RAWMA 12 - Mara Bible RV (BSI)

Atheihna hrohpa

¹ Chavâta unawh saih u, Khazohpa ngiachhiena vâta, atheihna hrohpa nata pathaihpa nata a pyh tlâh châ awpa ta, nama pôhpa cha Khazohpa lâ hlâ awpa ta ei châ haw ei. Cha cha thlahpa ta Khazohpa namâ chhynazie awpa a châ.

² He khizaw ryhpa hawhna heta y leipa u la, nama palôh pathiehpa ta tlao anano lymâ teh u. Chatanachata Khazohpa khopa cha khâpa ma a châ tahpa pahno thei aw ei chi ta, hmo phapa a pyh tlâhpa nata phapakipa cha nama pahno thei aw.

Ngiachhiena hmosaipiepa

³ Nama hry liata chyhsa ahy hmahta a châna dopa hlâta a sâh viapa ta a pachâ leipa sala, Khazohpa ta chyhsa to hnohta ngiapâna a piepa rakhapa lymâ hawhta, a châna dopa a pahno thai awpa ta, Khazohpa ta ngiachhiena eina piepa zawhzi ta ei cha chho ei.

⁴ Pôhpa miakha liata pachiahpa hluhpi hnei pi ta, pachiahpa zydua hmotaopa deikua a lyu vei.

⁵ Cha hawhna chata keimo chhao, a hluhpi châ hra sih la, Krista liata pôhpa miakha châ pi ta, eima zydua ta a zao khaipa eima châ.

⁶ Ngiachhiena piepa eima châpa lymâ hawhta, hmopiepa nanopa eima hnei chyu. Hrohsona bie rei awpa a châ khiahta cha, eimâ ngiapâna rakha lymâ hawhta reih sih la,

⁷ chakao awpa a châ khiahta cha chakao sih la, pachutuhpa ta pachu sala,

⁸ pasyutuhpa ta pasyuna bie reih sala, hmopietuhpa ta riapha ngaitapa ta pie sala, ryureituhpa ta tiamapa ta ryureih sala, ngiachhiena rai hriatuhpa ta a ly ngaitapa ta hria mawh sy.

Krizyhpa dopa ngiana

⁹ Kyhpachâna cha haiphiana a hlao leipa châ mawh sy. Moleina a hao u la, hmo phapa khâchâ patu muh vy.

¹⁰ Unawh kyhpachâna ta kyh a pachâ raihrie u la, a palyupalih raihrie muh vy.

¹¹ Phahnai angiahna kyh liata daopathla leipa u la, palôh thathyu ngaitapa ta Abeipa chakao muh vy.

¹² Hnabeiseihna liata a ly u la, rietheitaona liata tiama u la, thlahchhâ lylia muh vy.

¹³ Mopathaihpa a phahlapazy deichhy u la, khichhai pasô muh vy.

¹⁴ Châ taolatuhpazy byhnâ awpa u la, chhiesapa leipa ta, byhnâ awpa teh u.

¹⁵ Alypazy a lykhei u la, achapazy chakhei teh u.

¹⁶ A dyh raihrie u la, a pasâhsa leipa ta, chyhsa nawhpazy a kao u la, apasosa khuh vy.

¹⁷ Ahy moleina rai moleina ta viarithô leipa u la, chyhsa zydua mohmô ta hmo dopa tao awpa ta pachâna tlao hmâh tyh muh vy.

¹⁸ Tao theipa a châ khiahta la, nâmo lâ tawh chhâ ta chyhsa zydua nata a ryhpa ta y teh u.

¹⁹ Kho ngaitapa saih u, nama phuh a la leipa u la, Khazohpa pathiiana tlei hri teh u. “Phuh cha keima la awpa châ ta, kei ta viari ei thô aw, Abeipa ta a tah,” tahpa ta ropa a châ.

²⁰ Chavâta, “Na chariahpa a nodi khiahta cha, nie awpa pie la, a dâhphi khiahta cha, do awpa pie mah y. Cha hawhta na tao khiahta cha, a luh chô liata meiia beih na khaihpa a châ aw.”

²¹ Moleina a patiahsa leipa la, phana ta moleina cha tlao tiah mah y.