RAWMA 13 - Mara Bible RV (BSI)

Ryureituhpazy bie zyh awpa

¹ Chyhsa to ta ama chô liata ryureituhpazy bie ama zyh awpa a châ. Khazohpa rao leipa ryureituhpa y veih ei. Ryureituhpazy cha Khazohpa raopa ama châ.

² Chavâta ryureituhpa a dyuhpa cha Khazohpa raopa a dyuhpa châ ta, a dyuhtuhpazy cha thailei pachâpa ama châ aw.

³ Ryureituhpazy cha hmo phapa a taotuhpazy châta chichhihpa châ leipa ei ta, hmo chhiepa a taotuhpazy châta deikua cha, chichhihpa ama châ. Ryureituhpa chi leipa ta y na khoh ma? Hmo pha tao la a cha reithai aw.

⁴ Ano cha na pha nawpa ta Khazohpa chakaotuhpa a châ. Hmo moleipa na tao khiah deikua cha, chi kaw mah y, zaozi cha a chaba thlâhthli vei. Ano cha Khazohpa chakaotuhpa châ ta, hmo paraotuhpa chô liata Khazohpa hiehâhna phuhlatuhpa a châ.

⁵ Chavâta Khazohpa hiehâhna chipa vâ dei châ leipa ta, chhie nata pha pahnona vâta, ryureituhpa bie na zyh awpa a châ.

⁶ Ryureituhpazy cha Khazohpa chakaotuhpazy châ ei ta, Khazohpa chakaona rai a hriapazy ama châpa vâta, chhiezy chhao nama pie tyh.

⁷ Chyhsa zydua lâta pie awpa maih pie lymâ teh u. Chhie pie awpa lâta chhie pie u la, leimâ chei awpa lâta leimâ cheih u la, za awpa cha za u la, palyupalih awpa cha palyupalih teh u.

Kyhpachâna ta ryhpa a paki

⁸ Kyh a pachâ raihriena dei leipa ta cha, ahy hmah khâpa hmah a bâh khuh vy. A chyhsa heih kyh pachâtuhpa cha ryhpa a pakipa a châ.

⁹ “Nâ phei awpa châ vei; Liany na cheih awpa châ vei; Na paru awpa châ vei; Na uahva awpa châ vei,” tahpa biepiepazy nata biepiepa hropazy chhao, “Nâma kyh nâ pachâpa hawhta na vaih kyh na pachâ awpa a châ,” tahpa heta a syhpahmaoh khai.

¹⁰ Kyhpachâna ta vaih pasasa beih vei. Chavâta kyhpachâna cha ryhpa zyh pakina a châ.

¹¹ Tahmâhlâ hmo yzie pahno ei chi ta, amôpa thyu â daih haw tahpa nama pahnopa vâta cha cha ei reih. Tahmâ cha eimâ ngiapâ tua no hlâta eima pachhana a hnia via ha tlôh ta.

¹² Zâ he chhâ daihmâ ta, khih a deih daihmâ. Chavâta zohna hmotaopa zydua thy sih la, khaihna chhaichhi ta a tobi suh u.

¹³ Nohchhô ta ypa hawhta â ngia ngaitapa ta y sih la, apatlapa nata sahma paripa ta y leipa ta, parâpa nata apheipa ta y hra leipa ta, ahryuchhiapa nata hiatliapa ta y khah ei suh u.

¹⁴ Abeipa Zisu Krista ta tlao a tobi u la, nama sapa khopa pipatlohsa nawpa ta khâpa hmah tao khuh vy.