RAWMA 16 - Mara Bible RV (BSI)

Ngiapâtuhpazy lâta anaohna

¹ Eima sietanô Phibi, Kenkaria Awnanopa liata chakaotuhpa pahnokheina nâmo lâta ei vaw roh.

² Mopathaihpa a châna nata â phuhpa ta Abeipa liata a vaw ly u la, bao â ngiahna maih liata vaw bao lymâ muh vy. Kei nata chyhsa hluhpi miah a deichhy tyhpa a châ.

³ Priskilâ nata Akuilâ, Krista Zisu liata ei hrialâhpazy kha nâ naohpa muh vy.

⁴ Ei hrona pabohsa awpa ta rao a dao ngâhpazy châ ei ta, kei ta ama hnohta alyna bie ei reipa dei châ leipa ta, Zenitai awnanopa zydua ta alyna bie ama hlâ hra.

⁵ Ama o liata Awnanopa a pakhypazy chhao kha nâ naohpa muh vy. Ei kho ngaitapa Epenetâ, Asia râh liata Krista a ngiapâ tua chaipa chhao kha nâ naohpa muh vy.

⁶ Nâmo châta a hriapasa ngaitapa Mâri chhao kha nâ naohpa hra muh vy.

⁷ Ei chiheih Andrônikâ nata Zunia, patâhna o liata ei tâlâhpazy kha nâ naohpa muh vy. Âmo cha lyuhchâpazy ta ama pahno kawpazy châ ei ta, kei Krista liata ei y hlâta a y hapazy ama châ.

⁸ Ampaliatâ, Abeipa liata ei kho ngaitapa kha nâ naohpa muh vy.

⁹ Krista liata ei hrialâhpa Ubânâ nata ei kho ngaitapa Stâki kha nâ naohpa muh vy.

¹⁰ Krista liata chyhsa hmeiseihpa Apele kha nâ naohpa muh vy. Aristôbulâ chhôhkhazy kha nâ naohpa muh vy.

¹¹ Ei chiheih Herôdiônâ kha nâ naohpa muh vy. Nâkisâ chhôhkha Abeipa liata a ypazy kha nâ naohpa muh vy.

¹² Taruphanâ nata Tarôphôsâ, Abeipa châta a hriapasa ngaitapazy kha nâ naohpa muh vy. Kyhpachâpa Pâsi, Abeipa châta a hriapasa ngaitapa kha nâ naohpa muh vy.

¹³ Abeipa liata atlyhpa Rufu kha nâ naohpa u la, a nô, keima châ chhao ta nô a châpa kha nâ naohpa muh vy.

¹⁴ Asinkritâ, Phalekô, Hame, Patôbâ, Hamâ nata ama hnohta unawh a ypazy chhao kha nâ naohpa muh vy.

¹⁵ Philôkâ, Zulia, Neria nata a sietanô nata Ôlipâ nata ama hnohta mopathaihpa a ypa zydua kha nâ naohpa muh vy.

¹⁶ Apahnâna pathaihpa ta a naoh raihrie tyh muh vy. Krista Awnanopa zydua ta ama châ naoh.

Pachuna chhâna

¹⁷ Unawh saih u, biezyhpa eima cha pachupa chakhiapa ta, achhaihna taopa ta, paona châ sokhâhtuhpazy tawhta a vaih awpa ta ei châ haw ei. Âmo cha a kâsai teh u.

¹⁸ Cha hawhpa chyhsazy cha, eima Beipa Zisu Krista chakao leipa ei ta, âmo py a chakaopa tlao châ ei ta, reikah pahniapa nata papyupahly thainazy ta chyhsa pha molopazy ama dôvei tyh.

¹⁹ Khazohpa bie a zyhpa nama châzie cha mo to pahnopa a châ. Chavâta nama chô liata ei ly ngaita. Hmo phapa lâta so u la, moleina lâta deikua cha, a so leipa nama châ awpa ei khoh.

²⁰ Thlalôhna Khazohpa ta Sâtâ cha nama phei ry liata a tlysao patoh aw. Eima Beipa Zisu Krista ngiachhiena nama hnohta y mawh sy.

²¹ Ei hrialâhpa Timawthy ta a châ naoh ei. Ei chiheih Lukia, Zasaw nata Sôsipatâ zy chhao ta ama châ naoh.

²² Kei Tertia, he châ rohtuhpa heta, Abeipa moh ta ei châ naoh ei.

²³ Ei tlôna paw, Kaiâ, Awnanopa a pakhy tyhna o hneituhpa ta a châ naoh ei. Khihpi sôh avaotuhpa Erastâ nata eima unawhpa Kuatâ ta ama châ naoh.

²⁴ Eima Beipa Zisu Krista ngiachhiena nama zydua hnohta y mawh sy.

Byhnâ awna

²⁵ Kô hluhpi nyupa ta a ypa bienyupa liata aluahna zipa ta, ei thâtihpha reipa nata Zisu Krista bie ei chhopa hawhta tha châ patlô theituhpa Khazohpa hnohta rônahna y mawh sy.

²⁶ Tahmâ deikua cha, bienyupa palâhâhpa ta a y haw. Chyhsazy ta a ngiapâ ei sala, a bie ama zyh thei nawpa ta, chhâzaw Khazohpa ta biepie ta, bienyupa cha hrohsopazy châbu hmâpa ta phopi zydua hnohta pahnosapa ta a y.

²⁷ Khazohpa sopa a y chhôhpa hnohta, Zisu Krista vâta chhâzaw ta rônahna y mawh sy! Amen.