PUASAINA 8 - Mara Bible RV (BSI)

Potla mianona: Uphawh ta hriena

¹ Abeipa ta Mawsi hnohta, “Phiraoh lâ a kei ngia la, a hnohta, ‘Abeipa ta hetana heta a tah: Eina chakao thei nawpa ei ta, ei phopi pasiesa teh.

² Ama sie awpa na pasai vei khiahta cha, pachâ teh, na râh zydua uphawh ta ei hrie aw.

³ Nile chavah cha uphawh ta bie aw ta, uphawhzy cha kaw pua aw ei ta, na o chhôh liata zy, nâ ziana chhôhpadâhpa liata zy, na rakhô chô liata zy, châ chakaotuhpazy nata na zawpi o chhôh liata zy, na lômathu nata na viahchhâ neihna beikoh chhôh liata zy amâ ngia khai aw.

⁴ Uphawhzy chata nâ nata na phopi nata châ chakaotuhpazy chô liata ama kiah aw,’ tah ma y,” tah ta.

⁵ Abeipa ta Mawsi hnohta, “Arawna chho la, a hnohta, ‘Na chôchahrei chaba la, chavahzy, vahtiepazy nata tipozy chô liata na ku pazawh la, Izi râh liata uphawh pakiasa teh,’ tah mah y,” tah ta.

⁶ Chatanachata Arawna ta Izi râh liata tizy chô liata a ku pazawh ta, uphawhzy kaw pua ei ta, Izi râh ama bie khai haw.

⁷ Châhrasala moliethaipazy ta ama dyu hmâpa ta, cha hawhna tlai chata tao hra ei ta, Izi râh chô liata uphawhzy pakiasa hra ei ta.

⁸ Phiraoh ta Mawsi nata Arawna cha aw ta, ama hnohta “Kei tawhta nata ei phopi tawhta uphawhzy he la khai ha awpa ta Abeipa lâ hiah teh u. Abeipa lâ amâ theih thei nawpa ta Izarei phopi cha ei pasiesa aw ei,” tah ta.

⁹ Mawsi ta Phiraoh hnohta, “Nâ ta palyupalihna tlao to mah y. Uphawhzy cha nâma tawhta nata na ozy tawhta pahleipadia khaipa ta, Nile chavah lia deita paysa awpa ta, nâ nata châ chakaotuhpazy nata na phopi châta khati ta ma ei cha hiapa aw ei?” tah ta.

¹⁰ Phiraoh ta, “Mylâ sy,” tah ta. Mawsi ta, “Na bie hawhta châ mawh sy. Chatanachata Abeipa eima Khazohpa hawhpa he ahy hmah y veih ei tahpa na pahno aw.

¹¹ Uphawhzy ta nâ nata na ozy nata châ chakaotuhpazy nata na phopi puasai aw ei ta, Nile chavah lia deita ama y aw,” tah ta.

¹² Mawsi nata Arawna cha Phiraoh tawhta pua ei ta, Abeipa ta Phiraoh chô liata uphawhzy a vaw patlôsapa kyh liata, Mawsi ta Abeipa lâ hiah ta.

¹³ Abeipa ta Mawsi bie hawhta tao ta. Uphawhzy cha o chhôh liata zy, tlyhmia liata zy nata lyuzy liata thi lymâ ei ta.

¹⁴ Pakhy ei ta a su su ta pathlu ei ta, a râh duata a thu khai haw.

¹⁵ Châhrasala Phiraoh ta huhiehna a vaw ypa a hmô nahta, a palôh kuh a pachha ta, Abeipa ta a rei hapa hawhta, ama bie nathlie khoh heih vei.

Potla miathôhna: Thlohmia ta hriena

¹⁶ Abeipa ta Mawsi hnohta, “Arawna chho la, a hnohta, ‘Izi râh dohlei zydua thlohmia lâta paliesa awpa ta, na chôchahrei kha hy la, alei liata dohlei kha tu teh,’ tahpa ta chho mah y,” tah ta.

¹⁷ Cha hawhna chata tao ei ta. Arawna ta a chôchahrei chabapa ta a ku hy ta, alei liata dohlei tu ta. Thlohmiazy ta chyhsapa nata sazy thata by ta, Izi râh zydua liata alei dohlei zydua thlohmia lâta amâ vaw lie khai haw.

¹⁸ Moliethaipazy ta ama dyu hmâpa ta thlohmia papua hra awpa a chhuah ei ta, châhrasala tao thei veih ei. Thlohmiazy ta chyhsapa nata sazy cha thata by ta.

¹⁹ Moliethaipazy ta Phiraoh hnohta, “Khazohpa kudy a châ hih,” tah ei ta. Châhrasala Phiraoh cha a palôh kuh pachhasa ta, Abeipa ta a rei hapa hawhta, ama bie nathlie khoh vei.

Potla miapalihna: Mathyupa ta hriena

²⁰ Abeipa ta Mawsi hnohta, “Mydi kari ta thyu la, Phiraoh cha ti lâ a zupa pachhaipa ta a hmiakô liata a kei duah la, a hnohta, ‘Abeipa ta hetana heta a tah: Eina chakao thei nawpa ei ta, ei phopi pasiesa teh.

²¹ Ei phopi na pasiesa leipa khiahta cha, pachâ teh, na chô liata zy, châ chakaotuhpazy chô liata zy, na phopi chô liata nata na o chhôh zy liata mathyupazy a pôpi ta vaw tuah aw na ta, Izi mo ozy nata ama pahrâna alei cha mathyupa ta a bie khai aw.

²² Ei phopi pahrâna Kôse râh deikua cha, cha noh liata panano aw na ta, cha liata mathyupa rai y aw vei. Chatanachata kei he alei chô liata a ypa Abeipa ei châ tahpa na pahno aw.

²³ Ei phopi nata na phopi pananona tao aw na ta, he ngiana he mylâ a vaw y aw,’ tahpa ta na chho aw,” tah ta.

²⁴ Abeipa ta cha hawhna chata tao ta. Phiraoh o liata nata a chakaotuhpazy o liata mathyupa hluhpi, a pôpi ta a ngia ei ta, cha mathyupa pôpi chata Izi râh liata râh zydua ama parao khai haw.

²⁵ Phiraoh ta Mawsi nata Arawna cha aw ta, ama hnohta, “Sie u la, he râh chhôh liana heta nama Khazohpa lâ cha a kei theih teh u,” tah ta.

²⁶ Châhrasala Mawsi ta, “Cha hawhta tao awpa cha a do aw vei. Abeipa eima Khazohpa lâta atheihna eima hlâ awpazy cha, Izi mo châta ânapa hmozy châ tlôh ta, chavâta Izi mo châta ânapa hmozy hmâpa ta ama mohmô liata eimâ theih khiahta cha, alô ta miah vawh aw veih ei mâ?

²⁷ Noh thôh lâsie râhchawhpa lâ sie aw pi ta, bie miah a piepa hawh tlai ta, Abeipa eima Khazohpa lâ eimâ theih aw,” tah ta.

²⁸ Phiraoh ta, “Râhchawhpa liata Abeipa nama Khazohpa lâta namâ theih thei nawpa ta, cha pasiesa aw ei na ta, lâ hlapi taih deikua nama sie awpa châ vei, na hiapa teh u,” tah ta.

²⁹ Mawsi ta, “Moh teh, nâ tawhta pua aw na ta, mathyupa pôpi heta Phiraoh nata a chakaotuhpazy nata a phopi mylâ ama puasai thei nawpa ta, Abeipa lâ cha ei hiah aw. Phiraoh deikua ta, chyhsa dôvei khao leipa sala, Abeipa lâ a theih awpa ta Izarei phopi ama sie awpa pasai leipa ta y cheita khao khah sy,” tah ta.

³⁰ Mawsi cha Phiraoh tawhta pua ta, Abeipa lâ thlahchhâ ta.

³¹ Abeipa ta Mawsi bie hawhta tao ta, mathyupa pôpi cha Phiraoh tawhta nata a chakaotuhpazy tawhta nata a phopi tawhta papai ta, sâkha hmah a ngua khao vei.

³² Châhrasala cha daihti liana chhao chata, Phiraoh cha a palôh kuh pachhasa heih ta, Izarei phopi ama sie awpa pasaih pyly vei.