RAWMA 14 - Mara Bible RV (BSI)

Krizyhpa apôhkhana

¹ Ngiapâna liata chiehleipa chyhsa cha a pyh thai u la, â lôhleina kyh liata sei khuh vy.

² Chyhsa pakha cha â ngiapâna ta ato nie thei awpa ta pachâ ta, chyhsa chiehleipa deikua cha âhnalasi deita a nie tyh.

³ Ato a niepa ta a nie leipa mohnao khah sy. A nie leipa chhao ta, a niepa sei khah sy. Khazohpa ta ano cha â pyh ha mâh tâh.

⁴ Mohropa chakaotuhpa seituhpa cha ahy ma na châ? Â duah tlyma, a pao tlyma, ano zibeipa hmiakô liata a taopa a châ. Abeipa cha ano a paduasa theipa a châpa vâta, â duah thlâh ha aw.

⁵ Chyhsa pakha ta noh kha cha, noh hropa hlâta pasô via ta, chyhsa hropa ta noh zydua he miakha sai ta a pachâ. Chyhsa to ama pachâna chyu liata ama sia awpa a châ.

⁶ Noh a chaypa cha Abeipa palyupalih nawpa ta a chaypa a châ. Ato a niepa chhao, Abeipa palyupalih nawpa ta nie ta, Khazohpa lâta alyna bie a hlâ tyh. Nie a taihpa chhao, Abeipa palyupalih nawpa ta a taih ta, Khazohpa lâ alyna bie a hlâ tyh.

⁷ Ahy hmah keimosasyh châta a hrohpa châ leipa pi ta, ahy hmah keimosasyh châta a thipa châ hra ma pi.

⁸ Eima hroh khiahta cha, Abeipa châta hroh pi ta, eima thipa chhao ta, Abeipa châta a thipa eima châ. Chavâta eima hrohpa chhao ta, eima thipa chhao ta, Abeipa eih eima châ.

⁹ Krista cha athihpa nata ahrohpa Beipa châ awpa ta, thi ta a hroh heihpa a châ.

¹⁰ Cha khiahta la, khazia na unawhpa na sei? Khazia na unawhpa na mohnao? Eima zydua heta Khazohpa pachiana dyuchhai hmiakô liata a duah khai awpa eima châ,

¹¹ “Ei hrona reipa ta ei reih, Abeipa ta a tah; Pakhu to ei hmiakô liata paneih aw ei ta, Paleih to ta Khazohpa ama reithai aw,” tahpa ropa hawhta.

¹² Eima zydua ta Khazohpa hmiakô liata keimo thâtih eima reih chyu aw.

Chyhsa paona tao kha

¹³ Chavâta a sei raihrie khao leipa ta, unawhpa lâpi liata achapiana lô tlyma, pakhâna tlyma, sokhâh lei awpa a chhuah ei suh u.

¹⁴ Abeipa Zisu liata pathaih leipa khâpa hmah y vei tahpa a siapa ta ei pahno. Pathaih leipa hawhta a pachâpa châta deikua cha, pathaih leipa a châ.

¹⁵ Na niepa ta na unawhpa palôh a patypamâ khiahta cha, kyhpachâna lâpi a chhih khao va chi. Ano thi vyuhpa ta Krista ta a thikâ hapa chyhsa cha, parao khah y.

¹⁶ Hmo phapa ta nama pachâpa cha, moleina hawhta pachâ awpa pasaih khuh vy.

¹⁷ Khazohpa khinarâh cha nie nata do kyh châ vei. Siana nata thlalôhna nata Thlahpa Pathaihpa liata alyna zy tlao a châ.

¹⁸ Cha hawhta Krista chakaotuhpazy cha, Khazohpa ta a pyh ta, chyhsa reithaina chhao ama hlao tyh.

¹⁹ Chavâta thlalôhna a tlôkhei awpa nata tha a patlô raihriena a châ awpa hmozy a chadai lymâ suh u.

²⁰ Niepa vâta Khazohpa raihria parao khah y. Hmo to a pathaih khai. Châhrasala niepa ta chyhsa a chapiasa khiahta cha, a nietuhpa cha a do vei.

²¹ Na unawhpa a chapia nawpa a châ khiahta cha, sa nie leipa nata kresawhti do leipa pha ta, â chapia thei nawpa hmo khâpa hmah tao leipa a pha.

²² He kyh liata ngiapânazie na hneipa cha, Khazohpa nata nâma likah liata a y awpa châta soh mah y. Ano ta pha a tahpa kyh liata anosasyh thailei a pachâsa leipa chyhsa cha a nohlao na.

²³ A lôh leipa ta a niepa deikua cha, ngiapâna ta a nie leipa vâta thailei a châ. Khâpa rai ngiapâna tawhta a pua leipa cha moleina a châ.