RAWMA 15 - Mara Bible RV (BSI)

Vaih palysana

¹ Keimo, thatlôpazy pi heta keimo alyna tlua leipa ta, chiehleipazy ama pachyu leina liata eima bao awpa a châ.

² Eima vaihzy thapatlô sih la, ama pha nawpa taopa ta palysa a chhuah chyu suh u.

³ “Nâma châ pasipasawhtuhpa pasipasawhna cha keima chô liata a tla haw,” tahpa ropa hawhta, Krista chhao khata ano alyna tlua vei.

⁴ Hlâno ta bie ropa zydua kha eimâ chu hra awpa ta ropa a châ. Chatanachata Biehrai bie hawhta tiamana nata thatlôna hneipa ta hnabeiseihna eima hnei thei aw.

⁵ Tiamana nata thatlôna Khazohpa ta Krista Zisu khozie hawhta nama zydua ta a ryh ngaitapa ta y awpa ta cha bao mawh ei sy.

⁶ Chatanachata Khazohpa nata eima Beipa Zisu Krista Paw cha, reihkha tlapa ta nama reithai khoh thei aw.

⁷ Chavâta Khazohpa rônah nawpa ta Krista ta a châ pyhpa hawh ei ta, nâmo chhao a pyh raihrie teh u.

Zenitaizy châta thâtihpha

⁸ Ei cha chho ei, pathlatuhpazy hnohta bietai pa-i ta, Khazohpa adona palâsa nawpa ta, Krista cha chopawtaipazy chakaotuhpa ta a vaw ypa a châ.

⁹ Chatanachata Zenitaizy chhao ta Khazohpa cha a ngiachhiena vâta ama reithai thei hra aw, Biehrai liata, “Zenitaizy hry liata cha reithai aw na ta, Na moh reithaipa ta ei sa aw,” tahpa ropa hawhna khata.

¹⁰ “Hy Zenitaizy saih u, A phopi nata a ly khoh teh u,” tah heih ta.

¹¹ “Zenitai zydua saih u, Abeipa cha reithai teh u; Chyhsa zydua ta, Ano cha reithai mawh ei sy,” a tah heih hra.

¹² Isai chhao ta, “Zese thari kaw pyuh aw ta, Zenitaizy ryureituhpa a vaw pua aw; Ano liata Zenitaizy hnabeiseihna a y aw,” tahpa ta a vaw reih hra.

¹³ Thlahpa Pathaihpa hmotaotheina zawhzi ta hnabeiseihna hluhpi nama hnei thei nawpa ta, hnabeiseihna Khazohpa ta, ano nama ngâpa hawhta, alyna nata thlalôhna ta cha pabie mawh ei sy.

Pawla Zenitaizy chakaotuhpa

¹⁴ Unawh saih u, phana ta bie ei chi ta, sona to hnei ei chi ta, namâ pachu raihrie thei, tahpa keima tlai ta a siapa ta ei pahno.

¹⁵ Kyh thokha liata deikua cha, cha pahnosa heih awpa ei ta, riahpha ngaitapa ta ei roh. Khazohpa ta ngiachhiena eina patosapa zawhzi ta,

¹⁶ Khazohpa thâtihpha châta theihthaina chakaona raihria liata, Zenitaizy hry liata Krista Zisu chakaotuhpa châta raopa ei châ. Chatanachata Zenitaizy hmohlâpa cha Thlahpa Pathaihpa ta pathaisa aw ta, a pyh tlâh a châ aw.

¹⁷ Chavâta Khazohpa chakaona rai ei hriana kyh liata, Krista Zisu vâta a palai thei nawpa ei hnei.

¹⁸ Zenitaizy Khazohpa bie pazyhsa awpa ta Krista ta kei na hmâh ta, cha châta ei biereipa nata ei hmotaopazy dei leipa ta cha, bie hropa rei a chhuah va na.

¹⁹ Krista thâtihpha chakaona rai cha, ngiana nata hmonoâhpa hmotaotheina nata Khazohpa Thlahpa hmotaotheina zy hmâpa ta, Zerusale nata a chheipâhzy tawhta Eliriku râh taihta ei chho khai haw.

²⁰ Cha hawhna chata, mohropa lôbô bô chiehpa liata o a sapa ei châ lei nawpa ta, Krista moh pado hana su liata cha thâtihpha chho lei awpa ei chhuah,

²¹ “A thâtih chho beih leipazy ta hmô aw ei ta, A thei beih leipazy ta ama pahno aw,” tahpa ropa hawhna khata.

Pawla Rawma tly â chhuah

²² Cha vâna tlai chata nâmo lâ a vy awpa pakhâpa ta khâ ei y tyh.

²³ Tahmâ deikua cha, he râhzy liana heta hria nawpa su hropa hnei khao leipa na ta, kô hluhpi chhôh nâmo cha vaw tly khohna ei vaw hnei tyhpa vâta,

²⁴ Spânia râh lâ ei siena liata nâmo châ vaw hmô pâ awpa ei chhuah. Chatanachata nama hnohta a pahlaopa ta buakha chhôh a lypa ta y aw na ta, cha khai tawhta ei khitlyna liata chhao eina deichhy thei awpa ei chi ta ei hnabei a seih.

²⁵ Tahmâ deikua cha, mopathaihpazy deichhyna hmo pie awpa ta Zerusale lâ ei sie chy aw.

²⁶ Mâsidônia nata Akai râhzy ta, a ly kawpa ta Zerusale liata mopathaihpa dyhchhiepazy châta thyupakhy ei ta.

²⁷ Cha cha a ly kawpa ta ama taopa a châ. Hmeiseih ta la, tao awpa amâ bâhpa rai a châ. Zenitaizy ta thlahpa kyh liata Zuzy amâ hlykhei khiahta cha, khizaw hmozy ta Zuzy ama deichhy hra awpa cha a byuhpa tlai a châ.

²⁸ Cha hmozy cha tao khaipa ta, thyunazy cha ama ku liata ei hlâ khai tawhta, nâmo cha vaw chapiapa ta Spânia lâ cha ei sie aw.

²⁹ Nâmo lâ ei vy tita, Krista byhnâ kipa chhaota ei vy aw tahpa ei pahno.

³⁰ Unawh saih u, tiamapa ta Khazohpa lâ thlah eina chhâkhei awpa ei chi ta, eima Beipa Zisu Krista moh nata Thlahpa kyhpachâna ta ei châ haw ei.

³¹ Zudia râh liata ngiapâleipazy tawhta ei boh thei nawpa nata Zerusale liata ei chakaona cha mopathaihpazy châta a pyh tlâh a châ thei nawpa ta thlah na chhâkhei teh u.

³² Chatanachata Khazohpa khozie hawhta a ly kawpa ta nâmo lâ a vy aw na ta, nama hnohta a pahlaopa ta tha eina patlô thei aw ei chi.

³³ Thlalôhna Khazohpa cha nama zydua hnohta y mawh sy. Amen.