁰ Ryhpa vâta moleina pahnona vaw y ta, chavâta chyhsapa ahy hmahta hmotaopa vâta Khazohpa mohmô ta thaichâ thei aw veih ei.

Ngiapâna vâta thaichâna

²¹ Châhrasala ryhpa nata hrohsopazy reipa hawhta, ryhpa leipa ta Khazohpa siana cha tahmâ paluahsapa ta a y haw.

²² Cha Khazohpa siana cha, Zisu Krista amâ ngiapâpa vâta ngiapâtuhpa zydua hnohta paluahsapa ta a y. Ananona rai y vei.

²³ Chyhsa zydua ta molei khai ha ei ta, Khazohpa rônahna to thei khao veih ei.

²⁴ Cha moleipazy cha, Zisu Krista chatlaina vâta, a ngiachhiena ta a saipa ta thai pachâsapa ama châ.

²⁵ Zisu Krista cha molei reihpha cheina châta a thisaih palo awpa ta Khazohpa ta a raopa châ ta, cha ngiahthaina cha ngiapâna vâta hmô theipa a châ. A nôphana vâta, kha hlâta moleinazy cha, Khazohpa ta pahno lei a pachâ ta, a siana cha a paluahsa haw.

²⁶ Zisu Krista cha mosiapa a châ thei nawpa nata ano ngiapâtuhpa châta thaipachâsatuhpa a châ thei nawpa ta, Khazohpa ta tahmâhlâ daihti liana heta Zisu Krista siana cha a vaw palâsapa a châ.

²⁷ Cha khiahta la, eimâ palaikhei kawpa kha khataih liata a y haw? Thypa ta a y haw. Khâpa ryhpa ta maw? Hmotaopa ryhpa ta ma? Châ vei, ngiapâna ryhpa ta tlao a châ.

²⁸ Ryhpa hmotaopazy vâta châ leipa ta, chyhsapa cha ngiapâna vâta thai a châpa ta eima rao.

²⁹ Khazohpa cha Zuzy Khazohpa dei ma a châ? Zenitaizy Khazohpa chhao châ hra vei ma? A châ tlaih, Zenitaizy Khazohpa a châ hra.

³⁰ Khazohpa cha pakha a châpa vâta, chopawtaipa cha ngiapâna vâta thaichâ aw ta, chopawtaileipa chhao, ngiapâna vâta thai a châ hra aw.

³¹ Cha khiahta la, ngiapâna vâta ryhpa cha hraoleipa ta eima pachâsa ma? Châ bao va! Ryhpa cha tlao eima pa-ipa a châ.