PUASAINA 7 - Mara Bible RV (BSI)

Mawsi nata Arawna hnohta Abeipa biepiepa

¹ Chatawhcha Abeipa ta Mawsi hnohta, “Pachâ teh, Phiraoh hmiakô liata Khazohpa hawhta cha tao na ta, na unawhpa Arawna cha na hrohsopa a châ aw.

² Bie ei cha piepa zydua reih aw chi ta, na unawhpa Arawna ta Phiraoh hnohta Izarei sawzy a râh tawhta pasiesa awpa ta a chho aw.

³ Ngiana nata hmonoâhpazy Izi râh liata ei papôhsapa chhao ta, Phiraoh palôh cha a kuh ei pachhasa ha aw.

⁴ Chavâta Phiraoh ta cha nathlie aw veih ei. Chatanachata Izi râh chô liata ei ku pahnieh aw na ta, pachiana rônahpa ta ei pheisaihzy, ei phopi Izarei sawzy he Izi râh tawhta ei chhi papua aw ei.

⁵ Izi râh chô liata ei ku pazawhpa ta, Izarei sawzy ama hry tawhta ei chhi papua tita, Izi mo ta kei he Abeipa ei châ tahpa ama pahno aw,” tah ta.

⁶ Mawsi nata Arawna ta cha hawhna cha ta tao ei ta, Abeipa ta âmo bie a piepa hawh tlai ta tao ei ta.

⁷ Phiraoh hnohta bie ama rei nota, Mawsi cha kô sychariepa châ ta, Arawna cha kô sycharie nata kô thôhpa a châ.

Arawna chôchahrei

⁸ Abeipa ta Mawsi nata Arawna hnohta,

⁹ “Phiraoh ta, ‘Hmonoâhpa tao teh u,’ a cha tah khiah ei ta cha, Mawsi ta Arawna hnohta, ‘Na chôchahrei kha la la, Phiraoh hmiakô liata kei thy teh, parih lâta â vaw lie aw,’ na tah aw,” tah ta.

¹⁰ Mawsi nata Arawna cha Phiraoh lâ a kei ngia ei ta, Abeipa ta bie a piepa hawhta tao ei ta. Arawna ta a chôchahrei cha Phiraoh nata a chakaotuhpazy hmiakô liata kei thy ta, parih lâta a vaw lie ta.

¹¹ Phiraoh chhao ta chyhsa sopazy nata dyuthaipazy aw hra ta, Izi râh liata moliethaipazy chhao chata ama dyu hmâpa ta, cha hawhna tlai chata tao hra ei ta.

¹² Ama chôchahrei thy chyu ei ta, parih lâta a vaw lie ei ta. Châhrasala Arawna chôchahrei ta âmo chôchahreizy cha palâ khai ha ta.

¹³ Chatanachôta Phiraoh palôh cha kuhchhâpa ta y ta, Abeipa ta a rei hapa hawhta, ama bie nathlie khoh vei.

Potla miakhana: Thisaih ta hriena

¹⁴ Abeipa ta Mawsi hnohta, “Phiraoh palôh cha kuh pachhasapa ta y ta, Izarei phopi pasiesa khoh vei.

¹⁵ Ti lâ a zu nota pachhai awpa ta, Phiraoh lâ mydi ta vawh la, chôchahrei parih lâta a liepa kha na ku liata a chabapa ta, ano a hmô awpa ta Nile chavah kiah liata a kei duah mah y.

¹⁶ Chatawhcha a hnohta, ‘Zehôvâh, Hebraizy Khazohpa ta, he bie he cha chho awpa ta nâ lâta eina vaw tuah: “Râhchawhpa liata eina chakao thei nawpa ei ta, ei phopi pasiesa teh,” cha tah na ta. Châhrasala tahmâ taihta nathlie khoh va chi.

¹⁷ Chavâta Abeipa ta hetana heta a tah: Kei he Abeipa ei châ tahpa ei hmotaopa liata na pahno aw: Moh teh, ei ku liata chôchahrei heta Nile chavah tizy tu aw na ta, thisaih lâta amâ lie aw.

¹⁸ Nile chavah liata ngazy thi aw ei ta, chavah cha thu aw ta, Izi mo ta Nile chavah ti doh khoh khao aw veih ei,’ na tah aw,” tah ta.

¹⁹ Abeipa ta Mawsi hnohta, “Arawna hnohta, ‘Na chôchahrei chaba la, Izi râh tizy, ama chavahzy, ama vahtiepazy, ama tipozy nata ama ti pa-ona zydua chô liata na ku pazawh teh. Chatanachata tizy cha thisaih lâta a lie aw ei ta, Izi râh zydua liata thisaih a y aw. Tho hmobaohzy chhôh liata nata alô hmobaohzy chhôh liata chhao thisaih a y aw,’ tahpa ta chho mah y,” tah ta.

²⁰ Mawsi nata Arawna ta Abeipa biepiepa hawhta tao ei ta. Arawna ta a chôchahrei cha chalo ta, Phiraoh mohmô liata nata ano a chakaotuhpazy mohmô liata Nile chavah ti cha tu ta, Nile chavah ti zydua cha thisaih lâta â lie khai haw.

²¹ Chavah liata ngazy thi ei ta, chavah cha thu ta, Izi mo ta chavah ti cha doh thei khao veih ei. Izi râh zydua cha thisaih ta a bie khai haw.

²² Châhrasala Izi râh liata moliethaipazy ta ama dyu hmâpa ta, cha hawhta tao hra ei ta. Chavâta Phiraoh palôh cha kuhchhapa ta y ta, Abeipa ta a rei hapa hawhta, ama bie nathlie khoh vei.

²³ Phiraoh cha kua ta, a o lâ a di ta, cha hmo cha a pachâ chhao pachâ khao vei.

²⁴ Nile chavah ti ama do thei khao leipa vâta, ti do awpa tluapa ta, Izi chyhsa zydua ta Nile chavah kiahzy chao ei ta.

²⁵ Abeipa ta Nile chavah a tu tawhta noh sari châ ha ta.