PUASAINA 9 - Mara Bible RV (BSI)

Potla miapangawhna: Sahroh thina ta hriena

¹ Abeipa ta Mawsi hnohta, “Phiraoh lâ vawh la, a hnohta, ‘Zehôvâh, Hebraizy Khazohpa ta hetana heta a tah: Eina chakao thei nawpa ei ta, ei phopi pasiesa teh.

² Ama sie awpa pasai leipa ta na patu ngâ thlâh khiah ei ta cha,

³ moh teh, Abeipa ku ta lyu liata na sahrohzy chô liata potlana ru ngaitapa patlathlusa aw ta, arâzy, alâzy, râraoseihpazy, viahchao hrizy nata mietaku zawzy ama thi khai aw.

⁴ Châhrasala Abeipa ta Izarei sawzy sahrohzy nata Izi mo sahrohzy ananona tao aw ta, Izarei sawzy eih cha pô kha hmah thi aw vei,’ tahpa ta chho mah y,” tah ta.

⁵ Abeipa ta a daihti rao ta, “Cha hmo cha Abeipa ta he râh liata mylâ a tao aw,” tah ta.

⁶ A mylâ ta Abeipa ta cha hmo cha tao ta, Izi mo sahroh zydua thi khai ta, Izarei sawzy sahroh deikua cha, pô kha hmah thi vei.

⁷ Phiraoh ta chyhsa tuah ta, Izarei sawzy sahroh cha pô kha hmah a thi leipa pahno ta. Châhrasala Phiraoh palôh cha kuh pachhasapa ta y ta, Izarei phopi ama sie awpa pasaih pyly vei.

Potla miacharuna: Kheihluh ta hriena

⁸ Abeipa ta Mawsi nata Arawna hnohta, “Patisana mei liata buchâh kei phâ u la, Phiraoh mohmô liata Mawsi ta avâ lâ hie mawh sy.

⁹ Buchâh cha Izi râh zydua chô liata buchâh dipa lâta a vaw lie aw ta, Izi râh chhôh zydua liata chyhsa nata sazy kheihluh pathlasa aw ta, ama padaoh aw,” tah ta.

¹⁰ Chatanachata patisana mei liata buchâh cha la ei ta, Phiraoh hmiakô liata a kei duah ei ta, Mawsi ta avâ lâ hie ta, kheihluh lâta a vaw lie ta, chyhsa nata sazy cha kheihluh ta thlapa ta padaoh khai ha ei ta.

¹¹ Izi mo zydua kheihluh ta thla khai ha ei ta, moliethaipazy chhao a thla ha hrapa vâ ei ta, ama kheihluh vâna chata moliethaipazy cha Mawsi hmiakô liata a duah thei khao veih ei.

¹² Châhrasala Abeipa ta Phiraoh palôh kuh pachhasa ta, Abeipa ta Mawsi hnohta a rei hapa hawhta, ama bie nathlie khoh vei.

Potla miasarina: Pareih ta hriena

¹³ Abeipa ta Mawsi hnohta, “Mydi kari ta thyu la, Phiraoh hmiakô liata a kei duah la, a hnohta, ‘Zehôvâh, Hebraizy Khazohpa ta hetana heta a tah: Eina chakao thei nawpa ei ta, ei phopi pasiesa teh.

¹⁴ Tahmâ liana heta la na chô liata nata châ chakaotuhpazy chô liata nata na phopi chô liata potlana ta ei hrie nawpa zydua ei vaw patlôsa bâ aw. Chatanachata khizaw zydua liata keima hawhpa he ahy hmah y veih ei tahpa na pahno aw.

¹⁵ Ei ku pazawhpa ta, potlana hri ta nâ nata na phopi cha tupa ta, khizaw tawhta ei cha pahleipadia bâ awpa ei a châ taraw.

¹⁶ Châhrasala ei hmotaotheina cha pahmôsapa ta, khizaw zydua liata ei moh pathâhsapa a châ thei nawpa ta ei cha paduapa a châ.

¹⁷ Chatanachôta ei phopi chô liata nâmasasyh a cheihchalo chi ta, âmo cha pasiesa khoh va chi.

¹⁸ Moh teh, mylâ tahmâ daihti liata, Izi râh â vaw dua tua noh tawhta tahmâ taihta a y beih leipa pareih ru ngaitapa ei patlasa aw.

¹⁹ Chavâta tahmâ chyhsa tuah la, na sahroh nata lyu liata na hneipa zydua amâ boh thei nawpa ta pasysa para mah y. A o liata a sy leipa chyhsa to nata lyu liata sa to cha pareih ta daih aw ei ta ama thi aw,’ tahpa ta na chho aw,” tah ta.

²⁰ Phiraoh chakaotuhpazy hry liata Abeipa bie a chipazy ta ama seizy nata ama sahrohzy cha o chhôh lâ pangia para ei ta.

²¹ Abeipa bie a papeisa leipazy deikua cha, ama seizy nata ama sahrohzy lyu liata paysa ei ta.

²² Abeipa ta Mawsi hnohta, “Izi râh chhôh zydua liata pareih tla sala, chyhsa chô liata zy, sa chô liata zy, Izi râh lyu liata chicheipa to chô liata zy pareih patlasa awpa ta, na ku avâ lâ pazawh teh,” tah ta.

²³ Mawsi ta a chôchahrei avâ lâ pazawh ta, chatawhcha Abeipa ta tôkalôhpa nata pareih za tuah ta, alei liata pachie mei za tla ta. Abeipa ta Izi râh chô liata pareih thata patlasa ta.

²⁴ Pareih ru ngaitapa tla ta, pareih hry liata pachie mei â zaopa ta chateih ta, Izi phopi â vaw dua tawhta cha tlu ta pareih rupa Izi râh liata tla beih vei.

²⁵ Pareih chata Izi râh lyurâh liata chyhsapa nata sa zydua daih ta. Pareih chata lyu liata chicheipa zydua nata tho zydua a thlie khai haw.

²⁶ Izarei sawzy yna Kôse râh liata deikua cha, pareih tla vei.

²⁷ Phiraoh ta Mawsi nata Arawna cha paawsa ta, ama hnohta, “Tahmâ la ei vaw molei ha tlai na. Abeipa cha a do ta, kei nata ei phopi tlai he moleipa cha eima châ.

²⁸ Abeipa lâ hiah teh u. Khazohpa tôkalôhpa nata pareihzy he â daih ha bâ na. Ei cha pasiesa bâ aw ei, y khao aw veih ei chi,” tah ta.

²⁹ Mawsi ta a hnohta, “Khih tawhta ei puapata nahta, Abeipa lâ ei ku ei pazawh aw. Tôkalôhpa a chalih aw ta, pareih chhao tla khao aw vei. Chatanachata leilô he Abeipa eih a châ tahpa na pahno aw.

³⁰ Châhrasala nâ nata châ chakaotuhpazy cha Zehôvâh Khazohpa chi mâh veih ei chi tahpa ei pahno,” tah ta.

³¹ Bâli sâh chhi daihti châ ta, pala paw pabyuh daihti a châpa vâta, pareih ta pala nata bâli sâhzy a parao khai haw.

³² Âtâ sâh nata rai sâh deikua, amâ daih hapa vâta pareih ta parao vei.

³³ Mawsi cha Phiraoh tawhta a pasiepa ta khihpi khôtho lâ pua ta, Abeipa lâ a ku pazawh ta. Chatanachata tôkalôhpa nata pareih cha a chalih ei ta, avâ chhao alei chô liata â vaw hia haw.

³⁴ Châhrasala Phiraoh ta vâsua nata pareih nata tôkalôhpa zy amâ chalih hapa a hmô nahta, molei ha heih ta, ano nata a chakaotuhpazy ama kuh amâ pachhasa ha heih.

³⁵ Phiraoh palôh cha kuh pachhasapa ta y ta, Abeipa ta Mawsi hmâpa ta a reipa hawhna tlai khata, Izarei sawzy pasiesa khoh vei.