RAWMA 10 - Mara Bible RV (BSI)

Izarei sawzy pachhana

¹ Unawh saih u, Izarei sawzy pachha ama châ awpa cha, ei palôh khopa nata âmo châta Khazohpa lâta ei thlahchhâna a châ.

² Khazohpa châta phahnai amâ ngiah tahpa ei pahnokhei ei. Châhrasala pahno pasia leipa ta phahnai a ngiahpa ama châ.

³ Khazohpa siana pahno leipa ta, âmo siana a duakhei a chhuah ei ta, Khazohpa siana liata a ngiarih veih ei.

⁴ Krista cha ngiapâtuhpa zydua ta siana ama hmô thei nawpa ta ryhpa chhâna a châ.

Mo to châta pachhana

⁵ Ryhpa zyhpa vâta siana hmôna kyh liata, Mawsi ta, “Ryhpa a zyhtuhpa cha, ryhpa vâna chata a hroh aw,” tahpa ta roh ta.

⁶ Ngiapâna vâta siana deikua ta cha, “Na palôh ta, ‘Vârâh tawhta Krista a zâ chhi awpa ta, ahy ma vârâh lâ a kiah aw?

⁷ Athihpa hry tawhta Krista a kaw chhi awpa ta, ahy ma athihkhih lâ a zu aw?’ tah khah sy,” tlao a tah.

⁸ Cha bie chata khâpa ma a reih? “Bie ta a châ hnia, na pakah nata na palôh liata a y,” tah ta, cha bie cha ngiapâna bie eima chhopa he a châ.

⁹ Na pakah ta, “Zisu cha Abeipa a châ” tahpa ta a châhkhei la, athihpa hry tawhta Khazohpa ta a pathyu tahpa na palôh ta nâ ngiapâ khiahta cha, pachhapa ta na y aw.

¹⁰ Palôh ta a ngiapâpa cha thai pachâsapa ta y ta, pakah ta a châhkheipa cha pachhapa ta a y.

¹¹ Biehrai ta, “Ahy rai ano a ngiapâpa maih maophyuh aw veih ei,” a tah.

¹² Zu nata Krikâh likah ananona y vei. Abeipa pakha cha ama zydua chô liata Abeipa châ ta, ano a padotuhpa zydua chô liata byhnâ thata a pie tyhpa a châ.

¹³ “Ahy rai Abeipa moh a padopa maih pachhapa ama châ aw,” tahpa a châ.

¹⁴ Cha khiahta la, amâ ngiapâ leipa cha kheihta ama pado thei aw? Ama thei beih leipa cha kheihta amâ ngiapâ thei aw? Biechhotuhpa y leipa ta kheihta ama thei thei aw.

¹⁵ Tuapa ama châ vei khiahta cha, kheihta bie ama chho thei aw? “Thatihpha a vaw tlôkheituhpazy phei cha â ngia kaw dia!” tahpa ta ropa a châ.

¹⁶ Isai ta, “Abeipa, eima bie reipa ahy ma a ngiapâ?” a tahpa hawhta, thâtihpha cha ama zydua ta zyh khai veih ei.

¹⁷ Ngiapâna cha theina vâta vaw y ta, theina cha Krista bie vâta a vaw y.

¹⁸ Cha khiahta la, thei ha veih ei ma? tahpa ta hiahrina tao aw sah la, thei cha ama thei haw. “Ama pyu râh to liata pathâh ta, Ama bie kaokih taihta a pathâh,” tahpa ta ropa a châ.

¹⁹ Izarei ta pahno vei ma? tahpa ta hiahri heih aw sah la, he kyh liata Mawsi ta, “Phopi ta rei tlâh leipazy hmâpa ta, Nama hia cha patliasa aw ei na ta; Phopi hrupa hmâpa ta, Nama hie ei cha pahâh aw ei,” tahpa ta vaw reih tuachai ta.

²⁰ Isai chhao ta riahpha ngaitapa ta, “Nâ tlua leipazy ta na hmô ei ta, Nâ pado leipazy ei pahnosa ei,” tahpa ta a vaw reih haw.

²¹ Izarei kyh lia chhao ta Isai ta, “Noh y ta, Reingiah leipa phopi lâta ei ku pazawh na ta, Chhorupa phopi lâta ei bâh ei pazawh,” tahpa ta a vaw reih haw.