RAWMA 11 - Mara Bible RV (BSI)

Izarei laibâhpa

¹ Cha khiahta la, hiahrina ei tao. Khazohpa ta ano phopi cha a thy aw ma? Thy bao va! Kei chhao he Izarei chyhsa, Abarahâ pathla, Benzami chi ei châ.

² Khazohpa ta a pahno hapa a phopi cha thy aw vei. Biehrai ta Elaizâh kyh a reipa kha pahno veih ei chi ma? Elaizâh ta Izarei kyh Khazohpa lâ tlôkhei ta,

³ “Abeipa, na hrohsopazy thie ei ta, na maisâhzy pacho ei ta, kei deita y na ta, kei chhao thie einâ chhuah ei,” tah ta.

⁴ Khazohpa ta kheihta â chhy? “Bâlâ hmiakô liata pakhu paneih beih leipa chyhsa sâh sari kei châta ei pahlôh thlâh haw,” tahpa ta â chhy.

⁵ Cha hawhna chata, tahmâ chhao laibâhpazy ama y. Âmo cha ngiachhiena ta â tlyhpazy ama châ.

⁶ Ngiachhiena vâta a châ khiahta cha, hmotaopa vâta châ khao vei. Cha hawhta a châ vei khiahta cha, ngiachhiena cha ngiachhiena châ khao aw vei.

⁷ Cha khiahta la, kheihta a châ aw? Izarei ta a tluapa cha hmô leipa ta, atlyhpazy ta hmô ei ta, ahropazy cha kuhchhâpa ta ama y,

⁸ “Khazohpa ta âmo cha, Tanoh taihta hruna thlahpa pie ta, A hmô thei leipa mo piepa ta, A thei thei leipa nah a pie ei,” tahpa ropa hawhna khata.

⁹ Dâvi chhao ta, “Ama tlâhkhai cha, Ama châta khoheih nata aphyh châ sala, Achapiana nata viarithôna châ mawh sy.

¹⁰ Ama hmô thei lei nawpa ta, Ama mozy zoh sala, Ama zôh chhâzaw ta a ko mawh sy,” tahpa ta a vaw reih ha hra.

Zenitaizy pachhana

¹¹ Cha khiahta la, amâ chapiana cha ama pao pathlah nawpa a châ ma? Châ bao va! Izarei hia patliasa awpa ta, amâ chapiana vâta Zenitaizy lâ pachhana a vaw tlôpa a châ.

¹² Ama paona hmahta khizaw hneirôna châ sala, ama leina Zenitaizy hneirôna a châ khiahta cha, ama pakina chhochhi cha hneirôna a châ pachai aw dia!

¹³ Tahmâ nâmo, Zenitaizy hnohta ei reih. Zenitaizy lyuhchâpa ei châpa he, rônah ei tah ngaita.

¹⁴ Chatanachata ei chiheih Zu chyhsazy hia patliasapa ta, khazie chhâ ma pachha thei aw veih ei na ma ei tah.

¹⁵ Âmo dythana hmahta khizaw aryhna a châ khiahta cha, âmo apyhna chhochhi cha, thina tawhta hrona leipa ta cha, khâpa a châ aw?

¹⁶ Thei hmiatuapa châta viahchhâ eichheihpa hlâpa a pathaih khiahta cha, viahchhâ tlâ pôhpalôhpa a pathaih. A thari a pathaih khiahta cha, a chiahzy a pathaih.

¹⁷ Châhrasala a chiah thokhazy cha thliepa châ ta, nâ, râh liata ôli tho tlai chi cha, ôli tho phapazy liata pazaopa ta, ôli tho phapa thari nâ hly khiahta cha,

¹⁸ a chiahzy chô liata a palai khah y. Nâ vaw palai thlu ha khiah ei ta cha, he he a thei mah y. Thari cha nâ ta chyh leipa chi ta, thari ta nâma tlao a cha chyh.

¹⁹ “Pazaopa ta ei y thei nawpa ta vei ma, a chiahzy cha thliepa a châ vei,” na tah thei.

²⁰ Â do. Âmo cha ngiapâleina vâta thliepa châ ei ta, nâ deikua cha ngiapâna vâta a duahpa na châ. Chavâta a palai leipa la, tlao chi mah y.

²¹ Pikheipa chiahzy hmahta Khazohpa ta a pahlôh vei khiahta cha, nâ, pazaopa chiah chhochhi cha, cha pahlôh tiarâh aw vei.

²² Chavâta Khazohpa phazie nata chichhihzie he pachâ mah y. A paopazy châta chichhihpa châ ta, nâma châta deikua cha, a phana liata na y thlâh ha khiahta cha, Khazoh phapa a châ. Chataleipatala nâ chhao chhawh pathlahpa na châ aw.

²³ Âmo chhao cha ngiapâleipa ta ama y ngâ thlâh vei khiahta cha, pazaopa ta ama y aw. Khazohpa cha âmo pazao heih theina hmotaotheina a hneipa a châ.

²⁴ Nâ, râh liata ôli kô tawhta chhawhpa hmahta, pikhei siezie tyhpa chakhiapa ta, sadô liata lopa ôli tho liata pazaopa na châ thei khiahta cha, pikheipa ta ôli chiah a châpazy chhochhi cha, âmo ôli tho liata pazao via pachaipa ama châ aw.

Izarei pachhana bienyupa

²⁵ Unawh saih u, he bienyupa he nama pahno lei awpa khoh va na. Chataleipatala namâ palai pathlei aw na. Zenitaizy pakina a vaw tlô hlâta, Izarei chô liata kuhchhana a rakhapa ta a vaw tlô chypa a châ.

²⁶ Izarei zydua pachhapa ama châ aw, “Zaio tawhta pachhatuhpa vaw pua aw ta, Zakaw tawhta moleina a pahlei aw.

²⁷ Ama moleinazy ei pahlei khai tita, Cha cha ama hnohta ei biehrai awpa a châ,” tahpa ropa hawhta.

²⁸ Thâtihpha kyh liata la, nâmo vâta khakhaipa châ ei ta, atlyhna kyh liata deikua cha, pathlatuhpazy vâta kyhpachâpazy ama châ.

²⁹ Khazohpa hmosaipiepazy nata a awna cha panano heih theipa châ vei.

³⁰ Eikhano ta cha Khazohpa rei a ngiah leipa châ ei chi ta, tahmâ deikua cha, âmo reingiah leina zawhzi ta ngiachhiena nama to haw.

³¹ Cha hawhna chata, âmo chhao tahmâ reingiah leipa ta y chy hra ei sala, nâmo chô liata ngiachhiena palâsapa vâna heta, âmo chhao ngiachhiena ama to thei hra aw.

³² A ngiachhie khai thei nawpa ei ta, Khazohpa ta chyhsa zydua reingiah leina liata a khô khai ha ei.

Byhnâ awna

³³ Hy â thu kaw dia, Khazohpa hneirôna, Sona nata pahnona zy cha! A ryureinazy pahno thei awpa châ leipa ta, A lâpizy chathô thei awpa châ vei.

³⁴ Abeipa palôh ahy a pahno? Ahy ma ano ryhraotuhpa ta a y?

³⁵ Thô awpa hnabeiseihpa ta, Ahy ma Khazohpa lâ hmo a pie?

³⁶ Ano tawhta, Ano vâta, Ano châta, Hmo to a ypa a châ. A hnohta chhâzaw ta rônahna y mawh sy! Amen.